व्यवस्थाविवरण 9

मानसो क हुकुम क नी माननो

1हे इसराएली, सोमोळ,आज तू यरदन पार एकालिय जाने वाळो छे, कि असा देश क जो थार सी मटो आरू सामर्थी छे; आरू असो मटो नगर क जेकी शहरपनाह वादळा सी वात करे, तुमरा हको मा ली लेयो। 2हेरेमा मोटा मोटा आरू नाम्बा-नाम्बा मानसे यानी अनाकवंशी रोहे छे जेरो हाल तू जाने छे, आरू ओका वारम तू न यो सोमळ्यो छे, की अनाकवंशीयों क अगळ कुन थाँग सोके छे? 3एकालिय आज तु यो जान लेवू की ज तारे अगळ भस्म करनेवाळो आगठा क जोसो पार जानेवाळा छे, हुयो तारो परमेश्वर योहोवा छे; आरू हुयो ओको सत्यनाश कोरसे, आरू हुयो ओको तारे अगळ तारा सामने दाब देसी; आरू तु योहोवा क बुल क ओनसारे ओको हेना देश सी निकाळिन तोत्यारूत नष्ट कोर नाखसे।

4जब तारो परमेश्वर योहोवा हेनूक तारे अगळ सी निकाळि चुके ति यो नी सोचजी कि योहोवा तारा धोरोम क कारण तुसे इना देश क होकदारीयो होयने क ली आयो छे, बाकीन हेनु राष्ट्र क दुष्टतात क कारण योहोवा हेनुक तारे अगळ सी निकाळे छे। 5तू जि हेनदरा देश क होकदारीयो होयने क लिय जाय रोयू, एना कारण तारो धोरोम एने मन क सीधाई नी छे; तारो परमेश्वर योहोवा ज हेनू राष्ट्र क तारे अगळ सी निकाळे छे, ओक कारन हेनदरी दुष्टता छे, आरू यो वी की ज बुल हुयो अब्राहम, इसाहक, आरू याकुब, तारा डाहडा क शपथ खावाड़ीन आप्यो हतो, ओको हुयो पुरो कोरने चाहे छे।

6एकालिय यो जान ले की थारी सरलतान कारण सी परमेश्वर योहोवा, जो तुको वारलो देश आप रीयो कि तू हेरो होकदारीयो होये, हेनाक हुयो तारा धरम क कारण नी आप रोयो; काहकी तु ते एक हठीली राष्ट्र छे। 7एनी वात क फोम राख आरू कदी वि झुणी विसरे, की जमगल मा तून काहने-काहने रिते सी आपना परमेश्वर योहोवा क रिस कोर्यो; आरू जेने दाहड़े सी तु मिस्र देश सी निकळ्लो छे जब तक तू एना जागा पर नी पुगे ति लोगुन तुमू योहोवा सी बलवा करता आवला छे। 8ओळतेन होरेब क पास वि तुमू न योहोवा क रिस कोराया, आरू हुयो रिसवाईन तुमु नष्ट कोरने चाहतो हुतो। 9जब हाव हेन वाचान दगड़ा क पाटियाओं जो योहोवा तुमरे साथ मा बांदलो हुतो, हेको लेने करीन बयड़ान क उपर चोहड़् गोयो, ति चाविस दाहड़ा आरू चाविस रात बोयड़ा पोर रोयो; आरू मैन न ती रुटो खादो नी पानि पिदो। 10आरू योहोवा न मासे आपसा त हात क लिखला दोगड़ा क दुयो पाटियाओ क सौंप देदो, आरू हुयो बुल जेनुक योहोवा न बोयड़ा क उपोरागठो क विच मा सी सभा क दाहड़े तुमरे सी कोयो हुतो हुये हेना पोर लिख्यो हुतो। 11आरू चाळिस दाहड़ा आरू चाळीस रात क वित जाने पोर योहोवा न दगड़ान क त्या दुय वाचा क पटियाएँ मेसेक आप देदो। 12आरू योहोवा न मार सी कोयो, उठ, याँ सी झटपट नेचु जा; काहकी तारी प्रजा क मानसे जेनुक तू मिस्र सी निकाळीन ली आवलो छे हुये बिगोड़ गयला छे; जेना वाटो पोर चालनो क हुकुम हाव न हेनुक आप्यो हुतो ओको हुये झटपट छुड़ देदा छे; यानी हुये तोत्यारूत आपने लिय एक मुरति घोड़िण बोनाय लेदा छे।

