Dhankavi Bible
व्यवस्थाविवरण 11
प्रभु की महानता
“एकालीय तू आपना परमेश्चवर योहोवा सी बेस मोंग राखजी, आरू ज काइन हुयो तुसे आपलो छे ओको, यानि ओकि विधिया, कायदा, आरू हुकुम क होमेशा पाळन कोरजू। आरू तुमू आज यो विचार सोमझी लेवू काहकी हाव त तुमरा बाळ-बच्चा सी नी कोहतो, जे नी ते काय देख्या आरू नी जान्या छे कि तुमरो परमेश्वर योहोवा न काय काय ताड़ना कोर्यो, आरू कोसी मोहिमा, आरू बलवन्त हात, आरू बोढ़ाई होयी भुजा देखाड़्यो, आरू मिस्र मा होंया क राजा फिरौन क कसो-कसो सोहलानी देखाड़्यो, आरू ओका आखा देश मा कसो-कसो चमत्कार क काम कोर्यो; आरू योहोवा मिस्र क सेना क घुल्ला आरू रथो सी काय कोर्यो, यानी जब हुये तुमरे पोछोळ पोड़ कोर रोया होता ती हुये ओको लाल दोरीया मा डुबाड़ीन कोस को कोरिन नष्ट कोर नाख्यो, की आज लोगुन ओको पोतो नी; आरू तुमरा इना जागा मा पुगने लोगुन हुयो जोगल मा तुमरे सी काय काय कोर्यो; आरू हुयो रुबेनी एलीआब क पुर्य दातान आरू अबीराम सी काय कय कोर्यो; यानी कळी न आपसो मुय पसारके हेनदरा घोराना, आरू डेरा, आरू सब अनुचरो भेळ इसराएलीयो क देखता देखता कोसा नीगळी लेदा; बाखुन योहोवान इना सब मोटामोटा कामो क तुमन आपना डुळा सी देख्या छे।
प्रतिज्ञान देशन आशीषें
“ओस कोरीन जोतरी हुकुम मैं आज तुमुक सोमावाड़ो छे ओको सब क मान्या कोरजू, एकालिय कि तुम सामर्थी होईन हेना देश मा जेरा होकदारीया होयने क लिय तुमु पार जाय रोया होय प्रवेश कोरीन होकदारीया होय जावू, आरू हेना देश मा बेस दाहड़ा रोहने पावू, जेनाक तुमु आरू तुमरा ओवलियाद क आपने क शपथ योहोवा न तुमरा डाहडा सी खादलो हुतो, आरू हेरेमा दूध आरू मधु क धाराएँ उहवे छे। देखु, जेना देश क होकदारीया होयने क तुमू जाय रोया होय हुये मिस्र देश क जोसा नी छे, जाँ सी निकळीन आया होय, जाँ तुमू बीज वेरता हुता आरू निळ्ळा साग क खेत क रीती क ओनसारे आपना पाय सी नाविया बोनाविन सींचता होता; बाखिन जेना देश क होकदारीया होने क तुमु पार जाने पोर होय हुये बोयड़ा आरू तराईयों क देश छे, आरू आकाश क सालन क जळ सी सींचता छे; हुयो ओसो देश छे जेरी तारो परमेश्वर योहोवा क निगाह सुधि रोवती छे। आरू साल क पेहेल सी लीन परमेश्वर योहोवा क नजर हेका पर निरन्तर लागी रोहती छे।
“आरू काहमाइन तुमू मारा हुकुम क ज आज हाव तुमुक सोमवाड़ो धियान सी सोमळीन, आपना आखा मन आरू आखा जिव क सात, आपना परमेश्वर योहोवा सी मोंग राखू आरू ओकी सेवा कोरता रोहू, ती हाव तुमरो देश मा बरसात क आदि आरू नास दुयो टेमो क वर्षो क आपने आपने टेम पोर पाड़िस, जेरेसी तु आपनो ओन, नोवलो दाखमधु, आरू टटक तेल संचय कोर सोकिस। आरू हाव तारा ढुरो क लिय तारा खोयड़ा मा खोड़ो उगाड़िस, आरू तू पेट भोरिन खाईस आरू सन्तुष्ट रोहिस। एकालिय आपना वाराम मा चोकचोया रोहु, ओसो नी होये की तुमरो