ዳኔላ 8

ዳኔል በኤዳ ዶርሳ ኦርግያነ ዴሻ ኦርግያ ሳፃ

(8:1-27)

1በልሻጻር ካተቴዳ ሄዘን ላይ፥ ታን ዳኔል ሀዋፐ ካሰ በኤዳ ሳጻፐ ሀራ ሳፃ በኣድ። 2ሄ ሳጻን አያ በኣድታ ጎፐ፥ ኤላማ ጋድያን ሱሳ ግያ ካታማን፥ ኡላያ ግያ ሻፋ ማታን ኤቄዳ ታና በኣድ።

3ሄ ሻፋ ማታን ላኡ አዱሳ ካጨቱ ደእያ ዶርሳ ኦርጊ ኤቄዳ። ላኡ ካጨቱዋፐ እቱ ጉየፐ ዶሌዳ፤ ሽን ኮይሮ ዶሌዳዋፐ አዱቄ። 4ሄ ዶርሳ ኦርጊ ባረ ካጭያን ቃይጫናዉ፥ አዋይ ዉልያ ባጋ፥ ሁጲሳ ባጋናነ ገድሳ ባጋ ንግሽን በኣድ። አናና ኤቀታናዉነ አ ዎልቃፐ ከስ አካናዉ አይ መሂካ ዳንዳይቤና። እ ባረ ኮዬዳዋ ኦዳ፤ ያቲደ ባረና ግታዬዳ።

5ታን ሀ ሳጻባ ቆፕሽን፥ እት ዴሻ ኦርጊ አዋይ ዉልያ ባጋፐ ከሲደ፥ ቢታ ሳኣ አደ፥ ገዲ ሳኣ የናን ዬዳ፤ አዉ ላኡ አይፈቱዋፐ ግዱዋን እት ዎጋ ካጪ ደኤ። 6እካ ዳሮ ሀንቁዋና ዲሲደ፥ ሻፋ ማታን ታን በኤዳ ላኡ ካጭያና ደእያ ዶርሳኮ፥ ዋታዉ ንጊደ ዬዳ። 7ጋኪደ፥ ዳሮ ይሎቲደ፥ ታን ጼልሽን፥ ዶርሳ ኦርግያ ካጨቱ ላኡካ መአና ጋካናዉ፥ ኢታ ዶምኤ ዶምኤዳ። ዶርሳ ኦርግያዉ አናና ኤቀታናዉ ዎልቃይ ባዋ፤ ሄዋ ድራዉ፥ ዴሻ ኦርጊ አ ኩንድሲደ፥ የ ኤቄዳ። ዴሻ ኦርግያ ዎልቃፐ ሄ ዶርሳ ኦርግያ አሽያዌ ባዋ።

8ሄ ዴሻ ኦርጊ ሎይ ግታቴዳ፤ ሽን አ ዎልቃይ ዳር ዳር ብያ ዎደ፥ አ ዎጋ ካጪ መኤዳ፤ ኤለካ፥ ኦይዱ ዎጋ ካጨቱ ቢታዉ ኦይዱ ባጋ ስሚደ ድጬድኖ። 9ሀ ኦይዱ ካጨቱዋፐ እቱዋ ቦላ ሀራ ጉ ካጪ ዶሊደ፥ ዎልቃን ገድሳኮ፥ አዋይ ዶልያ ባጋ እስራኤልያ ጋድያኮ ስሚደ ድጬዳ። 10እ ቢደ ሳሉዋን ደእያ ኦላንቻቱዋ ጋካናዉ ድጬዳ፤ ሳሉዋ ጾልንተቱዋፐ ኡንደናዋንታ ሳኣን ዱገ ኦሊደ፥ ኡንቱንታ የዳ።1 11ቃይ እ ባረና ቁ ኦደ፥ ኦላንቻቱዋ ጋዳዉዋ ጾሳና ልክሴዳ። ሀቼ ሀች አሳይ ያርሽያ ጹገትያ ያርሹዋካ ተኤዳ። ቃይ አ ጌሻ ጎልያካ ቱንሴዳ። 12ማካላ ጋሱዋን ጌሻቱዋ ኦላንቻቱነ ሀች ሀች ያርሽያ ያርሹ ሄ ካጭያዉ እመቴዳ። ቱሙካ ሳኣን ኦለቴዳ፤ ሄ ካጪ ኦያባይ ኡባይ አዉ እንጀቴዳ።

13ሄዋፐ ጉይያን፥ እት ጌሻ ኪታንቻይ ሃሳይሽን ታን ስሳድ። የንኮ ጌሻ ኪታንቻይ ሀ ኪታንቻ፥ “ሀ ሀች ሀች ያርሽያ ያርሹዋባ፥ ሀ ማካላይ አህያ ባሻባነ ሳሉዋ ኦላንቻቱነ ጌሻ ሳአይ የቲደ ደአናባ ኦድያ ሳጻይ አዉደ ፖለታኔ?” ያጊደ ኦቼዳ።

