व्यवस्थाविवरण 12

एकूत आराधना न जागू

1“ज देश तुमरा डाहडा क परमेश्वर योहोवा न तुमुक होकदारीया हाव लेने क आपलो छे, हेरेमा जब लोगुन तुमु धोरती पोर जिवतला रोहू ती लोगुन इनी विधियों आरू कायदा क मानने मा सावधानी सी पालन कोरजू। 2जेनी देशों क तुमु होकदारीया होयसू हेरा मानसे उँचा-उँचा बोयड़ा एने टिलो पोर, एने काहने रिते क निळ्ळा झाड़ क नेचा, जोतरा जागा मा आपना देवताओं क उपासना कोरे छे, हेनू सोब क तुमू पुरे रिते सी नष्ट कोर नाकजू; 3हेनदरी वेदीयों क ढाय देजू, हेनदरी दोगडाक खांबाक तुड़ देजु, हेनदरी अशेरा नावोन मुरत क आगठो मा धोपाड़ देजु, आरू ओका देवताओ क खुंदली होयी मुरत क काटिन पाड़ देजो, की हेना देश मा सी ओको नाव मिटाय जाय। 4ओळी जोसो हुये कोरता छे, तूमू आपना परमेश्वर योहोवा क लिय तोसो नी कोरजू। 5बाखुन ज जागो तुमरो परमरश्वर योहोवा सब गोत्रो मा सी नेवाड़ लेसे, कि होंया आपनो नाव बोनाविन राखे, हेरो हेना रोहन्या-जागा क धड़ जाया कोरनो; 6आरू हुये तुमु आपना होमबलि, आरू मेलबली, आरू दशमांश, आरू चुटली भेंट, आरू मानता क चिजो, आरू स्वेच्छाबलि, आरू गाय-बुईल आरू गाडरा-बुकड़ा क पहिलौठे ली जाया कोरजू; 7आरू हुयो तमू आपसो परमेश्वर योहोवा क ओगळ भोजन कोरजो, आरू आपना आपना घोराना भेळ हेना सब कामो पोर, जेरेमा तुम न हात लागाड्या होय, आरू जेना जागा पोर तुमरो परमेश्वर योहोवा क बोरकोत मिळी होय खुशी कोरजु। 8जोसो हामु आजकाल याँ ज कम जेनूक वारू लागे छे हुये कोरे छे तोसो तुमू झुणि कोरजू; 9ज आरामोन जागू तुमरो परमेश्वर योहोवा तुमरा वाटा मा आपलो छे होंया तुमु हेमी लोगुन ते नी पुगसू। 10बाखुन जब तुमू यरदन पार जाईन हेना देश मा जेरा भागी तुमरो परमेश्वर योहोवा तुमरे कोरता छे बस जावू, आरू हुयो तुमरे च्यारू मेर क सब शत्रुओ सी तुमुक आराम आपे, 11आरू तुमू निडर रोहने पावू, ती ज जागो तुमरो परमेश्वर योहोवा आपना नाव क निवास ठहराने क लिय नेवाड़ ले हेरेमा तू आपना होमबली, आरू मेलबली, आरू दशमांश, आरू चुटली भेटे; आरू मानता क सब वारू मा वारु चीज ज तुमु यहोव क लिय संकल्प कोरसु, यानी जेनू चिजो क हुकुम हाव तुमुक सोमवाड़ो हेनु सब क हुये ली जाया कोरजू। 12आरू होंया तुमू आपना आपना पुर्या पारि आरू दास दासीयो भैळ आपना परमेश्वर यहोव क अगळ खुशी कोरजु, आरू ज लेवीय तुमरा फाटको मा रोहे हुये वि खुशी कोरे, काहकी ओको तुमरे पुठि काइ निज वाटो एने अंश नी होयसे। 13आरू चोकचोया रोहू की तु आपसा होमबली क हर एक जागा पोर देखने मा आवे नी चोड़ावनो; 14बाखीन ज जागो तारा कुदा गोत्र मा योहोवा नेवाड़ ले हुयो आपना होमबली क चोड़ाया कोरजु, आरू ज ज काम क हुकुम हाव तुमुक सोमवाड़ो ओको हुयो कोरजु।

