Dhankavi Bible
गिनती 29
नवला सालन तिहवारन बलिदान
(लैव्यव्यवस्था 23:23-25)
तूमू सातवा मयनान पेहले दाहड़े तुमरी चुखली सभा हुये। तूमू काहने वी भातीन क वातड़ो काम झुणी कोरजू। यो तुमरे लिय भीरा फूंकने क दाहड़ो छे। तूमू योहोवा क यो आगठान-बलि, सुखद सुगन्ध अर्पित कोरजो: एक वाछड़ान, एक मेढ़ो आरू एक-एक सालोन सात निष्कलंक मेमना। आरू हेनको अनाज भेंट तेल सी भेसकायलो वारला पीठान हय, बलि मा वाछड़ान क साथ अढ़ाई किलो, मेढ़े क साथ दुय किलो एने हरएक मेमना क साथ एक किलो तेल-भेसकायलो मैदो चोड़ावजो। आपना पोसतावान क लिय पाप-बलि मा एक बकड़ो वी चोड़ावजो। तूमू नव चन्द्र क आगठान-बलि एने ओकी ओन-बलि, निरन्तर आगठान-बलि आरू ओकी ओन-बलि एने एनू सब पेय-बलि हुकूम ओनसारे अर्पित करने क अतिरिक्त, ओक वी वारू गोंदायन्यो, योहोवान क आगठा मा अर्पित बलि क रूप मा चोड़ावो।
पछतावान दाहड़ान बलिदान
(लैव्यव्यवस्था 16; 23:26-32)
तूमू एना सातवा मयनान दोसवे दाहड़े एक चुखली सभा करजो। उना दाहड़े तुमू आपसा क उपासन लारे दु:खी कोरजो, आरू काई वी भातीन क वातड़ो काम झुनी कोरजू; पुन तूमू पोरबू क यी आगठान-बलि , सुखद गोंदायन्यो अर्पित कोरजो: एक बछड़ो, एक गाडरा, एक-एक सालोन सात मेमना। ये सब निष्कलंक होय। तूमु ओका साथ चोड़ावने वाळी ओन बलि मा: वाछड़ा क साथ अढ़ाई किलो, वारला पीठान क साथ दुय किलो एने हरएक मेमना क साथ एक वारलो आटो चोड़ानो। पाप-बलि क लिय एक बकड़ो वी चोड़ावजो। यो पोसतावा क पापबलि निरन्तर आगठान-बलि आरू ओका ओन-बलि एने सब पेय-बलि क अतिरिक्त, चोढ़ायो जासे।
झपड़ियान तिहवारन बलिदान
(लैव्यव्यवस्था 23:33-44)
तुमू सातवा मयनान पोन्दरवे दाहड़े चुखलो तिहवार वाळजो। उन दाहड़े कोय वी भातीन काम झूणी कोरता। तुमू सात दाहड़ा लगुन पोरबू क लिय तिहवार वाळिया करजो। तुमू पोरबू क ये आगठा-न-बलि,आगठा मा अर्पित सुखद गोंदायन्यो चोड़ावजू : तेरे बछड़ा, दुय गाडरा आरू एक-एक सालोन चोवदे मेमना। ये निष्कलंक होय। तुमू ओका सात चोड़ावने वाळी ओन-बलि मा: हरएक वाछड़ा क सात अढ़ाई किलो, हरएक मेढ़े क साथ दुय किलो, आरू हरएक मेमना क साथ एक किलो तेल-भेसकायलो मैदो, एने पाप-बलि क लिय एक बकरो वी चोड़ावजो। यो निरन्तर आगठान-बलि, हेकी ओननबलि एने पेय-बलि क अतिरिक्त, चोड़ायो जासे।
दिसरे दाहड़े बारा बछड़ा , दुय गाडरा आरू एक-एक सालोन चोवदे निष्कलंक मेमना चोड़ावजो। एरे अतिरिक्त बछड़ा, गाडरा आरू मेमना क साथ, ओकी संख्या क ओनसारे, ओन-बलि आरू पेय-बलि हेका नियमन लारे चोड़ावजो। पाप-बलि क लिय एक बकरो वि चोड़ावजो। यो निरन्तर ओन-बलि, ओकी ओन-बलि आरू पेय-बलि क अतिरिक्त, चोड़ायो जासे।
