व्यवस्थाविवरण 1

होरेब बयड़ा सी निकळनेन हुकुम

1जी वात मूसा न यरदन क पार जोंगोल मा, यानी सूफ क ओगोळ क अराबा मा, आरू पारान आरू तोपेल क विच, आरू लाबान हसेरोत आरू दिजाहाव मा, आखा इसराएलीयो सी कोह्यो हुये यी छे। 2होरेब सी कादेशबर्ने तक सेईर बोयड़ान क वाट ग्यारे दाहड़ा क छे। 3चाविसवे साल क ग्यारवे मोहने क पेहले दाहड़े क हे काइ योहोवा न मूसा क इसराएलीयों क कोहने क हुकुम आप्यो हुतो, ओकाज ओनसारे मूसा हेनु सी वात कयो। 4यानी जोत्यार मूसा न एमोरियो क राजा हेशबोनवासी सीहोन आरू बाशान क राजा अशतारोतवासी ओगळ क एद्रेई मा मार नाख्यो, 5मुसा वाद यरदन क पार मोआब देश मा हुये व्यवस्थान क पुरावो देनो शुरु करियो, 6आमरा परमेश्वर योहोवा न होरेब क पास हामु सी कोयो हुतो, तूमू लोगहन क इना बोयड़ क पास रोहता-रोहता घोना दाहड़ा होय गोया; 7एकालिय हिमी याँ सी कूच कोरू, आरू एमोरियो क बोयड़ा देश क, आरू काय अराबा मा, काय बोयड़ा मा, काय नेहड़ा क देश मा, काय दक्खिन देश मा, काय दोरिया क धोड़े, जोतरा मानसे एमोरियो क धोड़े रोहे छे हेनदरा नेगेव देश क, यानी लबानोन बोयड़े लोगुन आरू परात नावोन महानद लोगुन रोहनेवाळा कनानियो क देश क अगा जाता रोहु। 8देखु, हाव हेना देश क तुमरे ओगोळ देयो; जेना देश क वाराम योहोवा न अब्राहम,इसहाक, आरू याकुब, तुमरा डाहल सी वायदो खाईन कोयो हतो की हाव इनाक तुमूक आरू तुमरे वाद तुमरी ओवलियाद क त्यो देश आपीस, ओका हीमी जाईन हेका पर होक कोर लेवू।

मुसा न लारे न्यायियों क नेवाड़णो

(नीरगमन 18:13-27)

9ओळतेन हेने टेमे हांव तुमरे सी कोयलो हुतो, हांव तुमरा भार क एखलू नी उठाव सोको; 10काहकी तुमरा परमेश्वर योहोवा न तुमुक क याँ लोगून बोड़ायू छे कु तुमू गिनने मा आज वादळा क तारा क जोसा होय गोया। 11तुमरा पितरौ क परमेश्वर तुमूक हजारगुणा आरू वी बोढ़ावे, आरू आपसा बुलोन ओनसारे तुमूक बोरकोत वी आपतु रोहे! 12बाखुन तुमरा परेशानी, आरू भार, आरू तुमरा झगड़ा-रगड़ा क हाव एखलो काँ लोगून वेठ सोको? 13एकालिय तुमू आपना आपना गोत्र मासी ओकोलदार आरू सोमोझवाळा आरू प्रसीद्ध मानुस क नेवाड़ लेवु, आरू हाव हेनुस तुमरे पोर डाहलो कोरीन कोहीस। 14ओका उत्तर मा तुम न मारसी कोया, जो काई तु हामरे सी कोहे छे ओको कोरनो वारू छे। 15एकालिय हाव न तुमरा गोत्र क डाहला मानसो क ज ओकोळवाळा आरू प्रसीद्ध मानुस हुता नेवाड़िन तुमरे पोर मुखिया नेवाड़ कोर्यो, यानी हजार-हजार, सौ-सौ, पचास-पचार, आरू दस-ददस क उपोर डाहला आरू तुमरा गोत्रो क सरदार वि नेवाड़ कोर्यो। 16आरू हेने टेमे मैने तुमरा नियाय कोर्न्या क हुकुम आप्यो, तुमु आपना भास्यो क मुकद्दमा सोमळिया कोरू, आरू ओका विच आरू ओका पड़ोसीयो आरू पारका क विच वी धोरम सी नियाव कोर्या कोरू। 17नियाव कोरते टेमे कुदान पक्ष नी कोरनो, काहकी नियाव परमेश्वर क काम छे;आरू जो मुकद्दमो तुमरे लिय काठो होये, हुयो मारे पास लीन आवे, आरू हाव ओकी सोमळीस। 18आरू मैन हेनेत टेमे तुमरा आखा काम क बताड़ देदो।

