Skip to content
BibleKenya

Dawro Full Bible Ethiopic

ዳኔላ 9

ዳኔል ባረ አሳ ድራዉ ዎሴዳ

(9:1-27)

ሜዶና ቢታ አሳ ግድያ አርጸክስሳ ናአይ ዳርዮሰ ባብሎነን ካተቴዳ። እ ካተቴዳ ኮይሮ ላይ፥ ታን ዳኔል፥ ጌሻ ማጻፋቱዋ ናባባድ፤ ትምቢትያ ኦድያ ኤርማሳዉ መና ጎዳይ ኦዴዳዋዳን የሩሳላመ ላፑን ታሙ ላይ ኮለቲደ ጋምአናዉ ደእያዋ አኬካድ።1

ሄዋ ድራዉ፥ ታን ጎዳ ጾሳኮ ስማደ፤ ማቃ ማያደ፥ ብድን ታ ሁጲያ ቦላ ቆላደ፥ ጾማደ፥ አ ዎሳይነ አዉ ዋትዋታይ።

ታን ናጋራ ፓጻደ፥ መና ጎዳ ታ ጾሳ ሀዋዳን ያጋደ ዎሳድ፤ “አቤት ጎዳዉ፥ ዎልቃማነ ያሽያ ጾሳዉ፥ ኔና ሲቅያዋንቶነ ነ አዛዞ ኤኖ ግያዋንቶዉ ነ አገና ሲቁዋነ ጫቁዋ ናግያዎ፥ ኑን ናጋራ ኦዶነ ባሌዶ፤ ኑን ኢታባ ኦዶነ ማካሌዶ፤ ነ አዛዙዋፐነ ነ ዎጋፐ ዎራ ስሜዶ። ኑ ካተቶ፥ ኑ ካፓቶ፥ ኑ አዋቶነ ሳኣን ደእያ አሳ ኡባዉ ነ ሱንን ትምቢትያ ኦዴዳ ነ ቆማቱ ኦዴዳዋ ስሰናን እጼዶ።

“አቤት ጎዳዉ፥ ኔን ጽሉዋ፤ ሽን ኑን ሀች ዬላ ማዬዶ። ይሁዳንነ የሩሳላመን ደእያ አሳይ ኡባይ፥ ኑን ነዉ አማነተናን እጽና፥ ኔን ሃኮ ቢታንነ ማታ ጋድያን ላሌዳ እስራኤልያ አሳይ ኡባይ ዬላቴዶ። አቤት መና ጎዳዉ፥ ኑን፥ ኑ ካተቱ፥ ኑ ካፓቱነ ኑ አዎቱ ኔና ናቄዳ ጋሱዋን ዬላ ማዬዶ። ሽን ኑን አዉ ማካሌዳባ ግዶፐካ፥ ጎዳይ ኑ ጾሳይ ማርያዋነ አቶ ያግያዋ። ኑን መና ጎዳዉ፥ ኑ ጾሳዉ፥ አዛዘትቦኮ፤ ቃይ ትምቢትያ ኦድያ ባረ ቆማቱ ባጋና እ እሜዳ አ ህግያ ናግበይኮ። እስራኤልያ አሳይ ኡባይ ነ ህግያ መንደ፥ ዎራ ስሜድኖ፤ ነ አዛዞካ ኤኖ ግበይክኖ።

“ኑን ነ ቦላ ናጋራ ኦዳ ድራዉ፥ ጾሳ ቆማ ሙሴ ህግያ ማጻፋን ጻፈቴዳ ሸቃይነ ፕርዳይ ኑ ቦላ ትገቴዳ። ቃይ ኑ ቦላነ ኑና ካለያዋንቱ ቦላ ዎልቃማ ባሻ አሀናዉ ኔን ሃሳዬዳ ቃላ ኑ ቦላ ፖላዳ። አያዉ ጎፐ፥ የሩሳላመ ቦላ ጋኬዳዋ ማላይ ሳሉዋፐ ጋርሳን ሀራ ጋድያ ቦላ ሙለካ ጋክቤና። ሙሴ ህግያን ጻፈቴዳዋዳን፥ ሀ ባሻይ ኡባይ ኑ ቦላ ጋኬዳ። ኑ ናጋራፐ ስምበይኮ፤ ነ ቱሙዋ ስስበይኮ፤ ኔና፥ መና ጎዳ ኑ ጾሳካ ማሮታ ኦችበይኮ። መና ጎዳይ ሀ ባሻ ኑ ቦላን አሀናዉ ጉየ ግቤና፤ አያዉ ጎፐ፥ መና ጎዳይ ኑ ጾሳይ ባረ ኦያባን ኡባን ጽሉዋ፤ ሽን ኑን አዉ አዛዘተናን እጼዶ።

“አቤት ጎዳዉ፥ ኑ ጾሳዉ፥ ካሰ ነ አሳ ነ ምኖ ኩሽያን ግብጼፐ ከሳደ፥ ሀቼዋዳንካ ነ ሱን ጼስሴዳዎ፥ ኑን ናጋራ ኦዶ፤ ኑን ባሌዶ። አቤት ጎዳዉ፥ ኔን ካሰ ነ ጽሎ ኦሱዋ ኡባ ኦዳዋዳን፥ ሀእ ነ ሀንቁዋነ ነ ቦሻነ ነ ካታማፐ፥ የሩሳላመፐ፥ ነ ጌሻ ደርያፐ፥ ዎራ ዛራ። ኑን ኦዳ ናጋራይነ ኑ አዎቱ ኦዳ ባይዙ የሩሳላመነ ነ አሳነ ኑ ዩሹዋን ደእያ ኡባዉ ቅሊጩዋ ከሴዳ።

