व्यवस्थाविवरण 4

मूसान सिकापन

1हे इसराएली, जो जो विधि आरू कायदा हांव तुमुक सीकाड़ने‍ चाहो हेनुक सोमळी लेवू, आरू हेनू पोर चालू; हेरे सी तुमू जिवतला रोहू; आरू ज देश तुमरा पितरा क परमेश्वर यहोव तुमुक आपे छे हेरेमा जाईन ओका होकदार होय जाय। 2जो हुकूम हाव तुमूक समळाड़ो हेरेमा नी तुमू काई वोदाड़जू, आरू नी काई घोटाड़जू; तुमरा परमेशवर योहोवान हेना हुकुम क जो तुमुक समळाड़ो चो तुमू पाळजो। 3जो काम योहोवा बालपोर म करीयो, हेको तुमरा डुळा देखला छे। टुमरो परमेश्वर योहोवा हेनू अब मनुसन क तुमरे वीच मा रयीन नाश कर दिदलो हुतो, जो पओर न बाल देवतान पछळ चालता हुता। 4बाखुन तुमू आपना परमेश्चवर योहोवा क साथ लिपटी रया आखा की आखा आज लोगुन जिवतला छे। 5देखु, हांव ते आपना परमेश्वर योहोवा क हुकुम मखे आपलो हुतो, हेको ओनसारे तुमुक विधि आरू कायदा सीकाड़्या छे, कि जिना सी टुमु हेना देश मा पालन कर सको, जिनाक आपसा होक मा करने वाँ भराय रीय हय। 6अतरान करीन तुमू ओको पाळन करजो आरू हेको अनसारे काम करजो, काहकी हेनको लारेत् देशन लोगहन नी नजर मा तुमरी ओकोल आरू समझ उजेन्ती हुयसे। जव त्या इनु विधियाक समळसे ती कयसे, पाक्को इना मोटल राष्ट्रन लोगहन ओकोल वाळा आरू समझदार छे। 7देखू, कुन ओसी मोटि राष्ट्र छे जेरा देवता ओका ओसे धोड़े रोहे छे जोसो आमरो परमेश्वर योहोवा, जब कि आमु हेना क आयड़जे छे? 8ओळतेन कुन ओसी मोटी राष्ट्र छे जेरा पास असी विधि आरू न्याय कायदा होय, इनी वेवसता सारको छे, जेको हांव तुमरे ओगोळ मेको?

9तुमु चोकोचौळीय रयजो, असो नी कि जो वात टुमर डुळा देखे , हेनको टुमु भुल जावो। असो नी हय कि जीवन भरन करता टुमरा मन सी डूर हुय जय। पर टुमु हेनको टुमरा पोर्य पारीन आरू पोत पोती न क देखाड़जो। 10खास कोरीन हेना दाहड़ा क वात जेरेमा तुमु होरेब क पास आपना परमेश्वर योहोवा क ओगोळ उबा हुता, जब योहोवा न मार सी कोयो हुतो, हेनू मानसो क मारे पास एकठो कोर की हाव हेनूक आपना बुल सोमवाड़ो, जेरेसी हुये सीके, जेरेसी जोतरा दाहड़ा हुये कळ पोर जिवतला रोहे तोतरा दाहड़ा मारी बिक मानता रोहे, आरू बाळ-बच्चा क वी यो सीखाड़े। 11ती तुमु धोड़े जाईन हेना बोयड़ा क नेचा उबा होया, आरू हुये बोयड़ाक आगठ सी धधक रोयो हुतो, आरू ओकी लौ सरग तक छिमायती हुती, आरू ओका च्यारू मेर आंधारो, आरू वादळो , आरू घोनो आंधारा सी ढाकाय गयो। 12ति योहोवा न हेना आगठा न क विच मा सी तुमरे सी वात कोर्यो; वात क बुल त तुमक सोमळाय पोड़ी बाखुन काई रूप नी देखायो, आगलो बुल सोमळाय पोड्यो। 13आरू योहोवा हेको हुकूम आरू दस आग्या तुमरे उजेन्तो करलो हुतो आरू हेको पाळन करने करीन हुकम तुमको आपलो हुतो; आरू हेनूक दोगड़ा क दुय पटियाओ पर लिखलो हुतो। 14आरू योहोवा मेसे हेने टेमे हुकुम आपलो हुतो कि तुमुक नियावन विधि आरू नियम सीकाड़ो, जिना सी तुमु हेको अनसारे उना डेश मा चाल- चाल सको जिनाक तुमु आपसा होक मा करने करीन भराय रीय।

