गिनती 32

ढाई कुळ क यरदन क एने धोड़े वोस जानो

(व्यवस्थाविवरण 3:12-22)

1रुबेन आरू गाद कुळन लोगहन क पास घोना सोवटा ढुरे हुता। जव त्या याजेर आरू गिलाद देश क देखीन विचार करीया, कि त्यो पशुन कामको देश छे, 2अत: गाद आरू रुबेन नू वंशज आव्या। उना मूसा, पुजारो एलीआजर आरू इसराएली मोडळीन ओगोळवान्या सी कव्यो, 3अतारोत, दीबोन , याजेर, निम्रा, हेश्बोन, एलाले, सबाम, नबो आरू बोन नू 4एनी जागा-वाटो, जिनाक रोहनेवाऴा पोरबून इसराएली मोडळीन ओगळ पराजित कोर्या हुता, ढुरोन क चारने सारको छे। हामू, तुमरा चाकर्यान पास ढुरे छे। 5उना ओगा कव्या, काहमाइन हामरे पोर तारी गिनोन निगाह होय ती यी जागा–वाटू हामू, तारा चाखर्याक, बासोन होकन लिय आप्यो जाय, हामू यरदन नदीन उन पार नी लीजा।

6मूसा गाद आरू रुबेनन ओवलियाद सी कव्यो, तुमरा भाई-सोगा ते युद्ध मा जासे आरू तुमू यां आराम सी बोस रोहसू? 7ज देश पोरबून इसराएलियोक आप्यो छे, होंया जाने सी काळजाक निरास काहा कोरता होय? 8जब हामू तुमरा बाब-दादाक कादेशबर्ने सी इना देशक देखने लिय मुकल्यो हुतो, तोत्यार उना वि ओसोत कोर्यो हुतो। 9उना एश्कोल घाटी पोर चढ़े आरू इना देश को देख्यो। बाखुन जिना देश पोरबून इसराएलियोक आप्यो छे, होंया जाने सी ओक काळ्जाक हुयो निरास कोर्यो हुतो। 10एकालिय उनाह दाहड़े पोरबुन रिस भोड़की उठ्यो आरू उन शपथ खादो, 11ज मानुस मिस्र देश सी निकळ आया छे, हेरेम वीस सालन एने इनासी जादा उमोर मानुस उना देशक नी देख सोकसो, जिना आपनेन वायदो मे अब्राहम, इसहाक आरू याकुब सी खादो हुतो; काहकी त्या म्हारे पछळ पुरान पुरा नी चालीया। 12केवल कनजी योपुन्ने नू पुर्य कालेब आरू नुन नू पुर्य यहोशु ओक देखसे; काहकी हुयो म्हारो, आपसा पोरबून, अनुसरण पुरो कोर्यो छे। 13पोरबुन रीस इसराएल नी प्रति भोड़की उठ्यो हुतो। जोत्यार लोगुन उन पीढ़ी नाश नी होय गोय, जो पोरबुन निगाह मा भुंडो काम कोर्यो हुतो, ती लोगुन, चाळिस साल लोगुन उना निर्जन पोरदेश मा भोटकतो रयो। 14हेमी तुमू, ज पापियोन ओवलियाद होय, इसराएल क प्रति पोरबुन रिस आरू जादा भड़काने क लिय आपना बाप-दादान जागा पोर उठ उबो हुयो होय। 15पुन तुमू पोरबुन अनुसरण कोरनो छुड़ देसू, ती उन इसराएलन निर्जन पोरदेश मा पोछो छुड़ देसे। ओस कोरिन तुमू उन सब मानसोक नाश कोरावसू।

16ती उन मूसान धोड़े आव्या, आरू कव्या, हामु याँ हामरा गाडरा-बुकड़ा क लिय ढुरोनवाड़ो आरू हामरा पुर्यान लिय नगरोन निर्माण कोरसु। 17पुन जोत्यार लोगुन हामू हामरा इसराएली भाई-सोगा उना जागा नी जासे, तोत्यार लोगुन हामू हामूत होतीयार चुटिन उन ओगळ ओगळ ओगवाय कोरसु। इना देशन रोहनेवाळान कारन हामरा पुर्या किलाबन्द नगरो मा रोहसे। 18जब लोगुन इसराएली सोमाजोन एक एक मानुसन पोर बासोन होक नी होय जासे, ती लोगुन हामू हामरा घोर नी जासु। 19हामू ओका सात यरदन नोदीन दिसरे धोड़े पोर एन उना पारन जागा पोर बासोन होक नी कोरसु; काहकी हामू इने धोड़े, यर्रनन उगेवने ओख्ये मा बासोन होक मा जागा प्राप्त होयली छे।