गुप्‍तचरों क कादेश-बर्ने मुकलनो

19हामू होरेब सी कूच कोरीन आपना परमेश्वर योहोवा क हुकूम क ओनसारे हेना आखा मोटा आरू भयानक जोंगोल मा होईन चाले, जेनाक तुम न एमोरीयो क पाहड़ियो क पहाड़ी देश क वाट मा देख्यो, आरू हामु कार्देशबर्ने तक आया। 20होंया मैं न तुम सी कोयो, एमोरीयो क पाहड़ी देश तक आय गोया होय जेनाक आमरा परमेश्वर योहोवा आमूक आपे छे। 21देखू, हेना देश क तुमरा परमेश्वर योहोवा तुमरे ओगोळ कोर देता छे, एकालिय आपना पितरो क परमेश्वर योहोवा क बुल क ओनसारे हेना पोर चोहोढ़, आरू हेना आपना होकोम लि ले; नी ते तुमू बिहयू आरू नी तुमरो मोन काचो होये। 22आरू तुमु सब मारे पास आविन कोहने लाग्या, आमु आमरे ओगोळ मानसो क मुकली देसू, ज हेना देश क पोतु लागाड़िन आमु क यो खोबोर आपे, कि काहने वाटे सी होईन चालनो होयसे आरू काहना-काहना नगर मा प्रवेश कोरनो पोड़से? 23इनी वात सी प्रसन्न होईन हाव न तुमरे मा सी बारे मानुष, यानी गोत्र पोछोळ एक मानुश नेवाड़ लेदो; 24आरू हुये बोयड़ा पोर चोहोड़ गोया, आरू एशकोल नावोन नाळा क पुगीन हेना देश क भेद लेदा। 25आरू हेना देश क फलों मासी काहीन हात मा लिन आमरे पास आयो, आरू हामु क यो खोबोय आप्या, ज देश आमरा परमेश्वर योहोवा आमूक आपे छे हुयो वारू छे।

26तेवी तुम न हुया जाने सी मोना कोर्यो, बाखुन आपना परमेश्वर योहोवा क हुकुम क विरुध कर्या 27आपना आपना डेरा मा यो कोहीन कुड़कुड़ाने लाग्या, योहोवा आमरे सी बैर राखे छे, ओस कोरीन हामु क मिस्र देश सी निकाळ ली आयो छे कि हामु क एमोरियो क होक मा करीन आमरा सत्यनाश कर नाखे। 28आमु काँ जाजे? आमरा भास्ये न यो कोहीन आपरा मोन क काचो कोर देदा छे की होंया क मानसे आमरे सी मोटा आरू नाम्बा छे; आरू हेन्दरी शहरपनाह वादळा सी वार कोरे छे; आरू आमु न होंया अनाकवमशियों क वि देख्या छे। 29हाव न तुमरे सी कोयो, हेन्दरे कारन मा बिहयो आरू नी घबरायो। 30तुमरो परमेश्वर योहोवा ज तुमरे अगळ अगळ चाले छे हुये आप तुमरी भिनी सी लोड़ायसे, जोसो कि हुयो मिस्र मा तुमरा देखता तुमरे जुगू कोर्यो; 31ओळतेन तुम न जोंगल मा वि देख्यो कि जेने रिते कोय मानुस आपसा पुर्या क हुचलिन चाले छे, तेने रीते आमरो परमेश्वर योहोवा आमु क इना-इना जागा पोर पुगने लोगुन, हेना आखी वाट मा जेरेसी हामु आया छे, हुचली रोयू। 32इनी वात पोर वि तुम न आपना हेना परमेश्वर योहोवा पोर विश्वास नी कोर्यो, 33ज तुमरा अगळ अगल एकालिय चालतो रोयो कि डेरा डालने क जागू तुमरे लिय हेरे आरू रात क आगठा मा आरू दिसु क वादळा मा प्रगट होईन चाले, ताकी तुमक हुये वाट देखाड़े जेरेसी तुमू चालू।