मोन धोखू खाय, अरु तुमू बहकीन दिसरा देवताओ क पूजा कोरने लागू आरू ओको वांदने लागू, आरू योहोवा क कोकप तुमरे पोर भोड़के आरू हुयो वादळा क सालन बोन्द कोर देये, आरू धोरती आपनी उपज नी आपे आरू तुमू हेना वारला देश मासी ज योहोवा तुमूक आपे छे तोत्यारुत नष्ट होय जावू। एकालिय तुमु मार लिय यो बुल आपना आपसा मोर आरू जिव हाव राखजू आरू सोहलानी क रूप मा आपना हातो पोर बाँदजु आरू हुये तुमरा डुळा क विच मा टीका क काम आपे। आरू तुमु घर मा बोठला वाटो पोर चालता,पोड़ता-उठतो एनी वातो कोरीन आपना पुर्या क सीखाड़्या कोरजू। आरू हेनूक आपना आपसा घोर क चौखट क धोड़े आरू आपना झोपला क उपर लिखजू; एकालिय कि जेना देश क वाराम योहोवा न तारा डाहडा सी शपथ खाईन कयो हुतो, कि हाव हयो तुमुक आपीस, हेरेमा तुमू आरू तुमरा पुर्या दीर्घायू होये, आरू जब तक कळ क उपोर क वादळो बोनलो रोहे ति लोगुन वी बोनलो रोहे। एकालिय काहमाइन तुमु एना सब हुकुम क मानने म ज हाव तुमुक सोमवाड़ो पुरि चौकसी कोरीन आपना परमेश्वर योहोवा सी मोंग राखू, आरू ओका सब वाटो पोर चालु आरू हेरेसी थाबाईन रोहू, ती योहोवा हेनू सब राष्ट्र क तुमरे ओगळ नि निकाळ नाखसै, आरू तुमु आपने सी मोटा आरू सामर्थी राष्ट्र क होकदारीयो होय जासु। जेना-जेना जागा पोर तुमरा पोय क तलवा पोड़े हुये सब तुमरात होय जासे, यानी जंगल सी लोबानोन लोगुन, आरू परात नावोन महानद सी लिन पश्चिम क दोरीया लोगुन तुमरी सीमा होयसे। तुमरे ओगळ कोय नी उबो नी रोह सोकसे, काहकी जोतरा जागा पोर तुमरा पाय पोड़से हेनू सब पोर रोहनेवाळा क मन क तुमरो परमेश्वर योहोवा आपना बुल क ओनसारे तुमरे कारन हेरेमा बिक आरू थरथराहट पोयका कोर देसे।
“सोमळु, हाव आज क दाहड़े तुमरे ओगळ बोरकोत आरू शाप दुयु मेक देयो। यानी काहमाइन तुमू आपना परमेश्वर योहोवा क इन हुकुमम क ज हाव आज तुमूक सोमवाड़ो मानू, ती तुमरे पोर बोरकोत होयसे, आरू काहमाईन तुमु आपना परमेश्वर योहोवा क हुकुमो क नी मानसी , आरू जेना वाटो क हुकूम हाव आज सोमवाड़ो हेनाक तजकर दिसरा देवताओं क पोछोळ जासु जेनूक तुमू नी जानता होय, ती तुमरे पोर शाप पोड़से। आरू जब तारो परमेश्वर योहोवा तुसेक हेना देश मा पुगाड़से जेरा होकदारीया होयने क तू जाने पोर छे, ति बोरकोत गिरिज्जीम बोयड़ा पोर सी आरू शाप एबाल बोयड़ा पोर सी सोमळजू। काय हुये यरदन क पार, दाहड़ा क बुडवने भिनी, अराबा क रोहनेवाळा कनानियो क देश मा, गिलगाल क ओगळ, मोरे क बांज झाड़ क धड़ नी छे? तुमू ते यरदन पार एकालिय जाने पोर होय, की ज देश तुमरा परमेश्वर योहोवा तुमुक आपे छे ओका होकदारीया होय जावू; आरू तुमू ओका होकदारीया होईन हेरेमा रोया कोरसु; एकालिय विधियाँ आरू कायदा हाव आज तुमूक सोमवाड़ो हेना सभो क मानने मा चौकसी कोरजू।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.