Dhankavi Bible
व्यवस्थाविवरण 3
राजा ओगळ क पराजय
हामु अगा बढीया, आरू बाशान न वाट्ये गयला हुता। बाशान क ओगळ नावोन राजा आपनी आखी सेना भेळ आमरो सामनो करने, हामु सी एद्रेई मा युध्द करने क निकळ आयो। तब योहोवा क मार सी कोयो, हेरेसी मा बिहये, काहकी हाव हेनाक आखी सेना भेळ आरू देश भेळ तारा हात मा कोर आपो; आरू जोसो तुन हेशबोन क निवासी एमोरियो क राजा सीहोन सी कोर्यो छे तोसोत हेनासी वि कोरजी। ओस कोरीन आमरा परमेश्वर योहोवा न आखी सेना भेळ बाशान क राजा ओगळ क हेकी सारी सेनाक वी आमरा हात मा कोर देदो; आरू हामु ओका याँ इनीये रीतिये मारत रोया कि हेरेमा सी काइ वीनी जीवतो। हामु हेने टेमे ओका हेका सब नगरो क ली लेदला हुता, ओसो कोय नगर नि रोय गोयो हुतो जेरेम आमु नि हेनदरे सी नी ली लेदा होय, साठ नगर, अर्गोब क आखो देश, बाशान मा ओगन राज्य हामु ली लिदला हुता। ये सब किला वाळा नगर हुता आरू ओका उचा उचा शहरपनाह, आरू झोपला, आरू बेड़े हुता, आरू ओकौ छुड़े विगुर शहरपनाह क वि बेसका नगर हुता। आरू जोसा हामु न हेशबोन क राजा सीहोन क नाश करीया हुता, नगरों सी कोर्या हुता, तोसोत आमून इना नगर सी वी कोर्यो, यानी सब बसला नगर क बायर आरू बाळ-बच्चा भेळ सत्यनाश कर दिदा। बाखुन सब घरेलू ढ़ुरो आरू नगरो क लूट हामू आपने करीन कोर लेदा। ओसोत हामु हेना टेमे यरदन क एने धोड़े रोहनेवाळा एमोरियो क दुयो राजाओ क हात सी अर्नोन क नाळा सी लीन हेर्मोन बोयड़ा लोगुन क देश क लि लेदा। सीदोन के लोगहन हेर्मोन क सीदोनी मानसो सीर्योन, आरू एमोरी मानसो सनीर कोहे छे। समथर देश क सब नगर, आरू गिलाद, आरू सल्का, आरू एद्रेई लोगुन जे ओगळ क राज क नगर हुत, आखा बाशान क हामु ली लीदा। बाशान क राजा ओग रपाई देशन आखरी मनुस हुतो, हेको खाटलो लुहड़ान रोय गोयो हुतो, ओका खाटली लुहड़ा क छे अम्मोनियो क रब्बा नगर मा पोड़ी छे, साधारण मानुश क हात क हिसाब सी ओकी नाम्बार नोव हात क आरू चौड़ाई चार हात क छे।
देश क जागान वाटू
जो देश हामु हेने टेमे आपना होक मा ली लेदला चो यो छे, यानी अर्नोन क नाळा क धोड़ेवाळा अरोएर नगर सी ली अब नगरो भेळ गिलाद क बोयड़ा देश क आदो भाग, जेनक मैन रुबेनियो आरू गादियो क आप देदो, हांव मनश्शेन गोत्रन आधा क, रयलो आरू गिलाद क वाचलो हुयो वाटु, आरू आखो बाशान, यानी अर्गोब क आखो देश ज ओगळ क राज मा हुतो, इनाक हाव न मनश्शे क आदा गोत्र क आप देदो। आखो बाशान त रपाईयों क देश कोहाये छे। आरू मनश्शेई याईर न गशुरियो अरु माकावासीयों क सीमा लोगुन अर्गोब क आखा देश लि लेदा, आरू बाशान क नगर क नव आपसा नाव पोर हब्बोत्याईर पाड़्यो, अरु हुयो नाव आज लोगुन छे। आरू मैन गिलाद देश माकिर क आप देदो, आरू रुबेनियो आरू गादियो क मैन गिलाद सी ली अर्नोन क नाळा लोगुन क देश आप देदो, यानीहेना नाळा क वीच ओकी सीमा हुती, आरू अम्मोनियोम क सीमा, यब्बोक नदी टक हुती; आरू किन्नेरेत सी ली पिसगा क ढलान क नेचो क अराबा क ताल लोगुन, ज खारो ताल वी कोहाये छे, अराबा आरू यरदन क उगेवने औक्ये क आखो देश वि मैन ओको आप देदो ।
हेने टेमे हाव न तुमुक यो हुकुम आप्यो, तुमरा परमेश्वर योहोवा न तुमुक यो देश आप्यो छे कि हेना आपना होक मा राखु; तुमु सब योद्धा होतियारबान्दिन होएन आपना भाई इसराएलीयो क अगळ अगळ पोर चालु। बाखुन तुमरा बायरा आरू बाळ- बच्चा , आरू ढुरे, जेनुक हाव जानो छे कि बेसका छे, हुये सब तुमरा नगर मा जे मैन तुमुक आपलो छे रोय जाय। आरू जब योहोवा तुमरा भास्यो क जोसो आराम आपे जोसो कि हुयो तुमुक आप्यो छे, आरू हुये हेना देश क होकदारीया होय जाय ज तुमरो परमेश्वर योहोवा हेनुक यरदन पार आपे छे; ति तुमु वि आपना आपना होकोन क जागा पोर ज हाव न तुमुक आपलो छे पोछो आपसे। ओळतेन मैन हेनेत टेमे यहोशु सी चिताकर कोयो, तु न आपना डुळा सी देक्यो छे कि तारा परमेश्वर योहोवा न एनू दुयू राजा सी काय काय कोर्यो छे; तोसोत योहोवा हेनू सब राजो सी कोरसे जेरेम तु पार होईन जाईस। हेका सी मा बीहये, काहकी ज तुमरी भिनी सी थारो परमेश्वर योहोवा लोड़ायनेवाळो छे।
मुसा, कनान मा प्रवेश सी वंचित
तेना टेमो म मैन योहोवा सी गिड़गिड़कर विनता कोर्यो, हे परमेश्वर योहोवा, तु आपना दास क आपनी महिमा आरू बलवन्त हात देखाड़ने लाग्यो छे; सोरोग मा आरू कळ पोर ओसो कुन ईश्वर छे ज तारे सी काम आरू पराक्रम क काम कोर सोके? एकालिय मेसे पार जाने दे की यरदन पारक हेना वारला देश क, यानि हेना वारला बोयड़ा आरू लबानोन क वि देखने पावो। बाखुन योहोवा तुमरे कारण म्हारे पर रिसवाय गीययो, आरू त्यो म्हारी प्रार्थना नी सोमळ्यो; योहोवा कोयलो हुतो, घणो हुयो बस कर; एना वाराम म्हारे सी वात मा करे। पिसगा बोयडा क चोटी पोर चोढ़ जा, आरू उगरवने, बुडेवने, दखेवरे, बखवरे च्यारू मेर निगा कोरीन हेना देश क देख ले; काहकी तू एनी यरदन क पार जाने नि पावसी आरू यहोशू क हुकूम आप दे, आरू हेनाक ढाँढ़स आपिन वातड़ो कोर; काहकी एना मानसो क अगळ अगल हुयोत पार जासे, आरू ज देश तु देखसे ती हामु बेत पओर क अगळ क घाटी मा ठहरे हयला हुता।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.