इसराएली क दण्ड मिळनो

34बाखुन तुमरी यि वात सोमळीन योहोवा क कोप भड़क उठ्यो, आरू हुये यो शपथ खादो, 35खोरी एनि भुन्डी पिढ़ी क मानसो मा सी वि हेना वारला देश क देकने सी पावसे, जेनाक हाव न हेन्दरा पितरों क आपने क शपथ खादलो हुतो। 36योपुन्ने क पुर्य कालेब ही हेनुक देखने पावसे, आरू हेना जागा पोर हेरा पाय पोड़ीया वाँ हांव हेको आरू हेकी ओवलियाद क वि आप दिस; काहकी योहोवा मारे पोछोळ पुरी रिते सी होय लियो छे। 37आरू मार पोर वी योहोवा तुमरे कारण रिसवायो, आरू यो कोयो, तु वी होंया जाने नि पावसे; 38नुन क पुर्य यहोशू ज तारे अगळ उबो रोहे छे, हुयो ते होंया जाने पावसे; एकालिय तू ओको हियाव आप, काहकी हेना देश क इसराएलीयान क हक मा हुयलो कोर देसे। 39ओळतेन तुमरा बाळ- पुर्या जिन्दरा वाराम हाव तुम कोहो कि ये लूट मे चाली जासु, आरू तुमरा जे पुर्या हेमी वारू भुण्डा क भेद नी जाने, हुये होंया प्रवेश कोरसे, आरू हेनुक हाव होयां हुयो देश आपीस , आरू त्या हेका होकदारीया होयसे। 40बाखुन तुमू मानसे फिरिन कूच कोरू आरू रातला दोरीया क वाट सी जोंगोल क भिनि जावू।

41तब तुम न मार सी कोयो, आमु न योहोवा क विरुद्ध पाप कोर्यो छे; हेमी हामु पहाड़ी पर चढसो आरू लड़ाय करसो; जसो योहोवा हुकुम आपलो, तब तुमू आपना आपना होतियार बाँध लीदा। ट्या विचारला हुता कि पहाड़ पर आराम सी चढ जासो। 42तब योहोवा न मार सी कोयो, हेन्दरे सी कोय दे कि तुमू मा चोढ़ु, आरू मा लोड़ायू; काहकी हाव तुमरे विच मा नी होय; काहमाइन ओसो नी होय की तुमु आपना दुसमोल सी हार जावु। 43यी वात हांव तुमरे सी कोय देदो, बाखुन तुमू नी मान्या; बाखुन ढिठाई सी योहोवा क हुकुम क नी मानिन बोयड़ा पोर चोढ़ गोयो। 44तब हेना बोयड़ क रोहन्या एमोरियो न तुमरो सामनो करने क निकळीन मधुमक्खियों क जोसा तुमरो पोछोळ कोर्या, आरू सेईर देश क होर्मा लोगून मारता-मारता चाली आया। 45तब तुमू पोछा आळिन योहोवा क अगळ रोड़ने लाग्या; बाखिन योहोवा न तुमरी नि सोमळ्यु, नी तुमरी वात पोर कान लागाड़्यू। 46आरू तुम कादेश मा घोना दाहड़ा लोगुन रयनो पड़ीयो, तुमु घन दाहड़ा तक वाँ रया।