व्यवस्थाविवरण 13

1“काहमाइन थार वीच कोय कागळीयो एने सपनो देखनेवाळो प्रगट हयीन तुसे काई सोहलानी एने चमत्कार देखाड़े, 2आरू जेरी सोहलानी एने चमत्कार क प्रमाण देखाड़ीन त्यो थार सी कये, ‘आवू पारका देवतान क पछळ चालने वाळा हुयीन, जेनासी तुमू हांय तक अनजान्या रया, हेकी पुजा करु,’ 3ती तुमू हेना काग्या एने सोपना देखन्या क बुल पोर कोदी झुनी कान धोरजु; काहकी तुमरो परमेश्वर योहोवा तुमरी पारोख लेसे, हेरेसी यो जान लेवु, की ये मार सी आपना आखा मोन एने आखा जिवो क सात मोंग राखे छे की नी? 4तुमू आपना परमेश्वर योहोवा क पोछळ चालनो, आरू ओक बिक माननो, आरू ओकी चाकरि कोरनो, आरू ओका ज सी थाबाइन रोहजू। 5आरू ओसो कागयो एने सोपनो देखनेवाऴो ज तुम क तुमरा हेना परमेश्वर योहोवा सी फेर क, ज तुमुक मिस्र देश सी निकळ्यो आरू दासत्व क घोर सी छुड़ायो छे, तारा हेना परमेश्वर योहोवा क वाट सी बहकावे क वात कोहनेवाऴा कोहायसे, ओस कोरीन हुयो मार नाख्यो जाय। इने रिते सी तू आपना बिच मा सी ओसी बुराइ क दुर कोर देजी। 6काहमाईन तारो सोगो भाईस, एने पुर्य, एने पुराय, एने तारी घोरवाळी, एने प्राणप्रिय तारो कुदु मित्र निराला मा तुसेक यो कोहीन फुसलावने लागे, की आवू हेमी दिसरा देवता क उपासना एने पुजा कोरे, जेनूक नी तू नि तारा डाहडा जानता होता, 7चाहे हये तुमरे धोड़े रोहनेवाळा आड़े धोड़े क मानसे क चाहे कळ क एक औख्ये सी ली दिसरे औख्ये लोगुन नाम्बे-नाम्बे क रोहनेवाळा क देवता होय, 8ती तू ओकी झुनी माने आरू नी ओकी वार सोमळजी, आरू नि हेर पोर गिन खाजी आरू नि कोमलता देखाड़जी, आरू नी ओको ड़ुकाड़िन राखजी; 9हेनाक छाचिन मार देजी; ओको घात कोरने मा पेहेल तारो हात उठे, पोछोळ आखा मानसो क हात उठे। 10हेर पोर ओसो पथराव कोरनो की हुयो मोर जाय, काहकी हुयो तुसेक तारा हेना परमेश्वर योहोवा सी ज तुसेक दासत्व क घोर यानि मिस्र देश सी निकाळ लायो छे, बहकाने क यत्न कोर्यो छे। 11आरू इसराएली सोमळीन बिक खासे, आरू ओसो भुण्डो काम ओळी तारे विच नी कोरसे।

12“काहमाईन तारा काहना नगर क वाराम , जेनाक तारो परमेश्वर योहोवा तुसे रोहने क लिय आपे छे, ओसी वात तारा सोमवना मा आवे, 13की कोतरा भुन्डा मानसो न तारेत विच मा सी निकळिन आपसो नगर क निवासीयो क यो कोविन बहकाय देदो छे, की आवो हामु दिसरा देवताओ क जेनूक हेमी लोगुन ओनजान रोया भक्ति कोरे, 14ति पुछि पाछिन कोरनो, आरू हेरनो, आरू वारू रीते पोतू लागाड़नो; आरू काहमाईन यी वात छाचलीन खोरी होयम आरू काईवी सन्देह नी रोहे की तारे विच ओसो भुन्डला काम कोर्यो जाय छे, 15ती खोरी हेना नगर क निवासीयो क तलवार सी मार नाखसे, आरू ढुर आदि हेना सब भैळ ज हेरेम होय तलवार सी सत्यनाश कोरनो। 16आरू हेरेम क आखो लुट चौक क विच एकठो कोरीन हेना नगर क लूट भेळ आपना परमेश्वर यहोव क लिय मानु सर्वांग होम कोरीन धोपाड़नो; आरू हुयो सदा क लिय खण्डर रये ओळी बसाया नी जाय। 17आरू काई सत्यनाश चिज तारे हात नी लागनो जुवे; जेरेसी योहोवा आपना भड़के होया कोप सी शान्त होईन जोसो हेनदरा तारा डाहडा सी शपथ खादो हुयो तोसोत तार सी दोया क वेवहार कोरे, आरू दया कोरिन तुखे गिनती मा वोदाड़े। 18यो ती होयसे जब तु आपना परमेश्वर योहोवा क जोतरा हुकुम हाव आज तुसे सोमवाड़ो हेनू सब क माननो आरू ज तारो परमेश्वर योहोवा क निगाह मा वारू छे चोत कोरसी।