तीसरे दाहड़े ग्यारे बछड़ा , दुय गाडरा आरू एक-एक सालोन चोवदे निष्कलंक मेमना चोड़ावजू। एरे अतिरिक्त बछड़ा, गाडरा आरू मेमना क साथ, ओन-बलि आरू पेय-बलिओकी संख्या लारे आरू नियमन लारे हुकूम नू ओनसारे चोड़ावजो। पाप-बलि क लिय एक बकरो वी चड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त , चोड़ायो जासे।
चोवथे दाहड़े दस बछड़ा, दुय गाडरा आरू एक-एक सालोन चोवदे विन गुणाळा मेमना चोड़ावजो। एरे अतिरिक्त बछड़ा , गाडरा आरू मेमना क साथ, ओकी संख्या क अनुरूप हुकूम नू ओनसारे, ओन-बलि आरू पेय-बलि चोड़ावजो। पाप-बलि क लिय एक बकरो वी चोड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त , चोड़ायो जासे।
पांचवे दाहड़े नोव बछड़ा, दुय गाडरा आरू एक-एक सालोन चोवदे निष्कलंक मेमना चोड़ावजू। एरे अतिरिक्त बछड़ा, गाडरा आरू मेमना क साथ, ओकी संख्या हुकूम नू ओनसारे, ओन-बलि आरू पेय-बलि चोड़ावजो। पाप-बलि क लिय एक बकरो वी चोड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त, चोड़ायो जासे।
छटवे दाहड़े आठ बछड़ा, दुय गाडरा आरू एक-एक सालोन चोवदे निष्कलंक मेमना चोड़ावजू। एरे अतिरिक्त बछड़ा, गाडरा आरू मेमना क साथ ओकी संख्या अनुरूप हुकूम नू लारे, ओन-बलि आरू पेय-बलि चोड़ावजो। पाप-बलि क लिय एक बकरो वी चोड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त, चोड़ायो जासे।
सातवे दाहड़े सात बछड़ा, दुय गाडरा आरू एक-एक सालोन चोवदे निष्कलंक मेमना चोड़ावजू। एरे अतिरिक्त बछड़ा, गाडरा आरू मेमना क साथ ओकी संख्या अनुरूप हुकूम नू लारे, ओन-बलि आरू पेय-बलि चोड़ावजो। पाप-बलि क लिय एक बकरो वी चोड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त, चोड़ायो जासे।
आठवे दाहड़े एक मोटो धर्मसमारोह आयोजित होयसे। तूमू उन दाहड़े काई वी भातीन क काठी मेनतन काम झुणी करता; पुन मक-पोरबू क ये आगठान-बलि, आगठा मा अर्पित सुखद गोंदायन्यो चोड़ावजो : एक वाछड़ा, एक मेढ़ो आरू एक-एक सालोन सात विन गुणाळा मेमना। एरे अतिरिक्त बछड़ा, गाडरा आरू मेमना क साथ ओकी संख्या अनुरूप हुकूम नू लारे, ओन-बलि आरू पेय-बलि चोड़ावजो। पाप-बलि क लिय एक बकरो वी चोड़ावजो। यो निरन्तर आगठान-बलि, ओकी ओन-बलि आरू पेय-बलि क अतिरिक्त, चोड़ायो जासे।
आपनी मानता आरू आपनी मोरजीन बलियो क सात, आपसा आपसा टाकला टेम मा आपनी आगठान-बलि, ओननबलि आरू सहभागिता पेयबलि चोड़ावो योहोवा क चोड़ावजो।
जे कायदा पोरबू न मूसा क आप्यो हुतो, हये सब मूसा न इसराएली समाज सी कय देदो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.