Dhankavi Bible
व्यवस्थाविवरण 8
उत्तम देश
ज ज हुकुम मैं आज तुमुक सोमवाड़ो हेनु आखा पोर चालने क चौकसी कोरजु, एकाइय कु तुमु जिवतला रोहू आरू बोढ़ता रोहू, आरू जेना देश क वाराम योहोवा न तुमरा डाहडा सी शपथ खादलो छे हेरेम जाईन ओका होकदारीया होय जावू। आरू फोम राख कि तारो परमेश्वर योहोवा हेनु चावीस सालो मास तुसे आखा जोंगोल क वाट मासी एकालिय लि आयो छे, कि हुये तुसे नम्र बोनावे, आरू तारा पारोख कोरीन यो जान ले की तारा मन मा काय काय छे, आरू की तु ओका हुकुम क पाळन कोरसे की नि। हुयो तुसेक नम्र बोनायो, आरू भुखलो वि होयने देदो, ओळी हुयो मन्ना, जिनाक नी तु आरू नी तारा डाहडा ता डाहडा जानता हुता, हुयोत तुखे खावाड़्यो; एकालिय कि हुयो तुखे सीखाड्यो कि मानुस केवल रोटात् से नी जिवतलो रये, पुन ज ज बुल योहोवा क मुयो सी निकळता छे हेना सी हुयो जिवतलो रोहे छे। एना चाळीस साल मा तारा छिंदरा जुनला नी होये, आरू थारा मन सी वि नी पोड़े, आरू नी थारा पाय सुजे नी। ओळतेन आपना मोन मा यो त विचार कोर कि जोसो कोय आपना पुर्या क ताड़ना आपे छे तोसोत तारो परमेश्वर योहोवा तुझ क ताड़ना आपे छे। एकालिय आपना परमेशवर योहोवा क हुकुम क पाळन कोरता जाईन हेकी वाट पोर चाळन, आरू हेकी बिक मानता रयनो। काहकी तारो परमेश्वर योहोवा तुखे एक उत्तम देश मा लिन जाय रोयो छे, ज जळ क नदियों क, आरू तराइयों आरू बोयड़ा सी निकाळ्या हुया उँडा-उँडा सोतो क देश छे। ओळतेन हुयो गोँहू, जौ, दाखलताओ, अंजीरों, आरू अनारो क देश छे; आरू तेलवाऴा जेतुन आरू मधु क वी देश छे। हेना देश मा अनाजन कमी नी हये, आरू नी हेरेमा तुसे कुदान चीज क घोटी होयसे; होंया क दोगड़ा लोहा क छे, आरू होंया क बोयड़ा मा सी तू तांबा खुँदीन निकाळ सोकसे। आरू तु पेट भोर खासे, आरू हेना उत्तम देश क कारण ज तारो परमेश्वर योहोवा तुसे आपसे सोयाववा मानसे।
प्रभु क विसरने क विरुद्ध चेतावनी
एकालिय सावधान रोहू, काहमाइन ओसो नी होयो कि आपना परमेश्वर योहोवा क विसरीन ओक जो जो हुकुम , कायदा, आरू विधी मा आज तुको समळाड़े; हेको पालन करनो छुड़ दे। ओसो नी होये कि जब तू खाईन डोकार भोर होये, आरू वारू वारु घोरन बोनाविन हेरेमा रोहने लागे, आरू तारी गाय-बुईल आरू गाडरा-बुकडा क बोड़ता होये, आरू तारा सोना, चाँदी, आरू तारो सब भाँतिन क धन बोढ़ जाय, ती तारा मन मा अहंकार सोमाय जाय, आरू तू आपना परमेश्वर योहोवा क वीसरू जाय, ज तुसेक दासत्व क घोर यानी मिस्र देश सी निकाळ लाया छे, आरू हेना मोटा आरू भयानक जंगल मा सी ली आया छे, जाँ तेज विषवाळा घोड़सा आरू विछा छे आरू जलरहित सुखा देश मा हुयो तार लिय तुमरा चकमक क चट्टान सी जळ निकाळ्यो, आरू तुसे जंगल मा मन्ना खावाड्यो, जेनाक डाहडा जानता वी नी होये, एकालिय कि हुये तुसे नम्र बोनावे, आरू तारि पारोख करीन चेहला मा तारो भोलो त कोरे। आरू काहमाइन ओसो नी होये कि तु विचारे लागे की यो सम्पत्ति मारा त सामर्थ्य आरू मारा त भुजबल सी मेसे प्राप्त होये। बाखून तु आपसो परमेश्वर योहोवा क फोम राखजो, काहकी हुये छे ज तुसे धोन प्राप्त कोरने क सामर्थ्य एकालिय आपे छे, कि ज वाचा हुयो तारा डाहडा सी शपथ खाईन बाँदलि होती ओको पुरा कोरे, जोसो आज प्रगट छे। काहमाइन तू आपना परमेश्वर योहोवा क विसरीन दिसरा देवताओ क पोछोळ होय लेसे, आरू ओकी उपासना आरू ओको वांद्या कोरसे, ती हाव जाज क चिता आपे छे कि तुम नि:सन्देह नष्ट होय जासु। जेनी राष्ट्र क योहोवा तुमरा ओगोळ सी नष्ट करने पोर छे, हेनदरे अगळ क जसा तुमू वी आपना परमेश्वर योहोवा क बुल नी माणे क कारण नष्ट होय जासु।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.