Dhankavi Bible
गिनती 27
सलोपदन पोराय नू मांग
तव यूसुफ न पोर्यो हेपेरन पोर्या गिलादन पोतो आरू मनश्शेन कुळन पोर्यो माकीर पोर्यान पोर्यो हुतो, सलोफादन पोरायटा जेनको नाव छे: महला, नोआ, होग्ला, मिल्का आरू तीर्सा। हुये मूसा, पुजारो एलीआजर , नेताओं आरू समस्त मंडळी क अगळ मिळन-शिविर क झपला पोर एकठो हुया। हामरो बास ते जंगलोम मर गियो; पुन त्या उनी मण्डळी माईन हुतो जो कोरह न मण्डळीन क सात मा योहोवान विरुद्ध एख्टी हुयली हुती, हुयो आपना पाप क कारण मोर्या हुता। ओका कुई पुर्या नी हुता। तव हामरा बाप क नाव ओका कुळ मा सी मिट जाय? काय एकालिय ओका पुर्या नी छे? हाव वी हामरा काकान हागा क विच मा बासोन जागान-वाटो आपू।
मूसा न ओक मुकद्दमो पोरबु क अगळ राख्यो। योहोवा मूसा सी कयो, सलोफाद क पुरायटा नियायोन वात कोहे छे। तू ओक ओकान काका न साथ बासोन जागान-वाटो आप दे। ओक बास क बासोन जागान ओक हस्तान्तरित कोर दे। तू इसराएलियो सी कोहजी, कदाम कुदा मानुस नू मौत होये, आरू ओक कुई पुर्य नी छे, ती तुमू ओकी बासोन जागा ओकी पुराय क हातोम कोर देजो। कदाम ओका पुराय नी होय ती ओका बासोन जागा ओका भास्यो क आप देजो। कदाम ओका भाईस वी नू छे ती ओका बासोन जागो ओका काका क आप देनो। पुन कदाम ओका काको नी छे, ती ओका बासोन जागो ओका सोगाय वाळाक, ज ओका कुळ मा ओका सबसे जादा धोड़े होयसे, आप देजो; आरू हुयो धोड़ेन सोगायतो ओका पोर होक कोरसे। यो इसराएलि समाज मा नियाव-सिंद्धांत नू संविधि होयसे; यी हाव-योहोवा न मूसा क हुकूम आप्यो।
मूसान जागा पर यहोशु
(व्यवस्थाविवरण 31:1-8)
योहोवा न मूसा सी कव्यो, एना अबारीम बोयड़ा पोर चोहोड़, आरू उना देश क देख ज हाव इसराएलियो क आपलो छे। जब तू ओक देख लिस तब आपना भाइ हारुन क जसो आपना मोरला डाहडा मा जाईन मिळ जाईस; काहकी तुमू दुयू न सीनाय क निर्जन पोरदेश मा मण्डळी क विवाद क टेमे म्हारा हुकुम क प्रति विद्रोह कोर्या हुता, आरू उना निगा मा मक जळ क धोड़े चुखलो सिद्ध नी कर्या हुता। (यो कादेश क मरीबा नावोन जळ सीन क निर्जन पोरदेश मा छे।)
मूसा योहोवा सी कव्यो, पोरबू, सब जीवोन आत्मा क परमेश्वर , तू इसराएली मंडळी क उपोर कोय अदमी क नेवाड़ दे। ताकी हुयो ओक आवने आरू जाने मा ओक वाट देखाड़ कोर सोके, आरू योहोवान मोडळी ओसा गाडरा क जसी नी हय जेरे कुकय गुवाळ्यो नी होतो! योहोवा न मूसा सी कव्यो, तू नुन क पुर्य यहोशु क, जेरेम आत्मान प्रेरणा छे, ले, आरू ओका पोर आपनो हाथ राख। ओळतेन ओक पुजारा एलीआजर एने आखी मोडळी ओगळ उबो करजी आरू ओक ओका डुळा अगळ आपनो हकदार नेवाड़ कोरजी। तू ओक आपसो काहिन सत्ता वी आपजी, जेरेसी सब इसराएली मण्डळी ओका कायदान पाळन करे। हुयो पुजारा एलीआजर क अगळ उबो हुयसे, ज योहोवा न अगळ ऊरीम क हुकुम पुछिया करे। ओका हुकूम क ओनसारे आखी मण्डळी, आखा इसराएली लोगहन ओका वाट देखाड़ने मा बाहर जासे आरू हेको कयने सी पछो बी आया करे।
मूसा तसोज कर्यो , जसो योहोवा न उनासी कव्यो हुतो। हुयो यहोशु क लिदो आरू ओक पुजारा एलीआजर एने आखी मंडळी क अगळ उबो कोर्यो। ओळतेन ओका पोर हात राख्यो आरू ओक आपनो हकदार नेवाड़्यो , जसो पोरबु न मूसाक हुकूम आप्यो हुतो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.