15“बाखुन तु आपना सब फाटको क धोडे आपना जि क इच्छा आरू आपना परमेश्वर योहोवा क आपली होयी बोरकोत क ओनसारे डुरोक मारिन खाय सोके , चुखो आरू वीटोळ मानसे दुयु खाय सोकेसे, जोसो कि चिकारे आरू हरिण क मांस। 16बाखुन ओको लुहुय नी खानो; ओको जळ क होसो धोरती पोर उथलाय देजो। 17ओळतेन आपना ओन, एने नोवला दाखमधु, एने ताजा जेतुन का तेल क दशमांश, आरू आपना गाय-बुईल, एने गाडरा-बुकड़ा क पहिलोठो, आरू आपनी मानता क काइ चिज, आरू आपना स्वेच्छाबलि, आरू चुटली भेट आपना सब फाटको क धोड़े नी खानो; 18हेनुक आपना परमेश्वर योहोवा क ओगळ ओका जागा पोर जेनुक हुये नेवाड़ आपना पुर्या पारी आरू दास दासीयों क , आरू ज लेवीय तारा फाटको क अंदर रोहसे ओको साथ खानो आरू तू आपना परमेश्वर योहोवा क अगळ आपसा सब कामो पोर जेरेम हात लागाड़्यो होय खुशी कोरजू। 19आरू चोकचोया रोह कि जब लोगुन धोरती पोर जिवतलो रोहे ति लोगुन लेवीयो क नी छोड़नो।

20“जब तारो परमेश्वर योहोवा आपना बुल क ओनसारे तारो देश वोदाड़े, आरू तारो जी मांस खानो चाहे, आरू तु विचारने लागे, की हाव मांस खाईस, ती ज मांस तारो जी चाहे हुयो खाय सोकसे। 21ज जागो तारो परमरेश्वर योहोवा आपनो नाव बोनाविन राखने क लिय नेवाड़ लेये हुये काहमाइन तार सी बेस नांबे होय, ती ज गाय-बुइल, गाडरा-बुकड़ा योहोवा न तुसे आपलो होय, हेरेमा सी ज काइ तारो जी चाहे, चो मारा हुकुम क ओनसारे मारिन आपना झोपला क धोड़े खाय सोकसे। 22जोसो चिकारे हरिण क मांस खाय जाये छे तोसोत ओको वि खाय जाता छे तोसोत ओका बी खाय सोके, चुखो आरू वीटोळ दुयु भातीन क मानुस ओका मांस खाय सोके। 23बाखुन ओको लुहुय काहिन भांती नि खानो; काहकी लुहुय ज छे चो जिवुत छे, आरू तू मांस क सात जीव कोदी वी नी खानो। 24ओको नी खानो; हेनाक जळ क जसो धोरती पोर उथलाय देजु। 25तु ओको नी खाजी; एकालिय कि हुयो काम कोरने सी ज योहोवा क निगाह मा वारू छे तारो आरू तारा वाद तारी ओवलियाद क वी भलो होये। 26बाखून जब तु काई चिज चुखी कोरे, एने मानता माने, ती ओसी चिज लीन हेना जागा क जानो जेनाक योहोवा नेवाड़ लेसे, 27आरू होंया आपना होमबली क मांस आरू लुहुय दुयो क आपना परमेश्वर योहोवा क वेदी पोर चोढ़ावजू, आरू मैलबली क लुहुय दुयू क आपना परमेश्वर योहोवा क वेदी पोर उथलाविन मांस खाजु। 28एनू वातो क जेरी हुकमो मा तुसे सोमवाड़ो छे चित्त लागाड़िन सोमोळ, की जब तू हुयो काम कोरे ज तारो परमेश्वर योहोवा क निगाह मा वारु आरू भलो रोहे छे, ती तारो आरू तारा बाद तारा ओवलियाद क वि सोदा भोलो होयतो रोहे।

मुरती पूजा क विरूद्ध चेतावनी

29“जब तारो परमेश्वर योहोवा हेनु देश क जेनदरो होकदारीयो होयने क तू जाय रोयू छे तारे ओगळ सी नष्ट कोरे, आरू नू ओको होकदारीयो होईन ओका देश मा बोस जाय, 30ति चोक्ओया रोहजू, काहाइ ओसो नी होये कि औको सत्यनाश होयने क वाद तू वी ओका जोसो फोस जाय, यानी यो कौहीन ओका देवता क उपासना काहने रिते कोरता होता? हाव वी तोसोत कोरीस। देश 31तु आपनो परमेश्वर योहोवा सी ओसो वेवहार नी कोरजी ; काहकी जोरते भातिन क काम सी योहोवा क नी गोंहवे छे आरू बैर-भाव राखे छे, हेनू सब क हेनदरा देवताओ क लिय कोर्यो छे, याँ लोगुन की आपना पुर्या पारी क वी हेनका देवताओ क लिय आगठा मा नाख देये छे। 32जोतरी वातो क हाव तुमु क हुकुम आप्यो छे ओको चौकस होईन मान्या कोरजी; आरू नी ते काइन हेरेम वोदाड़जु आरू नी काई हेरेम सी घोटावजू।