Dhankavi Bible
गिनती 30
मन्नत माननेन कायदो
मूसा इसराएली कुळन खास अदेमड़ान सी कय, योहोवा यो हुकुम अपलो छे;
कोदी कोय मानुस योहोवान कोरता मानता छे, एने शपथ खाईन व्रत लेतो छे। ती हुयो आपना बुल भोंग नी कोरसे; पुन आपना मुय सी निकळे होरिक बुल क ओनसारे काम कोरसे। काहमाइन बायोर आपनी किशोरावस्था मा, आपना बासोन घोर मा रोहते पोरबुन मानता माने एने व्रत लेये, आरू ओक बास ओकी मानता क, आरू लिदा गोया व्रत क सोमळे, पुन ओका सी काय नी कोहे त, ती आखी मानता आरू लिदा गुया आखी मानता नू पाळन कोरनो पोड़से। पुन जेने दाहड़े ओक बास ओना बाराम सोमळे, पुन त्यो उना दाहड़े ओक विरोध कोरे, ती उनी बायोर क सब मानता आरू लिदा गुया सब व्रतो क पाळन कोरनो ओल्लो नी रोहसे। पोरबू ओक सोमा कोरसे; काहकी ओक बास न ओकी मानता आरू व्रत क विरोध कोर्यो हुतो। कदाम त्या ईयाव करली हय आरू मानता माने, या बिना सोच विचार करीन असो काहय कये जिना सी बांधवाय मा पड़े। आरू ओक धेनी ओकी मानता आरू व्रत क सोमऴे पुन जिने दाहड़े त्यो सोमळ्यो, उनह दाहड़े त्यो उना सी काई नी कोहे, ती सब मानता आरू लिदा गुया सब व्रतो नू पाळन ओल्लो होयसे। पुन जिन दाहड़े ओक धेनी ओका वाराम मा सोमळ्यो छे, काहमाइन त्यो उना दाहड़े ओक छुट नि आपतो ती त्यो ओकी मानता एने विगुर विचार कोर लिय गुयो व्रत क रुक देये। पोरबु ओक सोमा कोरसे।
कोय विधवा एने परित्यक्ता बायोर क लिय ओकी आखी मानता आरू व्रतो क पालन ओल्लो होयसे।
पुन कोय बायोर आपना धेनी क घोर मा मानता माने छे एने शपथ खाईन व्रत लेये छे, आरू ओक धेनी ओक सोमलीन वी काय नी कोहे, ओक विरोध नी कोरे, ती ओक लिय सब मानता आरू लिदा गुया व्रतो क पाळन ओल्लो होयसे। पुन जिन दाहड़े ओक धेनी ओक वाराम सोमळे, पुन त्यो उन दाहड़े ओक आखो खोतोम कोर देये, ती मानता एने व्रत क वाराम ओक मुय सी निकळ्या बुलो क पाळन ओल्लो नी होयसे। ओक धेनी न उना खोतोम कोर दिदो छे; अत: पोरबु ओक सोमा कोरसे।
होरेक मानता एने स्वयं क उपास क लारे पीड़ित कोरने क होरीक बंधनकारी शपथ क समर्थन ओक धेनी कोर सोकतो छे आरू हुयो ओक खोतोम वी कोर सोके। पुन ओक धेनी ओगला दाहड़ा मा उनासी काई नी कोहतो छे, ती हुयो ओक मानता एने लिया गोया व्रत क समर्थन कोरे छे। जिने दाहड़े ओक धेनी ओक वाराम सोमळ्यो हुतो, उन दाहड़े उनासी काई नी कयो; ओतरा कोरीन उना उका समर्थन कोर्यो। पुन हुयो सोमळ्ने क वाद उको पुरे रीते खोतोम कोरे छे, ती हुयो आपनी घोरवाळी क ओधोरोम नू भार स्वयं लि लेसे। घरवाळा आरू पत्नी क आपसा सम्बन्ध क वाराम, बास आरू ओकी किशोरी पुराय क आपसा सम्बन्ध क वाराम , ज ओक घोर मा रोहे छे यी संविधिया छे, जेरो हुकुम पोरबु न मूसा क आप्यो हुतो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.