गिनती 28

दाहड़ीन भेंट

(नीरगमन 29:38-46)

1योहोवा मूसा सी कव्यो, 2तू इसराएली समाज क यो हूकूम आपजी, उनासी कोहजी, तूमू म्हारो चड़ावो, आगठा मा अर्पित म्हारो आहार, म्हारा सुखद सुगन्ध टाकला टेम पोर चोड़ावनेन फम राखजो। 3तू उना सी यो वी कोहजी, यो आगठा मा अर्पित चड़ावो छे, ज तुमक योहोवा क चोड़ावसू : एक-एक सालन दुय आरेगला गाडरा दाहड़ी आगठा-बली क रूम मा चोड़ावजो। 4तूम एक मेमनो सोंदारे चोड़ावजो, आरू दूसरो मेमनो सांती टेमे चोड़ावजो। 5एरे सिवा पेर कर निकावला दुय लिटर तेल-भेसकायलो एक किलो मैदा अन्न-बलि अर्पित कोरजो। 6यो निरन्तर आगठान-बलि छे, जेक सीनाय बोयड़ा पोर सुखद गोंदायन्यो क लिय मक-पोरबु क लिय आगठा मा अर्पित बलि क रूप मा छाचिन कोर्यो गुयो हुतो। 7ओक पेय-बलि मा हरीक मेमना क साथ दुय लिटर अंगूर क रस होयसे। तुमू मक-पोरबु क अंगूर क रस पेय-बलि चुखला जागा मा चोड़ावजो। 8तुमू दुसरा मेमनो सांतो टेमे चोड़ावजो। सोंदारे चोड़वला ओन-बलि क जसा, ओक पेय-बलि क जसा सुखद गोंदायने क लिय मक-पोरबु क लिय आगठा मा घण वारू घंधाने वाळो बलि क रूप मा ओका चोड़ावजो।

आरामन दाहड़ान भेंट

9तूमू आराम दाहड़े पोर एक-एक सालन दुय आरेगलो गाडरान पिला, आरू अनाज क लिय तेल-भेसकलो दशवा वाटान वारलो पीठो, आरू ओक पेय-बलि चोड़ावजो। 10यो निरन्तर आगठान-बलि एने ओका पेय-बली क सिवा होरिक आरामोन दाहड़े क आगठान-बलि छे।

हर मयनान भेंट

11तुमू होरिक मयनेन पेहले दाहड़े मक-पोरबुक लिय यो आगठान-बलि चोड़ावजो : दुय वाछड़ा, एक मेढा, एक-एक सालोन सात निष्कलंक मेमना। 12होरीक वाछड़ा क साथ ओन-बलि क लिय तेल-भेसकायलो अढाई किलो मैदा; मेढा क साथ ओन-बलि क लिय तेल-भेसकायलो दुय किलो मैदा, 13आरू होरीक मेमना क साथ ओन-बलि क रूप मा तेल-भेसकायलो एक किलो मैदा। ओक सुखद गोंदायन्यो ओन-बलि क लिय पोरबू क लिय आगठा मा अर्पित बलि क रूप मा चोड़ावजो। 14एरे साथ चढ़ाई जाने-वाळा पेय-बलि एने रीते छे : होरीक वाछड़ा क साथ साढ़े तीन लीटर अंगूर क रस; मेढे क साथ अढाई लिटर अंगूर क रस, आरू होरिक मेमना क साथ दुय लिटर अंगुर क रस। ये मयनान आगठान बलि छे, होर साल क होरीक मोहना क लिय छे। 15पोरबू क लिय पाप-बलि मा एक बकरो वी चडावजो।यो निरन्तर आगठान-बलि एने ओक पेय-बलि क सिवा चोड़ायो जासे।

फसहन तिहवारन भेंट

(लैव्यव्यवस्था 23:5-14)

16पहेला मयनान‍ चौदवे दाहड़े पोरबू न पास्का (फसह) पर्व छे। 17एने मयनेन क पोंद्रवे दाहड़े यात्रा-पर्व छे। सात दाहड़ा लगुन बेखमीर रूटा खासे। 18पेहले दाहड़े चुखली सभा हुया करे, आरू उना दाहड़े काहय बी काम नी करनो; 19हेका मा तुमू योहोवान करता हवन मतलब होमबलि मा यो चहढ़ावजो : दुय बछड़ा। एक गाडरा आरू एक-एक सालोन मेमना। धियान देजो की ये विन गुणाळो होय। 20तूमू ओका साथ चोड़ावने वाला आगठान-बलि मा होरीक वाछड़ा क साथ अढाई किलो, मेढ़े क साथ दुय किलो। 21आरू हरएक मेमना क साथे एक किलो तेल-भेसकायलो मैदो चोड़ावजो। 22आपना प्रायश्चित्त क लिय पाप-बलि मा एक बकरो वी चोड़ावजो। 23तुमू सोंदारे आगठान-बलि क अतिरिक्त ज निरन्तर आगठान-बलि छे, ओक चोड़ावजो। 24तूमू सात दाहड़ा लगुन एने रीते सी होर दाहड़े पोरबू क लिय सुखद गोंदायन्यो, आगठा मा अर्पित आहार चोड़ावजो। यो निरन्तर आगठान-बलि एने ओक पेय-बलि क अतिरिक्त चोड़ायो जासे। 25तूमू सातवे दाहड़े चुखली सभा हय ओक दाहड़े काई वी भातिन वातड़ो काम झुनी कोरजू।

काटनेन तिहवारन भेंट

(लैव्यव्यवस्था 23:15-22)

26पेहला फसल क दाहड़े, जब तुमू सात-सापता पर्व पोर योहोवा क नोवला ओन क ओन-बलि चोड़ावसे, तब पवित्र समारोह मनावजू। उना दाहड़े काई भातीन क वातड़ो काम झुण करता; 27पुन मक-पोरबू क यी आगठान-बलि, वारू गोंदायन्यो रये: दुय वाछड़ा, एक मेढो आरू एक-एक सालोन सात मेमना। 28तुमू ओका सात चोड़ाय जावेवाळी ओन-बलि मा होरिक बछड़ा क साथ तीसरो वाटो एपान, गाडरा क साथ दुय वाटो 29ऐ हरएक मेमना क साथ एपान दसवो वाटान मेयदो दो चोड़ावजो। 30आरू एक बकड़ो बी चहढ़ावजो जिना सी तुमरे वाटे पछतावो हुये। 31ये सब विन गुणाळा रये, आरू जलोम होमबलि आरू हेका अनाज भेंट आरू पिनेन भेंट सात हेको बी चहढ़ावजो।