14እ ዛሪደ፥ “ላኡ ሻኣነ ሄዙ ጼቱ ዎንታይነ ኦማርሳይ ጋካናዉ ጋምአና፤ ሄዋፐ ጉይያን፥ ጌሻ ጎሊ ጌያና” ያጊደ ኦድሽን ስሳድ።

ኪታንቻይ ጋብሬል ሳፃ ብሌዳ

15ታን፥ ዳኔል፥ ሀ ሳፃ በኣደነ አ ብለ ኤራናዉ ቆፓደ ደእሽን፥ እት አሳ ማላትያዌ ታ ስንን ኤቄዳዋ በኣድ። 16ቃይ ታን ኡላያ ሻፋፐ፥ “ጋብሬላ፥ ሀ ብታንያዉ ሀ ሳፃ ብለ ኦዳ” ያግያ ኮሻ ስሳድ።2

17እ ዪደ ታን ኤቄዳ ሳኣ ማቴዳ ዎደ፥ ታን ዳጋማደ፥ ታ ሶምኡዋ ቢታዉ ዱገ ዛራደ ኩንዳድ። እ ታና፥ “አሳ ናአዉ፥ ሀ ሳጻይ ዉርሰ ዎድያባ በስያዋ ግድያዋ አኬካ” ያጌዳ።

18እ ታናና ሃሳይያ ዎደ፥ ታን ሳኣን ጉፋናደ፥ ገምእሹዋ ካይሮታድ። ያትና፥ እ ታና ሳኣፐ ፑደ ደንደ፥ ታ ገድያን ኤሴዳ። 19ታና፥ “ስሳ፥ ታን ጾሳ ሀንቁዋ ዉርሰን ሀናናዉ ደእያዋ ኦዳይ፤ አያዉ ጎፐ፥ ሀ ሳጻይ ጾሳይ ኬር ዎዳ ዉርሰ ዎድያን ሀናናባ ኦዴ።

20“ኔን በኤዳ ላኡ ካጭያና ደእያ ዶርሳ ኦርጊ ሜዶናነ ፓርሰ ካተቱ ሌምሱዋ። 21ዴሻ ኦርጊ ቃይ ግሪከ ካትያ ሌምሱዋ፤ አ ላኡ አይፈቱዋፐ ግዱዋን ደእያ ዎጋ ካጪ ኮይሮ ካትያ። 22ካጪ መእ ዎና፥ አ ሳኣን ዶሌዳ ኦይዱ ካጨቱ አ ካዉተፐ ሻከቲደ ከሳና ኦይዱ ካዉተቱዋ ሌምሱዋ፤ ሽን ኡንቱንቱ ዎልቃይ ኮይሮዋ ዎልቃ ጋከና።

23“ኡንቱንቱ ካዉተ ዉርሰይ ጋክያ ዎደነ ኡንቱንቱ ማካላይ ዛዋ ጋክያ ዎደ፥ እት መቀ ኢታነ ጭምያ ጭንጫ ካቲ ደንዳና። 24እ ሎይ ምኖ ግዳና፤ ሽን ባረ ዎልቃና ግደና። ዳጋንያ ባሻ እ ባይዛና፤ እ ኦያባይ ኡባባይ አዉ እንጀታና። እ ምኖ አሳቱዋነ ጌሻ አሳቱዋ ይሳና። 25እ ጭምያ ድራዉ፥ አዉ እንጀታና፤ ቃይ እ ባረና ኡባፐ ቁ ቁ ኦና። ኡንቱንቱ ሳአይ ሳራ ግ ደእሽን፥ ኡንቱንቱፐ ዳሮቱዋ ዎና፤ ቃይ ካፓቱዋ ካፑዋና ኤቀታና። ሽን አሳይ ቦቼናን እ ባረዉ ያና።

26“ነዉ ኦደቴዳ ላኡ ሻአነ ሄዙ ጼቱ ዎንታነ ኦማርሳ ጼልያ ሳጻይ ቱማ፤ ሽን ዳሮ ዎድያፐ ጉይያን ፖለታናዉ ደእያ ድራዉ፥ ጎርዳደ ማታፋ አ ቦላ ዎደ ናጋ” ያጌዳ።

27ታን ዳኔል፥ ሎይ ዳቡሬዳ ድራዉ፥ ሳከታደ ዳሮ ጋላሳ ግሳድ። ሄዋፐ ጉይያን ደንዳደ፥ ካትያ ኦሱዋ ባድ። ሀ ሳጻን ታን ሎይ ሻቢረታድ፤ አኬካናዉካ ዳንዳያበይከ።