गिनती 31

मिद्यानियों सी बोदलो लेनो

1योहोवा मूसा सी कयो, 2तू मिद्यानियो सी इसराएली सोमाज नू पुरो-पुरो बोदलो लिये। एरे वाद तू आपना मोरला डाहडा मा जाईन मिळ जाईस। 3मूसा इसराएली मानसी सी कव्यो , तुम्हू आपना मा सी काहीन मानसोक युद्ध कोरने लिय सशस्त्र कोरू , जिनासी त्या मिद्यानियों सी पोरबून बोदलो लेये। 4होरेक इसराएली कुळ मा सी एक-एक हजार मानुस लोड़ाय कोरने लिय मुकल्या जासे।

5ओस कोरीन इसराएल नू दिसरा कुळो मा सी बारे होजार, होरेक कुळ मा सी एक हजार, लोड़ाय लिय सशस्त्र मानुस मूसाक आप दिदा। 6मूसा होरेक कुळोन इन्हु हजार-हजार मानसो नु युद्ध कोरने भेज दिदो। आरू पुजारो एलीआजर नू पुर्य पीनहास हुतो। उना साथ मा चुखला-जागान पात्र आरू पिड़ान खोबोर आपने लिय तुरहियाँ हुती।

7जो हुकुम योहोवा भगवान मूसाक आपलो हुतो, ओका़ अनसारे त्या मिद्यानी लोगहन सी लड़ाय करीन सब ओदेमड़ान को म्हार न्हाकीया। 8आरू दिसरा खेरवालान को त्या एवी, रेकेम, सूर, हूर, आरू रेबा नावन मिद्यानी राजा हुता त्या बोरन पोर्या बिलाम को बी म्हार न्हाकीया। 9आरू इसराएलीया मिद्यानी बायरान को आरू पोर्या पारीन को पशु बन्दी बनाय लीदा। 10आरू हेनका रयनेन सब जागा, आरू सब छावनिया को धपाड़ दीदा; 11तव त्या, काय मनुस काय जनवार, सब बनदिया आरू सारा लुट-पाट को लीन 12यरीहोन पास वाळी यरदन नदीन काठा, मोआबन अराबा मा, छावनीन साते, मूसा आरू एलीआजर याजक आरू इसराएलीयान मण्डळीन क पास मा आया।

सिपायड़ान पछो आवनो

13तव मूसा आरू एलीआजर याजक आरू मण्डळीन सब डाहडा छावनीन बाहर हेनको सुवागत करने निकळीया। 14मूसा सिपायड़ा-ओदाकार्या पोर, हतियारन डाहला आरू सेनान अगळवानिया पोर नाराज हुयो ज लोड़ाय-अभियान सी पोछा आया हुता। 15मूसा न उना सी कव्यो, काय तुमन सब बायोर नको जिवतला छुड़ दिदा छे? 16देखू, बिलामन मरजी सी पोर न वारा मा यात् बायरा विरुद विश्वासघात कोरड़ियो हुतो एकालिय पोरबु इस्राएलियान मोडळी मा मोटी पीड़ा हुतलि। 17अब एन्हु पोर्याम ज पुर्या छे, उना आरू उन सब बायोर क, ज मानसो क सात छिनाळो करली छे, मार देवू। 18पुन जिना पोराई न मानसो क सात सवसार नी कोर्या छे, उना आपने लिए जिवतला रोहने देवू। 19तुमू सात दाहड़ा लोगुन पोड़ाव क बाहर रोहू। दुश्मोल क मारनेवाळो एने मोरला क छिमने क सब मानसे, आरू तुमरा बोन्दी तीसरे आरू सातवे दाहड़े आपना क चुखो कोरसे। 20तुम सब छिंदरा, आरू चामड़ान बनी सब चिजोन क, आरू बकड़ीन झटा सी आरू लाकड़ान बनावली सब चिजन क चुखो कोरनो।

21पुजारो एलीआजर न लोड़ाय मा गोया हुया सैनिक सी कव्यो। यी सासतुर क संविधि छे जेरो हुकुम पोरबू न मूसा क आप्यो छे: 22तुमू निस्तो सोनो, चांदी। पितळ, लुहड़ो, पातरो आरू सीसो, 23आनी तुम उन धातुन-चिजो क आग्ठा मा नाखू, ज ओकामा रुखड़ो नी होवे। असो करीन त्या चुखो होयसे। ओळी वी वीटोळ क जळ सी चुखो कोर्यो जासे। पुन ज चिज आग्ठा मा धोप जाय, उन तुमु जळ मा डुबाड़जो।

24तुम सातवा दाहड़ा आपना पुतल्या धुवजो। ती तुमू चुखा होवसो। ओक वाद तुमु पड़ाव मा भोराय सकसो।