20मूसा उना सी कव्यो, काहमाइन तुमू आपना बुलोन ओनसारे काम कोरसु, पुन तुमू युद्ध लिय पोरबून चां ओगळ ओगळ जाने लिय होतियार चुटसू 21आरू तुमहारो एक एक होतीयार मानुस पोरबून चा यरदन नोदीन पोल धोड़े जासे, आरू तोत्यार लोगुन नी पोछा आवसू जब लोगुन पोरबू हामरे होरेक दुसमोल क हामरे ओगळ सी नी भगाय देये 22आरू देश पोरबून ओगळ हामरे होक नी होय जाय; तोत्यारुत तुमू पोरबू एने इसराएल क प्रति कामोन मुक्त होय जासु, आरू पोरबून ओगळ इना जागा पोर तुम्हारो बासोन होक होयसे। 23पुन कदाम असो झुण करो, ती पोरबुन प्रति पाप कोरसो, एनी वातक जान लेवू, तुम्हारो पाप तुम्हुत हेरिन निकाळसे। 24आपसा पुर्यान लिय नगरो क निर्माण करो, आपना ढुरोन लिय ढुरोनवाड़ो बोनाऊ। बाखुन ज बुल तुम्हारा मुख सी निकळसे, उनाह पुरो करो।

25गाद आरू रुबेनन ओवलियाद मूसा सी कव्या, जसो हुकुम हामरो स्वामी आपसे तोसोंत हामू, हामरा चाखर्या, कोरसे। 26हामरा पुर्या , बायरा, रेवड़ आरू ढुरे याँ गिलादन नगर मा रोहसे। 27पुन हामु, हामरा चाखर्या, युद्ध लिय होतीयार मानसे आपना स्वामीन हुकूमन ओनसारे पोरबुन ओगळ लोड़ने क लिय यर्दन नदीन पोल पार जासु।

28मुसा उना वाराम पुजारो एलीआजर , यहोशु बेन-नुन आरू इसराएली कुळोन परिवारोन डाहलाक हुकुम आप्यो। 29मूसा उना सी कव्यो, काहमाइन गाद आरू रुबेनन ओवलियाद, पोरबून ओगळ लोड़ाईन लिय ओक होरेक होतियार मानसे, हुम्हरे साथ यरदन नोदिन उने पार जासु आरू उना देश तुम्हरा होकम होय जासे, ती तुमू उना बासोन होक जसो गिलाद पोरदेश आप देनो। 30पुन काहमाइन उना तुम्हारे साते होईन उन पार नी जावाये, ती तुम्हरे विच कनान देश मात ओक बासोन जागा-वाटू होयसे।

31गाद आरू रुबेनन ओवलियाद जोपाप दिदा, जसो पोरबू हामरे सी, तुम्हरा चाकर्या सी, कव्यो छे तोसोंत हामू कोरसु। 32हामू होतियार होईन पोरबून ओगळ उन पार, कनान देश मा जासु। पुन आप हामू बासोन जागा यरदन नोदीन इन ओख्येत आपजी। 33अत मूसा गाद आरू रुबेनन ओवलियाद एने यूसुफन पुर्य मनश्शेन आदी ओवलियादक यो देश आरू नगर आप्यो: एमोरी जातिन राजा सीहोनन राज, बाशानन राज ओगन राज, ओकी सीमान्तर्गत जागो आरू नगर एने ओका देश न च्यारू ओख्येन गाँव।

34तोत्यार गादन ओवलियादन दीबोन, अतारोत, अरोएर, 35अट्रोत-शोपान, याजेर, योगबाह, 36बेतनिम्रा आरू बेथारान नावोन किलाबन्द नगरोन निर्माण कोर्यो। उना गाडरा-बुकड़ान लिय ढुरोनवाड़ो वी बोनायो। 37रुबेनन ओवलियादन हेश्बोन, एलाले, किर्यातैम, 38नबो आरू बालमोन सिबमा नगर वोसाड़्या। जिना नगरन हुये निर्माण कोर्या, उना नोवलो नाव पाड़्या।

39मनश्शेन पुर्य माकीरन ओवलियाद गिलाद पोरदेश मा गोया, आरू ओक जीत लिदा। उना एमोरी जातिन, ज होंया रोहती होती, निकाळ दिदा। 40तोत्यार मूसा मनश्शे न पुर्य माकीरन ओवलियाद गिलाद पोरदेश आप दिदो; आरू उनाम रोहने लाग्या। 41मनश्शेन पुर्य याइर गयो, आरू उना ओका गावोक जीत लिदा। हुयो उना हब्बोत-याईर नाव पाड़्या। 42नोबह वी गयो, आरू उना कनात आरू ओका गाव क जीत लिदा। हुयो उना नाव आपना नाव पोर नोबह पाड़्या।