गिनती 36

सलोफाद क पुरायटा क वाटो

1ओळतेन यूसुफियों क कुळों मा सी गिलाद, ज माकीर क पुर्य आरू मनश्शे क पोतो हुतो, ओक ओवलियाद क कुळ क पितरों क घोराना क खास-खास मानसो मूसा क पास जाईन हेनू डाहला क ओगळ, ज इसराएली क पितरो क घोराना क खास मानसे हुता, कोहने लाग्या, 2“यहोवा न आमरि पोरबु क हुकुम आप्यो हुतो, की इसराएली क चिट्ठी नाखीन देश वाट देजो; आरू योहोवा क यो वी हुकुम हामरा प्रभु क मिळी, की आपमरा सकुळी सलोफाद क वाटो ओकी पुराय क आपजो। 3बाखून काहमाइन हुये इसराएली क आरू काहना कुळ क मानसो सी छाक होये,ती ओको वाटो हामरा पितरो क वाटा सी छुट जासे, आरू जेना कुळ मा हुये छाक कोरे तेनात कुळ क वाटो मिळ जासे; ती आमरो वाटो घोट जासे। 4आरू जब इसराएलियों क जुबली1 होयसे, ती जेना कुळ मा हुये छाक कोरे ओका वाटा मा ओक वाटो पाक्के रीते सी मिळ जासे; आरू हुये आमरा पितरो क कुळ क वाटा सी सदा क लिय छुट जासे।” 5तब योहोवा सी हुकुम पाविन मूसा न इसराएलियों सी कोयो, “यूसुफियों क कुळी ठिक कोहे छे। 6सलोफाद क पुराय क वाराम योहोवा न यो हुकुम आपलो छे,की ज वर जेरी निगाह मा वारू लागे हुये हेरेसी छाक कोर लेये; बाखिन हुये आपसो खास मानुस त क कुळ क कुळ मा छाक होये। 7आरू इसराएलियों क काहना कुळ क वाटो दिसरा कुळ क वाटा मा न मिळने पावे; इसराएलि आपना आपना खास मानसो क कुळ क वाटा पोर बोनलो रोहे। 8आरू इस्रालियों क काहना कुळ मा काहनी पुराय क ज वाटो जोड़नेवाळी होय, हुयो आपनात मूलमानूस क कुळ क काहना मानसो सी छाक होये, एकालिय की इसराएली आपना आपना खासमानूस क वाटा क होकदारीयो रोहे। 9काहना कुळ क वाटो दिसरा कुळ क वाटा मा मिळने नी पावे; इसराएलियों क एक एक कुळ क मानसे आपना आपना वाटा पोर बोनलो रोहे।” 10योहोवा क हुकुम क ओनसारे ज हुयो मूसा क सलोफाद क पुरायू कर्या। 11यानी महला, तीर्सा, होग्ला, मिल्का, आरू नोआ, जो सलोफाद क पुराय होती,हुये आपना‍ चचेरा भास्यो सी छाक कोर्यो। 12हुये यूसुफ क पुर्य मनश्शे क ओवलियाद क कूलों मा छाक होयी, आरू ओका वाटा ओकज खासमानसो क कुळ क कुळ क होकदारीया बोनला रोहे।

13ज हुकुम आरू कायदा योहोवा न मोआब क अराबा मा यरीहो क पास यरदन नदी क तट पोर मूसा क लारे इसराएलियों क आप्यो च येत छे।