Dhankavi Bible
व्यवस्थाविवरण 6
महान-हुकुम
यो हुयो हुकुम, आरू हुये विधियाँ आरू कायदा तुमको सिकाड़ने करीन परमेश्वर योहोवा मखे हुकुम आपलो हुतो, त्या या छे, कि तुमु हेना देश मा मानु जेरो होक होयने क पार जाने पोर होय; आरू तू आरू तारो पुर्य आरू तारो पोतो योहोवा क बिक मानता जाईन ओका हेनू सब विधियों आरू हुकुमो पोर, जे हाव तुसेक सोमवाड़ो, आपना जीवन भोर चालता रोया, जेरेसी तु घोना दाहड़ा लोगून बोनला रोया। हे इसराएली, सोमोळ, आरू ओसोत कोरने क चौकसी कोर; एकालिय कि तारो भलो होये, आरू तारा पुतरो क परमेश्वर योहोवा क बुल क ओनसारे हेना देश मा जां दुध आरू मधू क धाराएँ उहवे छे तुमू बेस होय जा
हे इसराएली , सोमोळ, योहोवा आमरो परमेश्वर छे, योहोवा एकुत छे; तु आपना परमेश्वर योहोवा सी आपसो आखा मकोन, आरू आखा जिव, आरू आखी सक्ती क सात मोंग राखजी। आरू यो हुकुम ज हाव आज तुख सोमवाड़ो छे हुयो मन म वोनलो रोहे; आरू तु इना आपना बाळ-बच्चा क सोमझाड़िन सीकाड़्या कोर, आरू घोर मा बोठला, वाट पोर चालता, लुटता, उठतो, एनी वातक कोर्या कोरजो। आरू हेनुक आपना हात पोर सोहलानी क रूप मा बाँधजी, आरू ये तारा डुळान क विच मा रयसे। तू हेनुक आपना आपना घोर क चौखट क धड़े आरू नगरन फाटको पोर लिखजो।
हुकुम क नी मानने क चेतावनी
जब तारो परमेश्वर योहोवा तुसे हेना देश मा पुगाड़े जेरा वाराम हुयो अब्राहम, इसहाक, आरू याकुब नावोन तारा डाहडा सी तुसेक आपने क शपथ खादो, आरू जब हुयो तुसेक मोटा मोटा आरू वारू नगर , ज तू न नी बोनायो, आरू वारला-वारला चीजो सी भोरायला घोर ज तू नी भोर्यो, आरू खुँदला कुवा, ज तु न नी खुँद्यो, आरू दाख क वाड़िया आरू जेतुन क झाड़, ज तुन नी लागाड्यो, यो आको चिजे जब हुये आपे, आरू तू खाईन डोकार लेये, ती सावधान रोहजी, काहिय ओसो नी होये की तु योहोवा क विसरू जाय, तू तारा दासत्व क घोर यानी मिस्र देश सी निकाळ लाया छे। आपना परमेश्वर योहोवा क बिक मानजी; ओकी सेवा कोरजी, आरू हेरोत नाव क शपथ खाजी। तुमु पारका देवताओ क यानी आपना च्यारू मेर क देशो क मानसो क देवताओ क पोछोळ नी जानो छे; काहकी तारो परमेश्वर योहोवा ज तारे विच मा छे हुयो जळ चुटनेवाऴो ईश्वर छे; काहमाइन ओसो नी होये कि तारो परमेश्वर योहोवा क रिस तार पोर भोड़के, आरू हुये तुसेक कळ सी नष्ट कोर नाखे।
तुमू आपना परमेश्वर योहोवा क पारोख नी कोरजू, जोसो कि तुमू न मोस्सा मा ओकी पारोख कोर्या हुता। आपना परमेश्चवर योहोवा क हुकुम, गवाहियों आरू विधियों क ज हुयो तु सेक आप्यो छे, सावधानी से मानजी। आरू ज काम योहोवा क निगाह वारु आरू सुहावनो छे हुयोत कोर्या कोरजू, जेसेसी की तारो भलो होय, आरू जेना उत्तम देश क वाराम योहोवा न तारा डाहडा सी शपथ खादो हेरेमा तू प्रवेश कोरीन ओको होकदारीयो होय जाय; की तारा सब दुसमोल तारे अगळ सी नांबे कोर देयो जाय, जोसो की योहोवा न कोयो हुतो।
ओळतेन अगळ क जब तारो पुर्यो तार सी पुछे, यी चेतावनीयाँ आरू विधि आरू कायदा, जेनुक मानने क हुकुम आपमरा परमेश्वर योहोवा न तुम क आप्यो छे, ओको प्रयोजन काय छे? तब आपना पुर्या सी कोहजी, जब आमु मिस्र मा फिरौन क दास हुता, तब योहोवा बलवन्त हात सी हामू क मिस्र मा सी निकाळ ली आयो; आरू योहोवा न आमरे देखता मिस्र मा फिरौन आरू ओका आखा घोराना क दु:ख आपनेवाळा मोटा मोटा सोहलानी आरू चमत्काय देखाड़्यो; आरू आमु क हुयो होंया सी निकाळ लायो, एकालिय कि आमु एना देश मा पुगाड़िन, जेरे वाराम मा हुयो आपना डाहड सी शपथ खादो हुतो, ओको आमूक आप देयै। आरू योहोवा न हामु यो सब विधियाँ पाळन केने क हुकुम आप्यो, एकालिय कि हामु आपना परमेश्वर योहोवा क बिक माने, आरू एने रीते होमेशा आमरो भोलो होये, आरू हुयो आमूक जिवतलो राखे, जोसो कि आज क दाहड़े छे। आरू काहमाईन हामु आपसा परमेश्वर योहोवा क निगाह मा ओकी हुकुम क ओनसारे एना आखा कायदा क मानने मा चौकसी कोरे, ती यो आमरे लिए न्यापन को हायसे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.