मुर्तिपुजा क विरुद्ध चेतावनी

15एकालिय बेस चोकचोया रयजू। काहकी जिने दाहड़े योहोवा न तुमरे सी होरेब बयड़ा पर आगठान क विच मा रयीन वात करलो हुतो, तव तुमुक काहय रूप नी देखाय पोड़्यो, 16काहिय ओसो नि होये कि तुमु बिगड़ी जावो, आरू आपसे वाटे मुरतीन, काहलो रूप बनावे चाहे अदमी, चाहे बायरन क समान, 17चाहे कळ परून काहय जनवार, चाहे वादळा मा उड़नेवाळा काहला चिल्लान क सारको,

18चाहे धरती पर रेंगनरवाळा काहयइ जीव जन्तुन, चाहे कळीन जळ मा झेपने वाळा काहली मछलीन क रूप सारको, 19असो नी हुये कि तुमू वादळा क भिनी डुळा उचाकोरीन दाहड़ा, चांद, आरू तारा क यानी वादळा क आखा तारागण देखु, ती बहककर हेनू वांदो कोरीन ओकी सेवा कोरने लागूउ जेनूक तुमरो परमेश्वर यहोव न धरती पोर क सब देश क लिय मेक्यो छे। 20योहोवा तुम क योहोवा लोहे क भट्‌ठे सरीखे मिस्र देश सी निकाऴ ली आयो छे, एकालिय कि तुमू ओकी प्रजारूपी निज भाग ठहरे, जोसो आज प्रगत छे। 21ओळतेन तुमरे कारण योहोवा न मार सी रीस कोरिन यी शपथ खादो, यरदन पार जावायसे नी, आरू ज वारू देश इसराएलीयो क परमेश्वर योहोवा हेनुक हेनदरो निज भाग कोरीन आपे छे हेरेमा तू प्रवेश कोरने नि पावीस। 22म्हारी मोत इना देश मा हुयसे। हांव यरदन नदीन उना पार नी जाम, पुन टुमु उना पार जासु, मेसे इना देश मा मोरनो छे, हाव यरदन पार नी जाय सोको; बाखुन तुमू पार जाईन वारु देश क होकदारिय होय जासु। 23एकालिय तुमु चोकचोया रोहू, काई ओसो नी होय कि तुमु हेनू वाचा क विसरीन, जो तुमरा परमेश्वर योहोवा न तुमरे सी वाचा बाँदली छे, कोय आरू चिज क मुरत खुंदिन बनावू, जिनाक तुमरो परमेश्वर योहोवा न तुम क मोना कोरलो छे, 24काहकी तुमरो परमेश्वर योहोवा भस्म करनेवाळो आगठो छे; हुयो ईर्ष्यावान परमेश्वर छे।

25“जव तुमरा पोरीय पारी पयदा हुयसे , आरू उना देश म रयता रयता जुना हुय जावो, काहमाईन हेना देश मा रोहता-रोहता घोना दाहड़ा होय जाय, आरू आपना पुर्या-पारी पोयदा होयने पोर , तुमू बिगड़िन काहनी चिजो क रूप क मुर्ती खुंदिन बोनावू, आरू इने रिते आपना परमेश्वर योहोवा क प्रति बुराय कोरीन हेना सी अप्रसन्न कर देवू, 26ती हाव आज वादऴा आरू कळ क तुमरा विरूद्ध गोवा कोरीन कोहो, कि जेना देश क होकदारीया होयने क लिय तुमु यरदन पार जाने पोर हेरेमा तुमू झाटू छाचिन नष्ट होय जासु; आरू घोना दाहड़ा रोहनै न पावसू, किन्तु पुरे रिते सी नष्ट होय जासु 27आरू योहोवा तुम क देश देश क मानसो मा तितर बितर कोरसे, आरू जिनी राष्ट्र क विच योहोवा तुम क पुगाड़से हैरेमा तुमु थुड़ात सा रोय जासु। 28आरू होंया तुमु मानुसे क बोनवल लाकड़ा आरू दोगड़ा क देवतावो क सेवा कोरसु, जे नी देखता, आरू नी सोमळ्ता, आरू नी खाता, आरू नि सुँघता छे। 29बाखुन होंया वी तुमु आपना परमेश्वर योहोवा क हेरसू, कदाम तुम तुमरा सारा मन, तुमरा जीयो सी हेकी हेर करसो, ती तुम हेको हात कर सकसु। 30आचेहला दाहड़ा मा जब तुमु वेला मा पोड़ू, आरू ती सब वेला तुमरे पोर आय पोड़े, ती तुमु आपसा परमेश्वर योहोवा सी भिनि फिरू आरू ओकी मानू; 31काहकी तारो परमेश्वर योहोवा दोयाळळो ईश्वर छे, हयो तुम क नी ते छुड़से आरू नी नष्ट कोरेसे, आरू जी वाचा हुयो तुमरा पितरो सी वायदो खाईन बांदली छे ओको नी विसरसे।

