व्यवस्थाविवरण 5

दस आज्ञाएँ

(नीरगमन 20:1-17)

1मूसा न आखा इसराएलियों क बुलावीन कोयो, हे इसराएलियों, जो-जो विधि आरू कायदा हाव आज तुमूक समळाड़ रीयो, अतरान करीन तू हेनको सीकिन पालन करने मा चोकचौळीया करो। 2हामरा परमेश्वर योहोवा न होरेब पोर हामरे सी वाचा बाधी। 3एनी वाचा क योहोवा न हामरा पितरो सी नी, हामू सी बाँधे , जे याँ आज क दाहड़ो जिवतलो छे। 4योहोवा न हेना बोयड़ा पोर आगठा क विच मासी तुमू मानसो सी आंबा-सांबा वात कोर्या; 5हेना आगठा क बिक सी तुमू बोयड़ा पोर नी चोहड़े, एकालिय हाव योहोवा क आरू तुमरे विच ओको बुल तुमुक बताड़ने उबो रोयो। ति हेनासी कोयो,

6हाव तारो परमेश्वर योहोवा, जो तार दासत्व क घर यानी मिस्र देश मासी निकाळ लायू छे। 7मेसे छुड़िन दिसरा क परमेश्वर कोरीन झुणि मानजी।

8तु आपसा लिय काइ मुरत खुंदिन नी बोनावजि, नी कुदान प्रतिमा बोनावजी जुळ वादळा मा, एने कळ पोर, एने कळीन जळ मा छे; 9तु हेनुक वांदे झुनी आरू नी हेनदरी उपासना कोरजी; काहकी हाव तारू परमेश्वर योहोवा जलन राखनेवाऴू ईश्वर छे, आरू जे मारसी बैर रखे, हेका दुष्कर्मन दण्ड हांव थारी तीसरी आरू चवथी पीड़ी तक आपतो रयीस; 10पुन जे मार सी मोंग राखे आरू मारा हुकुम क मानने वाळा मनुसन हांव हजारो पीड़ी तक करूणा करतो रयो।

11तू आपना परमेश्वर योहोवा क नाव उदुड़ झुनी लेये; काहकी जो योहोवा क नाव व्यर्थ लेये हेको विनगुनावो नी ठहरावसे।

12तू आरामोन दाहड़ा क मानीन चुखलू राखजि, जोसो तारो परमेश्वर योहोवा न तुसेक हुकुम आप्यो। 13छ: दाहड़ा तू काम कोरिन आपनो आखो काम-काज कोरजी; 14बाखुन साँतवे दाहड़े तारा परमेश्वर योहोवा क लिय आरामोन दाहडू छे; हेरेम नी तू काहने रीते क काम-काज कोरजी, नी तारा पुर्यो, नी तारी पुराय, नी तारो दास, नी तारी दासी, नी तारो बुईल, नी तारो गोदड़ो, नी तारो क आइ बी ढुर, नी काइ पारको वि जो तारा झोपला क धोड़े होय; जेरेसी तारो दस आरू तारी दासी वी तारे जोसा आराम कोरे। 15आरू इनी वात क फोम राखजी कि मिस्र देश मा तू आपसा दास हुतो म अरु होया सी तारो परमेश्वर योहोवा तुसेक वाँ सी बलववन्त हात आरू बोड़ाई होयी भुजा क लारे निकाळ लायो; ओस कोरीन तारो परमेश्वर योहोवा तुसेक आरामोन दाहड़ू मानने क हुकूम आपे छे।

16पसा बाबा आरू आपसी आया क आदर कोरजू,जोसो कि तारो परमेश्वर योहोवा न तुसेक हुकुम आपयो छे; जेरेसी थ जो देश तारा परमेश्वर योहोवा तुसेक आपे छे हेरेमा तु घोना दाहड़ा लोगुन रोहे, आरू तारो भोलो होये।

