Dhankavi Bible
व्यवस्थाविवरण 2
जोंगोल मा भटेकनो
तब हेनु हुकूम क ओनसारे, ज योहोवा न मेसेक आप्यो हुतो, हामु फिरिन कूच कोर्यो, आरू रातला दोरीया क वाट क जोंगोल क भिनी गोया; आरू बेस दाहड़ लोगुन सेईर बोयड़ा क खोयड़े खोयड़े चालता रोया। ती योहोवा न मार सी कोयो, तुमू मानसो क एना बोयड़ा क खोयड़े खोयड़े चालता जाईन घोना दाहड़ा बित गोया, हेमू फिरीन दोखेवरा औख्ये चालू। आरू प्रजा क मानसे क मारो यो हुकुम सोमळ्या, कि तुमु सेईर क निवासी आपसा भाई एसावियो क सीमा क पास सी होईन जान पोर होय; आरू हुये तुमरे सी बिह जासे। एकालिय तुमु घोना चौकचोया रोहु; हेनुक झुनी छुडू; काहकी हेन्दरा देश मा सी हाव तुमुरा पायोम मेकने क जागो लोगून नी आपीस, ओस कोरीन कि हाव सेईर बोयड़ा एसावियोम क होको मा कोर देदो छे। तुमु हेनू सी भोजन रुपया सी मुले लिन खाय सोकसू, आरू रुपया आपिन कुँवा सी पानि भोरीन पि सोकसू। काहकी तुमरो परमेश्वर योहोवा तुमरा हातो क आखा कामो क वाराम तुमुक बोरकोत आपतु आवलू छे; एना भारि जोंगोल मा तुमरो चालनो फिरनो हुयो जाने छे; एना चाविस साल मा तुमरा परमेश्वर योहोवा तुमरे साते-साते रोयो छे; आरू तुमु क काई घोटि नी होयी। यो हामु सेईर निवासी आरू आपना भाई एसावियो क पास सी होईन, अराबा क वाट, आरू एलत आरू एस्योनगेबेर क पछळ छुड़िन चाल्या। ओळतन हामु पोछावोळीन मोआब क उजाड़ बयड़ान वाट सी होईन चाल्या। आरू योहोवा न मार सी कोयो, मोआबियो क नी सतावनो आरू नि लोड़ायनो, काहकी हाव हेनदरा देश मा सी काई वी तारा होक मा नी कोर दिस काहकी हाव न आर क लुतियो क ओवलियाद क होको म कोरलो छे। इनू सी पेहले एमी लोगहन वोसला हुता, जे ताकत वाळा आरू गिनती मा सवटा आरू ओनाकी मानसो जोसा ऊँचा हुता; आरू अनाकियों क जोसा हये वि रपाइ गिनाय जाता होता, बाखुन मोआबी हेनुक एमी कोहता छे। आरू पेहला दाहड़ा मा सेईर मा होरी मानसे बोसला होता, बाखिन एसावन अवलियाद हेनुक हेना देश सी निकाळ देदो, आरू आपने सामने सी नष्ट कोरने हेनदरा जागा पोर होये बोस गोया जोसा कि इसराएलीयो न योहोवा क आपला हेना आपना होक क देश मा कोर्यो।) यहोव कयो, हेमी तुमू उठो आरू जेरेद नोदी क पार जावु। आरू हामु जेरेद नदी क पार आ करला हुता। आरू आमरा कादेशबर्ने क छोड़ने सी लीन जेरेद नदि पार होयने लोगुन दुयकोम चाविस साल वित गोया, हेरे विच मा योहोवा क शपथ क ओनसारे हेनी पिढी क आखा योद्धा छावनी मासी नष्ट होय गोया। आरू जब लोगून हुये नष्ट नी हुये ति लगुन योहोवा क हात हेनुक छावनी मासी मिटाय नाखने क लिय ओका विरूद्ध उठलोत् रोयो।
जव सब योद्धा मरते लोगहन क विच मासी मरीन नष्ट हुय गीया, ती योहोवा न मार सी कोयो, तू आर नगरन साते मोआबन सीमा, पार करजी; आरू जब तु अम्मोनियो क सामने जाईन ओका धोड़े पूगीन, ती हेनूक नि सतावनो आरू नी छेड़नो, काहकी हाव अम्मोनियों क देश मासी काई वि तारा होको मा नि कोरीस,काहकी हाव न हेनुक लुत क ओवलियाद क होको मा कोर देदलो छे। हुयो देश वी रपाइयो क गिनो जाय हुतो, काहकी जुनला दाहड़ा मा रपाई, जेनुक अम्मोनी जमजुम्मी कोहता हुता, हुये होंया रोहता हुता; त्या ताकवाळा आरू