ዳኔላ 7

ዳኔል በኤዳ ኦይዱ ዶአቱዋ ሳፃ

(7:1-27)

1ባብሎነ ካቲ በልሻጻር ካተቴዳ ኮይሮ ላይ፥ ዳኔል ባረ አርሳን ዛቁሊደ፥ አኩሙዋነ ሳፃ በኤዳ። እ ባረ አኩሙዋን በኤዳ አይፈ የዎቱዋ ጻፌዳ።

2ዳኔል ሀዋዳን ያጊደ ጻፌዳ፤ “ቃማ ታን ታ ሳጻን ሳሉዋፐ ዬዳ ኦይዱ ጫርኮቱ ዎጋ አባ ቡልአክሽን በኣድ። 3ቃይ እቱ እቱዋፐ ዱማትያ ኦይዱ ዎልቃማ ዶአቱ አባፐ ከሴድኖ።1

4“ኮይሮ ዶአይ ጋሙዋ ማላቴ፤ ቃይ አዉ አንኩዋዳን ቀፊ ደኤ። ታ ጼልሽን፥ አ ቀፊ ሾደትና፥ ሳኣፐ ደንዲደ፥ አሳዳን ላኡ ገድያን ኤቃናዳን ኦሰቴዳ፤ ቃይ አሳ ዎዛናይካ አዉ እመቴዳ።2

5“ቃይ ላኤን ዶአይ እት ባጋ ቁ ጊደ ኤቄዳ ባባን ግያ ኢታ ዶኣ ማላቴ። ሄ ዶአይ ሄዙ ጋይልያ መቀ ባረ ዶናን ባሪደ፥ ባረ ማታን ሳእ ኦይቄዳ። ያቴዳዌ፥ ‘ደንዳደ ዳሮ አሹዋ ማ’ ጌተቴዳ።

6“ሄዋፐ ስምና ቃይ፥ ማህያ ማላትያ ሀራ ዶኣ በኣድ። አ ዞክያን ካፉዋ ቀፍያ ማላትያ ኦይዱ ቀፈቱ ደኢኖ። ቃይ አዉ ኦይዱ ሁጰቱ ደኢኖ። ሀ ዶአዉ ሞድያ ማታይ እመቴዳ።

7“ሄዋፐ ስምና፥ ቃማ ሳጻን ያሽያ፥ ዳጋንያነ ሎይ ምንያ ኦይደን ዶኣ በኣድ። አዉ ዎልቃማ ብራታ አቻቱ ደኢኖ። እ ባረናን ጋከቴዳዋ ኡባ ኡንቱንቱን መንሬደ ሜነ አቴዳዋ ባረ ገድያን የሬ። ካሰ ታ በኤዳ ዶአቱዋ ኡባፐ እ ዱማቴ፤ አዉ ታሙ ካጪ ደኤ።3 8ታን ሀ ካጨቱዋባ ቆፕሽና፥ ሄ ካጨቱዋ ግዶፐ ሀራ እት ጉ ካጪ ከስሽን በኣድ፤ ሄ ካጪ የንኮ ካጨቱዋፐ ሄዛቱዋ ቆሊደ ኦሌዳ። ሀ ካጭያዉ አሳ አይፍያ ማላትያ አይፊነ ኦቶሩዋን ሃሳይያ እንጻርሳይ ደኤ።4

መናዉ ደእያዋፐ ቆንጬዳ ሳፃ

9“ታን ሄዋ ጼልሽን፥ ካተቱዋ አራታቱ ኡተዉ ጊጌድኖ። መናፐ ደእያዌ ባረ አራታን ኡቴዳ። አ ማዩ ሻቻዳን፥ አ ሁጲያ ብናናይካ ፑቱዋዳን ቦ። አ አራታይነ አራታ ይንግረቱ ታማዳን ላጮቲኖ።5 10ታማ ሻፋይ አ ስንፐ ፑልቲደ ከሴ። ሻአ ገደ ሻአቱ አዉ ኦኖ፤ ቃይ ዳሮ ሚሎነቱ አ ስንን ኤቄድኖ። ያት ደእሽን ፕርዳ ፕርድያዌ ዶመቴዳ፤ ማጻፋቱካ ዶየቴድኖ።6

11“ሀ ጉ ካጪ ሃሳይያ ኦቶሮ ቃላይ ታዉ ስሰትያ ድራዉ፥ ታን ሀእካ ሽሳደ ጼላድ። ታን ጼልሽን ሀ ዶአይ ሀይቂደ፥ ኤጽያ ታማን ኦለቲደ ዬዳ። 12የንኮ ሄዙ ዶአቱዋፐ፥ ኡንቱንቱ ማታይካ አከቴዳ፤ ሽን ኡንቱንቱ ኬረቴዳ ዎድያ ፓጻ ደእኖ ጌተቴድኖ።