17तु हत्या झुनी कोरे।

18तु व्यभिचार झुनि कोरे।

19तू चुरी झूणी कोरे।

20तु किदा क विरूद्ध झुटु गोवा नी देजी।

21तू नी कुदान बायोर क लालच कोरजी, आरू नी कुदा क घोर क लालच कोरजी, नी ओका खेत क , नी ओका दास क, नी ओकी दासी क , नी ओका बुईल एने गोदड़ा क , न ओकी काई आरू चिजो क लालच कोरजी।

22यो बुल योहोवा न हेना बोयड़ा पोर आगठा, आरू वादऴा, आरू घोना आंधारा क विच मासी तुमरी आखी मोंडळी सी आयड़ीन कोयो; आरू हेरेसी जादा आरू काई नीइ कोयो। आरू हेनुक हुये दोगड़ा क दुय पटियो पर लिखिन मेसेक आप देदो।

परमेश्वर क तेज सी लोगहन क भिहिय जानो

(नीरगमन 20:18-21)

23जोत्यार बोयड़ो आगठा सी दहक रोयो हुतो, आरू तुमु न हेना बुल क आंधारा क विच मा सी आवतला सोमळ्या, ती तुमू आरू तुमरा गोत्र क सब डाहला-डाहला मानसे आरू तुमरा पुरनिया मार पास आया; 24आरू तुमू कोहने लाग्या, आमरा परमेश्वर योहोवा न आमूक आपना तेज अरू आपसी महिमा देखाड़्यो, आरू हामु हेरा बुल आगठा क बिच मा सी आवतला सोमळ्या; आज हामु देख लेदा की काहमाईन परमेश्वर मानुस सी वात कोरतो चे ते वी मानुस जिवतलो रोहे छे। 25हिमी हामु काह मर जाजे? काहकी असी मटी आगठी सी हामु भस्म होय जासु; आरुब काहमाइन हामु आपना परमेश्वर योहोवा क बुल ओळी सोमळ्या , ती ते मर जासु। 26काहकी आखा मनुस मासी कुन ओसो छे, जो आग्ठान वीच मा रयीन परमेश्वरन अवाज समळीयो, हेके बुलता समळीयो, जसा हामू समळीया, आरू तेबी त्यो जीवतो रयो? 27एकालिय तु धोड़े जा, अरु जो काई आमरो परमेश्वर योहोवा कोयो चो सोमळी ले; ओळतेन जो काई आमरो परमेश्वर योहोवा कोहे चो आमरे सी कोहजि; आरू हामु सोमळ्सु आरू हेको अनसारे काम करसु।

28जब तुमु मार सी यी वात कोय रोया होता ती योहोवा तुमरि वात सोमऴ्यू; ती हुयो मारसी कोयो, इणु मनुसन जि वात तार सी कयला छे, हांव समळ्यो; यो जो काहय कयो हुये वारूत कयो। 29वारू होये की हेंदरो मोर होमेशा ओसो बोनलो रोहे, कि हुये मारी बिक मानता जाईन मार आखा हुकुम पोर चालता रोहे, जेरेसी ओका आरू ओका ओवलियाद क सदैव भोलो होयतो रोहे! 30एकालिय तू जाईन हेनू सी कोय दे, की आपना आपना डेरा क पौछा जावू। 31बाखुन तू यो मारे पास उबो रोह, आरू हाव चि आखी आज्ञाएँ आरू विधियाँ आरू कायदा जेनूक तुसेक हेनुक सीकाड़नो होयसे तारसी कोहिस, जेरेसी हुये हेना देश मा जेरो होक हाव हेनुक आपने पोर छे हेके माने। 32एकालिय तुमू आपना परमेश्वर योहोवा क हुकुम क ओनसारे कोरने मा चौकसी कोरनो; नि ते जेवड़ियो जाजी नी डाखरिये। 33जेनी वाट पोर चालने क हुकुम तुमरा परमेश्वर योहोवा न तुमुक आप्यो छे हेनी वाट पोर चालता रोहू, की तुमू जिवतला रोहू, आरू तुमरो भोलो होये, आरू हेना देश क तुमु होकदारीया होयसू तुमू घोना दाहड़ा तक जीवता रय सको।