32“जब सी परमेश्वर न मानुस क पोयदा कोरीन कळ पोर मेक्यो ती सी लागाड़िन तु आपना पोयदा होयने क दाहड़े लोगुन क वात पुछ, आरू वादऴा क एक ओखे सी दिसरे औख्ये तक क वात पुछ, काय ओसी मोटी वात कोदी होयी एने सोमळने मा आवी छे? 33काय दिसरा लोगहन क कोदी परमेश्वर क बुलता समळीया, जसा तुम समळीया, जोसो कि तु न सोमळ्यो छे? 34ओळतेन काय परमेश्वर न आरू काहनी राष्ट्र क दिसरी राष्ट्र क वि सी निकाळने क कमर बाँधिन पारोख, आरू सोहलानी, आरू चमत्कार, आरू युद्ध, आरू बली हाथ, आरू बढाई हुई भुजा सी ओसो मोटा काम कोर्या, जोसो तुमरा परमेश्वर योहोवा न मिस्र मा तुमरा देखता कोर्या? 35ए एस्राएल समाज यो आखो तुख देखाड़्यो गोयो, एकालिय कि तु जान राखे की योहोवा त परमेश्वर छे; ओको छुड़ आरू कोय छे नी। 36त्यो टुको वेला पाड़ीन वादळा मा सी त्यो तुको आपसो बुल सोमवायो कि तुसे सीकापोन आपे; आरू तुको हेकी मोटी मोटी आगठि देखाड़्यो, आरू ओक बुल आगठा क विच मासी आवता जाईन तुसे सोमवाइ पोड़े। 37आरू हुये ज तारा पितरो सी मोंग राख्यो, ओस कोरीन ओका पोछोळ ओका ओवलियाद क नेवाड़ लेदो, आरू प्रत्यक्ष होईन तुसे मोटा सामर्थ्य क लारे मिस्र सी एकालिय निकाळ लायो, 38कि तार सी मोटा आरू सामर्थी राष्ट्रोक क तारे ओगोळ सी निकाळीन तुसेक ओक देश मा पुगाड़े, आरू हेना तारा निज वाटु कोर देये, जोसो आज क दाहड़े देखाय पोड़े छे; 39एकालिय आज जान लेयू, आरू आपना मोन मा सुच वी राखु, की उपोर वादळा मा आरू नेचा कळ पोर योहोवा त परमेश्वर छे; आरू कुदु दिसरो नि। 40अतरान करीन तू हेकी विधियो आरू हुकुम क जो आज तुखे समळाड़लो छे मानजु, एकालिय कि थारो आरू तार ओवलियाद तारे पोछेळ क वी भलो होय, आरू जो देश तारो परमेश्वर योहोवा तुसे आपे छे हेरेमा तारा दाहड़ा घोना आरू सोदा क लिय होये।”

यर्दन नदी की पूर्व दिशा में शरणनगर

41तब मूसा न यरदन क पार उगरवने ओख्ये तिन नगर ओलोग कोर्यो, 42एकालिय कि ज कुदु बिना जाने आरू विगुर पेहले सी बैर राखे आपना कुदा भाई क मार देये, हुयो हेरेमा सी कुदा नगर मा ढ़ास जाय, आरू ढ़ासीन जिवतलो रोहे: 43यानी रुबेनियों क बेसेर नगर ज जोंगोल क समरथ देश मा छे, आरू गादियो क गिलाद क रामोत, आरू मनश्शेयोन क बाशान क गोलान।

परमेश्वर क व्यवस्था न भूमिका

44ओळतेन ज व्यवस्था मूसा न इसराएलीयो क आपलो हुयो यो छे: 45यीत् हुये विधि चेतावनियाँ आरू कायदा छे जे मूसा न इसराएलियो क हेने टेमे कोहीन सोमवाड़ियो जब हुयो मिस्र सी निकलीयो हुतो, 46आरू यरदन क पार बेतपोर क ओगोळ क तराई मा, एमोरियो देशन राजा सीहोन, हेशबोन नगर मा रयतो हतो, हेका देश मा हुतो, जव मूसा आरू इसराएली मीसर सी निकळी आवला हुता तव त्या राजा सीहोन क हराय दीदा। 47आरू हुये ओका देश क , आरू बाशान क राजा ओगळ क देश क, आपना होक मा कोर लेदा; यरदन क पार उगेवने औख्ये रोहनेवाळा एमोरियो क राजा क यो देश हुता। 48यो आर देश अर्नोन क घाटीक छेळ पर छे, सीयोन बयड़ा मतलब, हेर्मोन तक छे, 49यरदन नदी के पूर्वी काठान आखा अराबान क्षेत्र सी अराबा सागर तक मतलब पिसगान ढाळन नेचा तक, सब देश पर हक कर लीदला हुता।