लुटन क वाटनो

25पोरबू न मुसा सी कव्यो, 26तू, पुजारो एलीआजर आरू इसराएली मोडळी क परिवार क डाहला क सात लुट्या माल आरू लोड़ाय मा धोरायला केदड़ा आरू ढुरो क गिननो 27लुट क माल क दुय वाटा कोरनो। ओळतेन एक-एक वाटो मोडळीन आरू उना योद्धा मा वाटनो ज लोड़ाय मा भेसकायला हुया हुता। 28तु मक-पोरबुन भेट क लिय उना सिपायड़ा सी, ज लोड़ाय अभियान मा गुया हुता, प्रति पांच सौ केदड़ा, बुईल, गोदड़ा, आरू गाडरा पोछोळ एक एक जिव ओलोग मेक दिदा। 29पाँच सौवन पछळ एक एक क फाळो जानीन ली ले; आरू योहोवा न भेंट करीन एलीआजर पुजाराक दि देय। 30तू इसराएलियान आदा मा रयीन, काय बुईल, गोदड़ा आरू गाडरा, काय काहली भांतीन पशु हय, पचासन पछळ एक क लीन योहोवान निवास न राखवाळी करने वाळा लेवीयान क आप देय। 31जोसी पोरबु न मूसा क हुकुम आप्यो हुतो, उना क ओनसारे मूसा आरू पुजारो एलीआजर न कोर्यो। 32ज चिज सिपायड़ा न लुट मा सी लिदा हुता, उना ओलोग धोराया गुया ढुरो आरू मानसो क संख्या ओसी हुती: छव पचहत्तर होजार गाडरा- बकड़ा, 33बहत्तर हजार गाय-बुईल, 34इकसठ होजार गोदड़ा, 35आरू मानसो मा सी मिलाळिन बत्तीस होजर पुराय वि हुती, जिनु कोदी मानुस क सात सहवास नी कोरी हुती।

36ज सिपायड़ा लोड़ाय मा गोया हुता, उना आधा वाटा मा ढुरो आरू मानसो क यी संख्या हुती: तीन लाख सैतीस हजार पांच सौ गाडरा। 37इनु मा सीछ: सौ पचहत्तर गाडरा बकड़ा योहोवान फाळो हुता। 38छत्तीस होजार गाय-बुईल हुता, जिनामा सी पोरबु क भेट क लिय बहत्तर गाय-बुईल हुता। 39तीस होजार पांच सौ गोदड़ा हुता, जिनामा सी पोरबू क भेट क लिय इकसठ गोदड़ा हुता। 40सोलह होजार पुरायटा, जिनामा सी पोरबुन भेट क लिय बत्तीस लोगहन हुता। 41मूसा न योहोवा क लिय अलग करली भेंट एलीआजर पुजाराक आपीयो, जसो हुकुम योहोवा न मूसा क आप्यो हुतो।

42इसराएली मण्डली नसो क आदो वाटो हुतो, ज मूसा न सिपायड़ा क वाटो सी ओलोग कोर्यो हुतो: 43इसराएलीन मोण्डळीन तीन लाख सैतिस होजार पाच सौ गाडरा हुता। 44छत्तीस होजार गाय-बुईल, 45आरू तीस होजार पांच सौ गोदड़ा हुता। 46उनामा सोलह होजार लोगहन हुता। 47इनू आदा माईन, योहोवा न हुकुमम मूसा न इसराएली मानसो क आदो वाटो मा सी प्रती पचास मानसो आरूउ ढुरो मा सी एक-एक क निकाळ लिदा, आरू उना पोरबू क रोहन्या-जागा क निवास जागान राखवालियो लेवीयो क दि देदा, जसो पोरबु न मूसा क हुकुम आप्यो हुतो।

48तब सिपायड़न आधिकारी, सहस्त्र-नायक आरू शत-नायक, मूसा क पास आव्या। 49त्या मूसा सी कयो, जो सिपायड़ा हामरे हक मा हुता थारा दासे गिनती करीया, आरू हेनू मा सी एक बी नी घटीयो। 50ज सोनो क गोहनो हामु क मिळ्यो छे, बाजूबन, कड़ा, मुंद्या, बालियाँ आरू हार, उना हामूपोरबु क ओगळ आपना पछतावो हेतु पोरबु-अर्पित चोड़ावो चोड़ावने क लिय लाया छे। 51मूसा आरू पुजारो एलीआजर न उनासी यो सोनो एने सब गोहना ग्रहण कोर्यो। 52यो भेट क सोनो ज हतियार वाळी सेनान-नायको आरू शत-नायको न पोरबू क चोड़ायो हुतो, सुळे हजार साढी सात सौव शेकेल1 हुतो।

53प्रयतेक सिपायड़ा न आपना-आपना लुटोन माल ली लिदो हुतो। 54पुन मूसा आरू पुजारो एलीआजर न सहस्र–नायको आरू शत-नायको सी सोनो ग्रहण कोर्यो, आरू त्या ओक लिन मिलन-शिविर मा आया की हुये पोरबु क ओगळ इसराएलि समाज क लिय फोमोन-सोहलानी बोने, आरू इसराएली क राखवाळी कोरे।