13ओळतेन योहोवा न मार सी यो वी कोयो, हाव न हेनु मानसो क देख लेदो, हुये हठीली राष्ट्र क मानसे छे; 14एकालिय हेमी मेसे तू मा रुके, ताकी हाव हेनुक नष्ट कोर नाखो, आरू धोरती क उपोर सी ओको नाव एने सोहलानी लौगुन मिटाय णाखो, आरू हाव हेनदरे यो बोड़िन एक मोटि आरू सामर्थी राष्ट्र तार सी पोयदा कोरिस। 15ती हाव उलटा पाय बोयड़ा सी नेचो उतोर चाल्यो, आरू बोयड़ो आगठा सी दहक रोयो हुतो; आरू मारा दुयो हातो मा वाचा क दुयू पटियाएस हुती। 16आरू मैन देख्यो कि तुमू न आपसा परमेश्वर योहोवा क विरूद्ध माहापाप कोर्या; आरू आपने लिय एक केवड्यान मुर्ति ढाळीन बनाय लिदला छे, आरू तोत्यारूत हेना वाट सी जेना पोर चालने क हुकुम योहोवा न तुमु क आप्यो हुतो ओको तुमु न तज देदा। 17ती मैन हेनू दूयू पटियाओम क आपना दुयो हातो सी लीन नाख देदो, आरू तुमरा डुळा क अगळ ओको तुड़ देदो। 18तब तुमरा हेना माहापाप क कारन जेनाक कोरीन तुम न योहोवा क निगाह मा बुराई कोर्या आरू हेनाक रिस देवाड़्या हुता, हाव योहोवा क ओगळ मुयोन भुरसे हित पोड़्यू आरू पेहेल क जोसो, यानी चावीस दाहड़ा आरू चाळीस रात लोगुन न ते रूटा खादू आरू नी पानी लिदो। 19हाव ते योहोवा क हेना कोप आरू जल-जलाहट सी बिहय रोहु होतू, काहकी हुयो तुमरे सी अप्रसन्न होईन तुमरो सत्यनाश करने क हुतो। बाखुन योहोवा न तेने टेमे वि मारी सोमळ्यो। 20आरू योहोवा हारुन सी ओतरो रीसवायो कि हेको बी नाश करने हिण्डतो हुतो; पुन हेने टेमे हाव न हारून क लिय विनता कोर्यो। 21आरू हाव न हुयो केवड़ा जेनाक बोनाविन तुमू पापी होय गोया होता लिन, आगठा मा नाखिन फूक देदो; अरु ओळतेन हेनाक झिनो झिनोकर ओसो चुर चुर कोर देदा हुयो धळा जोसो झिनकी होय गोयो; आरू ओका रुखडा क हेनी नोदि मा नाख देदा जेना बोयड़ा सी निकळिन नेची उहळती हुती।

22“ओळतेन तबेरा, आरू मस्सा, आरू किब्रोतहत्तावाह मा वी तुम न योहोवा क रिस देवाड़िया हुता। 23ओळतेन जब योहोवा न तुम क कादेशबर्ने सी यो कोविन मुकल्या, जाईन हेना देश क जेरा मैन तुमुक आप्या छे होकदारीयो होय जावू, ती वी तुमु न आपसो परमेश्वर योहोवा क हुकुम क विरूद्ध बलवा कोर्यो आरू नी ते ओको विश्वास कोर्यो, आरू नि ओकी वात मान्या। 24जेने दाहड़े सी हाव तुमुक जाने छे तेने दाहड़े सी तुमु योहोवा सी बलवो त कोरत आय रोया।

25“हाव योहोवा क अगळ चाळिस दाहड़ा आरू चाळिस रात मुय क भुरसे पोड़्यो रोयो, काहकी योहोवा न कोय दियो हुतो, की हुयो तुमरो सत्यानाश कोरीस। 26आरू हाव न योहोवा सी यी विनता कोर्यो, हे पोरबु योहोवा, आपना प्रजारूपी निज वाटू, जेनुक तूम आपना महान प्रताप सी छुड़ाय लेदो छे, आरू जेनुक तु न आपना बलवन्त हात सी मिस्र सी निकाळ लायो छे, हेनुक नष्ट नी कोरे। 27आपना दास अब्राहम, इसहाक, आरू याकुब क फोम कोर; आरू एनू मानसो क कठोरता, आरू दुष्टता, आरू पाप पर निगाह नि कोर, 28जेरेसी ओसो नि होये कि हेना देश सी तू हामु क निकाळिन ली आयो छे, होयाँ क मानसे कोहने लागे, की योहोवा हेनुक हेना देश मा जेरा आपने क बुल हेनुक आप्यो हुतो नी पुग सोके, आरू हेनदरे सी बैर वी राखतो हुयो , एरे कारण हुयो जंगल मा निकाळिन मार नाख्यो छे। 29ये मानसे तारी प्रजा आरू निज वाटु छे, जेनुक तु आपना मोटा सामर्थ्य आरू बलवन्त भुजा क लारे निकाळ ली आयो छे।