गिनती मा घण सवटा हुत। त्या अनाकियोन समान ऊँचा हुता। बाखुन योहोवा न एनूक अम्मोनियो क अगळ सी नष्ट कोर नाख्या, आरू हुये हेनदरा हेना देश सी निकाळ देदा, आरू हेना जागा पोर आपसू रोहने लाग्या; जोसो कि पोरबु सेईर क निवास एसाव वंशन करता करलो हुतो, त्यो हेनको सामने होरी देश नष्ट कोर्यो, आरू हुये हेनदरा हेना देश सी निकाळ देदा, आरू आज लोगुन हेना जागा पोर हुये आपसा रोहे। इनीये रीति सी गांव मा रयने वाला अव्वी लोगहन क, जो गाजा लोगुन गाँवो मा वोसला होता, कोप्तोर देश सी निकळ्ला कप्तारी लोगहन क नाश कर दीदो, आरू हेना जागा पोर आपसा रोहने लाग्या। हेमी तुमू उठू आरू गा बढु, आरू अर्नोन क नदी क पार चालु: देखो, हांव देश भैळ हेशबोन क एमोरी राजा सीहोन क तुमरा हात मा कर देसे छे; हेका पर हक मा कर ले, आरू हेना राजा क युद्धन करता भड़कावो। आरू जोतरा मानसे धोरती पोर रोहता छे हेनू सब क मन मा हाव आज क दाहड़ा सी तारे कारण बिक आरू थरथराहट समवाने लागिस; हुये तारो खबर सोमळीन तारा बिक क मारे कापसे आरू माँदा होवसे।
राजा सीहोन क पराजय
(गिनती 21:21-30)
आरू हांव न कदेमोत नावोन जोंगोल सी हेशबोन क राजा सीहोन क पास मेल क यी वात कोहने क दुत मुकले: मेसे आपना देश मासी होईन जाने दे; हाव राजपथ सी चाली जाइस आरू जेवड़िया आरू डाखरिया हाते नी वोविस। तू रुपया लिन मारा हात खानेनचिजे आपजि कि हाव खाम, आरू पानी वी रुपया लेन मेसेक आपजि मे पियो; केवल मेसे पाये चालीन जाने दे, जोसो सेईर क रोहन्या एसावियोम न आरू आर क रोहन्या मोआबीयो न मार सी काय, ओसो हूयू तु मार सी कोर, एने रीते हाव यरदन पार होईन हेना देश मा पुगजाईस ज आमरो परमेश्वर योहोवा आमुक आपे छे।
बाखुन हेशबोन क राजा सीहोन न हामु क आपना देश मासी होईन जाने नी देदो; काहकी तुमरा परमेश्वर यहोव न ओका चित्त वातड़ो आरू ओको मोन हठिला कर देदलो हुतो , एकालिय कि ओको तुमरा हातो म कोरे देये, जोसो कि आज प्रगट छे। आरू योहोवा न मार सी कोयो, सोमोळ, हाव सीहोन आरू हेको देश क तारा होको मा कोरनो शुरु कर दिदलो छे; तू बी हेना देश क आपसा हक म लिन सुरु कोरे। ति सीहोन आपनी आखी सेना भैळ निकळ आयो, आरू आमरो आमनो सामनो कोरीन युद्ध कोरने क यहस लोगुन चोहोढ़ आयो। आरू आमरा परमेश्वर योहोवा न ओको हामरा हातम कर दीदो, आरू हामु न ओका पुर्या आरू आखी सेना भेळ मार नाख्या। हमू उना टेम पर सब नगरो पर हक कर लिदा आरू, आरू एक एक वोसला नगर क बायरा आरू बाळ-बच्चा भेळ याँ लोगुन सत्यनाश कोरयो कि कोय नी वाच्यो; जो नगर हामु हक मा कर लिदलो हुतो, हेनकी लुटन साथ मा हामु पशुन क आपने करीन लुटला हुता। अरोएर नगर सी लीन जो अर्नोन घाटीन छेळ पर छे, आरू उना नगर सी लिन , जो घाटी मा छे, गिलाद लोगुन कुदु नगर हामरी पहुच सी बाहर नी हुतो, काहकी आमरा परमेश्वर योहोवा न आखा क हामरा हको मा कोर देदो। बाखुन हामु अम्मोनियों क देश क धोड़े, बाखिन यब्बोक नदी क पोल धोड़े जोतरा देश छे, आरू पहाड़ी देश क नगर जाँ जाने सी आमरो परमेश्वर योहोवा न आमु क मोना कोर्यो हुतो, होंया हामु नी गोया।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.