“ስም ሀእ ኑ ጾሳዉ፥ ታን ነ ቆማይ ዎስያ ዎሳነ ዋትዋቱዋ ስሳ። ጾሳዉ፥ ነ ሱን ድራዉ ጋደ፥ ሀ ኮለቴዳ ነ ጌሻ ጎልያ ነ ኬካ አይፍያን ጼላ። አቤት ታ ጾሳዉ፥ ነ ሀይ ኑኮ የጋደ ስሳ፤ ነ አይፍያካ ዶያደ፥ ነ ሱንን ጼሰቴዳ ካታማ ባየ ጼላ። ኑን ነዉ ዋትዋትያዌ፥ ኑ ጽሎተ ድራዉ ግደናን፥ ነ ዎልቃማ ማሮተ ድራሳ።

“አቤት ጾሳዉ፥ ስሳ! አቤት ጾሳዉ፥ አቶ ጋ! አቤት ጾሳዉ፥ ሀይዛነ ኦ! ነ ካታማይነ ነ አሳይ ነ ሱንን ጼሰቴዳ ድራዉ፥ አቤት ታ ጾሳዉ፥ ነ ሱን ድራዉ ጋምኦፓ” ያጋድ።

ጋብሬል ዳኔላዉ ስንፐ ሀናናባ ኦዴዳ

ታን ዎሳደ፥ ታ ናጋራነ ታ አሳ እስራኤልያ ናጋራ ፓጻደነ ታ ጾሳ ጌሻ አሳባ፥ የሩሳላመባ መና ጎዳዉ ታ ጾሳዉ ዋትዋታደ ታካድ። ሄዋዳን ሀናደ ታን ደእሺና፥ ካሰ ሳጻን ታን በኤዳ ጋብሬል፥ ታኮ ኤለካ ፓሊደ፥ ኦማርሳ ያርሹዋ ያርሽያ ሳትያን ፑቱ ጌዳ።2 እ ሀዋዳን ያጊደ፥ ታዉ ኦዴዳ፤ “ዳኔላ፥ ታን ኤራነ አኬካ ነዉ እማናዉ ሀእ ያድ። ኔን ብሮ ዎሳ ዶሞደ ነ ዎሳ ዛሩ እመቴዳ፤ ታንካ ሄዋ ነዉ ኦዳናዉ ያድ። አያዉ ጎፐ፥ ጾሳይ ኔና ሎይ ዶሴ። ሄዋ ድራዉ፥ ታን ኦድያዋ ቆፓ፤ ሳጻካ አኬካ።

“ላፑ ገደ ላፑን ታሙ ላይይ ጾሳይ ነ አሳዉነ ነ ጌሻ ካታማዉ ኬሬዳ ዎድያ። ሄ ዎደቱዋን ናቁ ዉራና፤ ናጋራ ኦሱ አታና፤ ባይዙ ማረታና፤ መና ጽሎተይ ገላና፤ ሳጻይነ ትምቢቲ ፖለታናነ ኡባፐ አዳ ጌሻ ሳአይ ኦከታና።

“ሄዋ ድራዉ፥ ሀዋ ኤራነ አኬካ። የሩሳላመ ካታማይ ኦራጻናዳንነ ኬጸታናዳን አዛዙ ከሴዳ ጋላሳፐ ቢደ ካፑ ኦከቶዌ ያና ጋካናዉ፥ ላፑን ገደ ላፑኑነ ኡሱፑን ታማነ ላኡ ገደ ላፑን ላይይ አና። ሄዋን የሩሳላመ ካታማይ ኦራጻና፤ ኦገቱካ ዩሹዋ ግምበቱካ ኦሰታና። ሽን ግምበትያ ዎዲ መቶ ዎደ ግዳናዋ።

“ኡሱፑን ታማነ ላኡ ገደ ላፑን ላይፐ ጉይያን፥ ኦኬቴዳዋ አሳይ ዎና። አ ማታን አያይነ ባዋ። ይያ ካፑዋ አሳይ፥ ካታማነ ጌሻ ጎልያ ላላና። ሄ ካታማ ዉርሰይ ድኡዋዳን አኬከናን ያና። ሄ ዎድያፐ ቢደ ዉርሰይ ጋካናዉ፥ ኦላነ ባሻ አዋዬዳ። ሄ ካፑ ላፑን ላይይ ግዶን አሳና ምኖ ጫቁዋ ጫቀታናዋ። ሄ ላፑን ላይቱዋ ግዶ ግሸቻን እ ያርሹዋ ያርሽያዋነ እሞታ እምያዋ ድጋና። ጌሻ ጎልያዉ ግዶ ግሸቻን ባየ ቱናተ እ ኤሳና። ዉርሰን አዋየቴዳ ቦሻይ አ ቦላ ትገታናዋ” ያጌዳ።3

Source notes (3)
  1. Cross-reference ኤር. 25:11፤ 29:10
  2. Cross-reference ሉቃሳ 1:19፣ 26
  3. Cross-reference ዳኔላ 11:31፤ 12:11፤ ማቶሳ 24:15፤ ማር. 13:14

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.