13“ቃይካ ታን ሄ ቃማ ሳጻን፥ አሳ ናኣ ማላትያዌ ሳሉዋ ሻርያና ይያዋ በኣድ። መናፐ ደእያዋኮ ሺቅና፥ ኡንቱንቱ አ አ ስን አድኖ።7 14አዉ ማታይ፥ ቦንቹነ ካዉተይ እመቴዳ። አሳይ ኡባይ፥ ካዉተቱ ኡባይነ ዱማ ዱማ ቃላን ሃሳይያ ዛራቱ ኡባይ አዉ ሞደቴድኖ። አ ማታይ መናዉ ሻረተና ማታ፤ አ ካዉተይ ሙለካ የናዋ።8

ሳፃ ብለ

15“ታና ዳኔላ ግዶፐ፥ ታ በኤዳዋን ኡባን ዳጋማድ፤ ታ ሳጻይካ ታና ሻባርሴዳ። 16ታን ሄዋ ኤቄዳዋንቱፐ እቱዋኮ ሺቃደ፥ ሀ ኡባዉ ቱሙ ብለይ አየንቶ ኦቻድ። እ ታዉ አ ብለ ኡባ ሀዋዳን ያጊደ ኦዴዳ፤ 17‘ሀ ኦይዱ ዎልቃማ ዶአቱ ሀ ሳኣን ስንፐ ደንዳና ኦይዱ ካዉተቱዋ። 18ሽን ኡባፐ ቂያ ጾሳ ጌሻቱ አ ካዉተ አኪደ፥ መናዉ ባረሳ ኦና፤ መና ካዉተ ኡንቱንቱ ላታና’ ያጌዳ።9

19“ሄዋፐ ጉይያን፥ ታን ሀራ ዶአቱዋ ኡባፐ ዱማቲደ ያሽያ ኦይደን ዶአዉ ደእያ ቱሙ ብለ ኤራናዉ ኮያድ። ሄ ዶአዉ ብራታ አቻይነ ናሃሰ ብራታ ጹጉንይ ደኤ፤ እ ባረናን ጋከቴዳዋ ኡባ መንሬደ ሜነ ሚሽን አቴዳዋ ባረ ገድያን የሬ። 20ቃይ ሀ ዶኣ ሁጲያን ደእያ ታሙ ካጨቱዋባነ ቃይ ጉየፐ ከሲደ፥ ኡንቱንቱፐ ሄዛቱዋ ቆል ኦሌዳ ቄር ካጭያባካ ኤራናዉ ኮያድ። ሄ ቄር ካጭያዉ አይፈቱነ ኦቶሮ ቃላ ሃሳይያ እንጻርሳይ ደኤ። ሄ ካጪ የንኮቱዋ ኡባፐ አ ያሽያዋ። 21ታን ጼልሽን፥ ሀ ካጪ ጌሻቱዋና ኦላ ጋከቲደ፥ ኡንቱንታ ጾኔዳ።10 22ሄዌ ሀኔዳዌ፥ መናፐ ደእያዌ ያና ጋካናዉነ፥ ኡባፐ ቂያ ጾሳ ጌሻቶ ፕርዳይ ፕርደታና ጋካናሳ፤ ኡንቱንቱ ካዉተ ላትያ ዎዲካ ጋኬዳ።11

23“እ ታዉ ብለ ሀዋዳን ያግ ኦዴዳ፤ ‘ኦይደን ዶአይ ሀ ሳኣን ስንፐ ደንዳና ኦይደን ካዉተ። ሄ ካዉተይ ሀራ ካዉተ ኡባፐ ዱማ፤ ቢታ ሳኣ እ ማና፥ የናነ መንሬና። 24ቃይ ታሙ ካጨቱ ሀ ካዉተቱዋፐ ደንዳና ታሙ ካተቱዋ። ሄዋፐ ጉይያን፥ ካሰ ታሙ ካተቱዋፐ ዱማትያ ሀራ ካቲ ደንዳና። እ ኡንቱንቱፐ ሄዙ ካተቱዋ ጾኒደ ሞዳና።12 25እ ኡባፐ ቂያ ጾሳ ቦላ ጻሊደ ሃሳያና፤ አ ጌሻቱዋካ ኡቁናና። ቃይ ዎደቱዋነ ዎጋ ላማናዉ ቃቃታናዋ። ዎዲ፥ ዎደቱነ ዎድያ ባጋይ ጋካናዉ ጌሻቱ አ ማታፐ ጋርሳና ሞደታና።13

26“ ‘ሽን ሄዋፐ ጉይያን፥ ፕርዳ ፕርድያዌ ዶመታና፤ አ ማታይ ሙሊ አከታና፤ እ መናዉ ያና። 27ሳሉዋፐ ጋርሳና ደእያ ካዉተቱዋ ኡባ ማታይ፥ ዎልቃይነ ግታተይ ኡባፐ ቂያ ጾሳ ጌሻ አሳቶ እመታና። አ ካዉተይካ መና ካዉተ ግዳናዋ፤ ሳኣ ሞድያዋንቱ ኡባቱ አዉ አዛዘታናነ አዉ ኦና’ ያጌዳ።14

28“ታ ሳጻባይ ሀዋን ዉሬዳ። ታን ዳኔል፥ ታ ቆፋን ዳሮ ሻባረታድ፤ ታ ሶምኢካ ሄዋ ኤርሴ። ሽን ኡባባካ ታን ታ ዎዛናን ዎድ” ያጊደ ጻፌዳ።