व्यवस्थाविवरण 7

प्रभु क आपना मानसे

(नीरगमन 34:11-16)

1ओळतेन जब तारो परमेश्वर योहोवा तुसेक हेना देश मा जेरा होकदारीयो होयने क तु जाने पोर छे पुगाड़े आरू तारे अगळ सी हित्ती, गिर्गाशी, एमोरी , कनानी, परिज्जी, हिब्बी, आरू यबूसी नावोन बेस सा राष्ट्रयो क यानी तुमरे सी मोटा आरू सामर्थी सातो राष्ट्र क निकाळ दे, 2आरू तारो परमेश्वर योहोवा हेनुक तारे लारे हारा देये, आरू तू हेनु पोर जित कोर लेये; ती हेनूक पुरी रिते सी नाश कोर नाखजी; हेनदरे सी नी वाचा बाँदजी, आरू नी हेनदरे पोर गीन कोरजी। 3आरू नी ओका पुराय सी इयाव कोरजू, नी ते आपनी पुराय ओका पुर्या सी इयाव कोरजो, आरू नी ओकी पुराय क आपना पुर्या क लिय इयाव लेजो। 4काहकी हुयो तारा पुर्या क मारे पोछोळ चाळने सी बहकाड़से, आरू दिसरा देवता क उपासना कोरावसे; आरू ओस कोरीन योहोवा क रीस तुमरे पोर भोड़की जासे, आरू हुयो तारो तोत्यारु सत्यनाश कोर नाखसे। 5हेनु मानसो सी ओसो बर्ताव कोरजू, की ओकी वेदियो क ढाय देजू, ओकी लाठीयो क तुड़जू, ओका अशेरा देवीन खाम्बान क काट देजो, आरू हेकी मुर्तियाक आगठा मा धोपाड़ देजो। 6काहकी तु आपसा परमेश्वर योहोवा क चुखला मानसे छे; योहोवा क कळ भोरीन क आखा देशो क मानसो मासी तुमुक नेवाड़ लेदलो छे की तुमू हेरी प्रजा आरू निज धोन कहवासे। 7योहोवा न ज तुम सी मोंग कोरीन तुम क नेवाड़ लेदलो, ओस कोरिन यो नी हुतो की तुमूउ गीनती मा आरू सब देशो क मानसो सी जादा हुता, बाखिन तुमु ते सब देशो क मानसो सी गिनती मा इतराक होता; 8योहोवा न ज तुम क बलवान्त हात क लारे दासत्व क घर मासी, आरू मिस्र क राजा फिरौन क हात सी छुड़ाविन निकाळ लायो, एरो योत कारण छे की हुयो तुमरे सी मोंग राखे छे, आरू हेरा शपथ क वि पुरो कोरने चारतो छे ज हुये तुमरा डाहडा सी खादो हुतो। 9एकालिय जान राखू की तारो परमेश्वर योहोवा ही परमेश्वर छे यो विश्वासयोग्य ईश्वर छे; ज हेरेसी मोंग राखे आरू ओकी हुकुम माने छे ओक सात हुयो हजार पीढ़ी लोगुन आपनी वाचा क पाळन कोरे, आरू हेर पोर करूणा कोरतो रोहे छे; 10आरू जे हेरे सी बैर राखे छे हुयो ओको देखतो हुयो बदलो लीन नष्ट कोर नाखे छे; आपना बैरी क वाराम हुयो वार नि कोरसे, ओका देखतात हुयो हेरेसी बोदलौ लेसो। 11एकालिय एना हुकुम, विधियों, आरू कायदा क, जे हाव आज तुसेक चिताड़ो छे, मानने मा पालन कोरजो।

हुकुम पाळन क बोरकोत

(व्यवस्थाविवरण 28:1-14)

