व्यवस्थाविवरण 10

दोगड़ा क नोवली पटियाएँ

(नीरगमन 34:1-10)

1“तेने टेमो योहोवा न मारसे कोयो , ‘पेहली पटियाओं क जोसो दोगड़ो क दुय आरू पटियाएँ घोड़ लेय, आरू हेनुक लीन मार पास बोयड़ा क उपोर जा, आरू लकड़ा क एक सन्दुक वी बोनाय ले। 2आरू हाव हेनू पटियाओं पोर चोत बुल लिखीस, ज हेनू पेहली पटियाओं पोर होतो, जेनुक तू न तुड़ नाख्यो, आरू तू हेनुक हेना पेटारो मा मेकजी।’ 3ती हांव बाबळ्यान लाकड़ान एक पेटारो बोनायो, आरू पेहली पटियाओं क जोसो दोगड़ा क दुय आरू पटियाओं घोड़्यो ती हेनूक हातो मा लिन बोयड़ा पोर चोहोड़ गोया। 4आरू ज दस बुल योहोवा न सभा क दाहड़े बोयड़ा पर आग्ठा मा सी तुमरे सी कोयो हुतो, हुयोत हुयो पेहला क जोसो हेनू पटियाओं पोर लिखे, आरू हेनुक मेसेक सौंप देदो। 5ती हाव बोयडा सी नेचू उतरी आयु, आरू पटियाओं क मारा बोनावला पेटारा मा मेक दिदो; आरू योहोवा क हुकुम क ओनसारे चोत मेक्यो छे।

6“ती इसराएली याकानियों क कुवा सी कूच कोरिन मोसेरा लोगुन आयो, होंया हारुन मोर गोयो, आरू ओको होंया धुळू आप देदा; आरू ओको पुर्य एलीआजार ओका पोर याजक क काम कोरने लाग्यो। 7हुये होंया सी कूच कोरिन गुदगोदा क, आरू गुदगोदा सी योतबाता क चाल्या, एना देश मा जळ क नोदियाँ छे। 8तेना टेमोमा योहोवा न लेवी गोत्र क एकालिय ओलोग कोर्यो की हुये योहोवा क वाचा क सन्दुक चुट्या कोरे, आरू योहोवा क ओगोळ उबा होईन ओकी चाखरि कोर्या कोरे, आरू ओका नाव सी बोरकोत आप्या कोरे, जोसो कि आज क दाहड़े लोगुन होयतो आय रोयो छे। 9ओस कोरिन लेवीयो क आपसा भास्यो क सात काई निज अंश एने वाटो नि मिळ्यो; योहोवा न ओको निज वाटो छे, जोसो कि तारो परमेश्वर योहोवा न हेनुक कोयो हुतो।)

10“हाव त पर पेहले क जोसो हेना बोयडा पोर चाळीस दाहड़ा आरू चाळिस रात रोयो, आरू तेने टेमे वी योहोवा न मारी सोमळ्यो, आरू तुसे नाश कोरने क मनसा छुड़ देदो। 11ओळतेन योहोवा न मार सी कोयो, उठ, आरू तू इनु मानसो क ओगवाय कोर, ताकी जेना देश क आपने क मैन हेनदरा डाहडा सी वायदो खाइन कोयो हुतो होंया जाईन ओको आपसा होकोम कोर लेये।

परमेश्वर क माँग

12“हेमी, हे इसराएली, तारो परमेश्वर योहोवा तार सी एरे सीवाय आरू काय चाहे छे, की तु आपना परमेश्वर योहोवा क बिक माने, आरू ओका आखा वाटो पर चाले, हेरेसी मोंग राखे, आरू आपना पुरा मन आरू आपना आखा जिवो सी ओकि चाखरी कोरे, 13आरू योहोवा जो जो हुकुम आरू विधी हांव आज तुमुक समळाड़ो, ओक पालन करे, जेरेसी थारो भलो हुये? 14सोमोळ, सोरोग, आरू आखासी उँचा सोरोग वी, आरू कळ आरू ज हेरेम छे, चो सब तारो परमेश्वर योहोवा क त छे; 15ते वी योहोवा न तारा डाहडा सी स्नेह आरू मोंग राख्यो, आरू ओका वाद तुमू मानसो क ज ओकी ओवलियाद छे, सब देशो क विच मा सी नेवाड़ लेदो, जोसो कि आज क दाहड़े प्रकट छे। 16अतरा करीनआपसा आपसा मन क खतनो करो, आरू ओगोळ क हठिळ नी रोहू। 17काहकी तुमरो परमेश्वर योहोवा हुयो ईश्वरो क परमेश्वर आरू प्रभुओं क प्रभु छे, हुयो महान पराक्रमी आरू बिहने योग्य ईश्वर छे, ज कुदा क पक्ष नी कोरे आरू न घूस लेये छे। 18हुयो अनाथो आरू विधवा क नियाव चुकाड़े, आरू पारका सी ओसो मोंग कोरे छे की हेनूक भोजन आरू छिंदरा आपेछे। 19एकालिय तुमू वी पारका सी मोंग राखू; काहकी तुमू वि मिस्र देश मा पारका होता। 20आपना परमेश्वर योहोवा क बिक माननो; ओकीज सेवा कोरजू आरू हेरेसी थाबाइन रोहजू, आरू ओकाज नाव क शपथ खाजो। 21हुयो तुमरी स्तुति क योग्य छे; आरू हुयो तारो परमेश्वर छे, ज तार साथ हुयो मोटा महत्व क आरू मोटमोटा काम कोर्यो छे जेनूक तु न आपनू डुळा सी देख्यो छे। 22तारा डाहडा जब मिस्र मा गोया ती सत्तरूत मानसे हुता; बाखून हेमी तारो परमेश्वर योहोवा न तारी गिनति वादळा क तारा क जोसी घोनी कोर देदो छे।