12आरू तुमु ज एना कायदा क सोमळीन मानसू आरू एना पोर चालसु, ती तारो परमेश्वर योहोवा वी हेरा करूणामय वाचा क पाळन कोरसे जेनाक हुयो तारा डाहडा सी शपथ खाइन बाँद्यो हुतो; 13आरू हुयो तार सी मोंग राखसे, आरू तुके बोरकोत आपसे, आरू गिनती मा वोदाड़से; आरू ज देश हुयो तारा डाहडा सी शपथ खाईन तुसेक आपने क कोयो छे हेरेम हुयो तारी ओवलियाद पर आरू ओन, नोवला दाखमधू, आरू जेतुन तेल आदी, जागा क उपज पोर बोरकोत आप्या कोरेसे, आरू तारि गाय-बुईल आरू गाडरा बुकड़ा क बोड़ाया कोरसे। 14तू सब देशो क मानसो सी जादा सोयाववा होयसे; तारा विच मा नी मानुस नी बायोर निसंतान, आरू तारा ढुरो मा वी ओसो काई नी होयसे। 15आरू योहोवा तार सी सब प्रकार क रुग दुर कोरसे; आरू मिस्र क भुण्डी-भुण्डी पीड़ा हेनूक तू जाने, हेरेमा सी काहय बी तुसे लागने न देय , यो सब तारा बैरियो ही क लागसे। 16आरू देश देश क जोतरा मानसे तारा परमेश्वर योहोवा तारा होक मा कोर देसे, तु हेनु सब क सत्यनाश कोरजी; हेनु पोर गिन की निगां झुनी कोरजी; आरू नी ओका देवता क उपासना कोरजी, नी ते तू फंदा मा फोस जाईस।

17काहमाइन तु आपना मोन मा सोचे, की हुये राष्ट्र ज मारसे जादा छे; ती हाव ओको कोसो देश सी निकाळ सोकीस? 18तेवी हेनूसी नी बिहजी, जो काई तारो परमेश्वर योहोवा न फिरौन सी आरू आखा मिस्र सी कोर्यो हेनाक चो फोम राखजी। 19ज मोटा मोटा पारोख क काम तु न आपना डुळा सी देख्यो, आरू जेनू सोहलानी, आरू चमत्कारो, आरू जेना बलवन्त हात, आरू बढाई होयली भुजा क लारे तारो परमेश्वर योहोवा तुख निकाळ लायो, ओका ओनसारे तारो परमेश्वर योहोवा हेनु सब मानसो सी वी जेनूसी तु बिहये छे कोरसे। 20एरेसी जादा तारो परमेश्वर योहोवा ओका विच गेंडरी वि मुकलसे, याँ लोगुन कि हेरेमा सी ज वाचिन डुकाइन जासे हुयो वि तारे अगळ नष्ट होय जसे। 21हेनु सी बिहये जुनी; काहकी तारो परमेश्वर योहोवा तारे विच मा छे, अरु हुयो मोटो आरू बिहने योग्य ईश्वर छे। 22तारो परमेश्वर योहोवा हेनु राष्ट्र क तारे अगळ सी धिरो-धिरो निकाळ देसी; ति तू एक ढोग सी ओको नास नि कोर सोकीस, नी ते बनैले पशु बढ़कोरीन तारी हानि कोरसे। 23तेवी तारो परमेश्वर योहोवा हेनूक तार सी हाराय देसे, आरू जब लोगुन हुयो नष्ट नी होय जाय ति लोगुन घण उलजन मा न्हाखसे । 24आरू हुयो ओका राजा क तारा हात मा कोरसे, आरू तु ओक वि नाव कळी पोर सी मिटाय नाकसे; हेरेमा सी काई वी तारे अगळ उबो नो रोह सोके, आरू नास मा तु ओसो सत्यानाश कर नाकसे। 25ओका देवताओ क खुँदली मुरत तुम आगठा मा धोपाड़ देजो; ज चाँदी एने सोनो हेनू पोर मढ़ा होय ओको लालच केके नी लेनो , नी ते तू ओका कारन फंदा मा फोसीस; काहकी ओसी चिज तुमरा परमेश्वर योहोवा क निगाह मा वारु नी होय। 26आरू काय भुण्डीत चिज आपना घोर मा नि ली आवनो, नी ते तू वि ओका जोसो नष्ट होय जाने क चिज कोहायसे; हेनाक सत्यानाश क चिज जानिन हेरेसी घाड़ाय कोऱनो आरू हेनाक कोदी नी चाहनो; काहकी हुयो वीटोळ चिज छे।