व्यवस्थाविवरण 33

मूसा क इसराएलीयों क बोरकोत आपनो

1ज बोरकोत परमेश्वर क जन मूसा न आपनी मोत सी पेहेल इसराएलीयों क आप्यो च यो छे। 2हुयो कोयो,

योहोवा सीनाय बोयड़ा सी आयो, आरू सेईर सी ओक

लिय उदय हुयो;

हुयो पारान बोयड़ा पोर सी आपनो तेज देखाड़्यो,

आरू लाखो चुखला क विच मा सी आयो,

ओक जेवड़ीया हात सी ओक लिय ज्वालामय

विधियाँ निकळी।

3हुयो छाचिन देश देश क मानसो सी मोंग कोरतो छे;

ओक सब चुखला मानसे तारा हात मा छै:

हुये तारा पायो क पास बोठला रोहे छे,

एक एक तारा वचन सी लाभ उठावे छे।

4मूसा न आमुक वेवोसता आप्यो, आरू हुय याकुब क

मोण्डळी क निज वाटो कोहायो।

5जब प्रजा क खास-खास मानुष, आरू इसराएली

क गोत्री एक पुठी होईन एकठा हुया,

तब हुये यशुरुन मा राजा ठहर्यो।

6“रुबेन नी मोरे, बाखुन जिवतलो रोहे, तेवी ओक

याँ क मानसे थुड़ा होय।”

7आरू यहुदा पोर यो बोरकोत हुयो ज मूसा न कयो,

“हे योहोवा, तु यहूदा क सोमळ,

आरू हेना ओक मानसो क पास पुगाड़्यो।

हुयो आपने लिय आप आपने हातो सी लो़ड्यो,

आरू तू त ओक द्रोहियो क विरुद्ध ओक सहायक होय।”

8ओळी लेवी क वाराम हुयो कयो,

“तारा तुम्मीम आरू ऊरीम तारा भक्त क पास छे,

जेको तु न मस्सा मा पारोख लेदो,

आरू जेक पुठी मरीबा नावोन जसोता

पोर तारो वादविवाद हुयो;

9हुयो त आपना आया बाबा क वाराम मा कयो,

‘हाव ओको नी जानतो;’

आरू नी त हुयो आपना भाइस्यो क उळख्यो

मानो, आरू न आपना पुर्या क उळख्यो।

काहकी हुयो तारी वाते मानी, आरू हुयी तारी

वाचा क पाळन कोरे छे।

10हुये याकुब क तारा कायदा, आरू इसराएली क

तारी वेवोसता सीकाड़नसे;

आरू तारे अगळ धूप, आरू तारी वेदी पोर

आखो डुर क होमबलि कोरसे।

11हे योहोवा, ओकी सम्पत्ति पोर बोरकोत आप,

आरू ओक हातो क चाखरी क ग्रहण कोर;

ओक विरोधियों आरू बैरियों क कमर

पोर ओसो मार की हुये ओळी नी उठ सोके।”

12ओळी हुयो बिन्यामीन क वाराम मा कोयो,

“योहोवा क हुयो प्रिय जन, ओक पास

विगर बिहये रोहसे;

आरू हुयो दाहड़ो भरीन हेर पोर छाया कोरसे,

आरू हुयो ओक कांधा क विच रोया कोरे छे।”

13ओळी युसुफ क वाराम हुयो कयो,

“एरो देश योहोवा सी बोरकोत पावे,

यानी आकाश क किमती चीज

आरू ओस,

आरू हुय उंडा पानी ज नेचो छे,

14आरू दाहड़ा क पकाया हुया किमती फोव,

आरू ज किमती चीज मौसम क उगाड़ला उगे छे,

15आरू प्राचीन बोयड़ा क वारू चीज,

आरू सनातन बोयड़ा क किमती चीज,

16आरू कळ आरू ज किमती चीज हेरेम भोर्या छे,

आरू ज झाड़ी मा रोहतो हुतो ओकी प्रसन्नता।

एनू सब क वाराम युसुफ क मुनका पोर,

यानी ओक मुनका क चाँद पोर,

ज आपना भाईस्यो सी न्यारो हुयो हतो

बोरकोत तुत बोरकोत फळे।

17हुयो प्रतापी छे, मानू गाय क पहिलौठ छे,

आरू ओक सींगड़ा बनैले बयल्या क समान छे;

हेनुक हुयो देश देश क मानसो क, बाखुन

कळ क छोर लोगुन क सब मानुसो

क धोकळसे;

हुये एप्रैम क लाखो लाख,

आरू मनश्शे क हजारो हजार छे।”

18ओळी जबूलून क वाराम हुयो कयो,

“हे जबूलून, तू बाहर निकळते टेमे,

आरू हे इस्साकार, तू आपना डेरो मा

खुशी कोरे।

19हुये देश देश क मानसो क बोयड़ा पोर बुलावसे;

हुये होंया धर्म बादा करसे;

काहकी हुये दोरीया क धन, आरू बालू मा

छिपायला हुया किमती चीज सी

लाभ उठावसे।”

20ओळी गाद क वाराम हुयो कयो,

“सोयाळो हुयो छे ज गाद क वोदाड़े छे!

गाद त सींहनी क जसो रोहे छे,

आरू बाँह क, वरन मुनका क चाँद

लोगुन क फाड़ नाखे छे।

21आरू हुयो पेहलो वारलो त भाग

लिय नेवाड़ लेदो,

काहकी होंया रईस क योग्य वाटो मेकलो हुतो;

तब हुयो प्रजा क खास-खास मानसो क

पुठी आविन योहोवाक

ठहरायो हुयो धरम, आरू इसराएली क पुठी

होईन ओक कायदा क

प्रतिपाळन कोर्या।”

22ओळी दान क वाराम हुयो कयो,

“दान त बाशान सी कुदनेवाळा नाहार क पिलो छे।”

23नप्ताली क वाराम हुयो कयो

“हे नप्ताली, तू ज योहोवा क प्रसन्नता सी आफरलो,

आरू ओकी बोरकोत सी भरपूर छे,

तू पश्‍चिम आरू दक्षिण क देश क

होकदार होये।”

24ओळी आशेर क वाराम मा हुयो कयो,

आशेर पुर्या क वाराम मा बोरकोत जोड़े;

हुयो आपना भास्यो मा मोंगावो रोहे, आरू

आपना पाय जेतुन तेल मा डुबाड़े।

25तारा जुता आरू पितळ क होयसे,

आरू जोसा तारा दाहड़ा तासी तारी शक्ती होये।

26“हे यशुरुन, परमेश्वर क जसो आरू

कुई नी छे,

हुयो तारी सहायता करने क वादवा पोर,

आरू आपनो प्रताप देखाड़तो हुयो

आकाशमण्डल पोर सवार होईन चालतो छे।

27अनादि परमेश्वर तारो घोरून धाम छे,

आरू नेचो सनातन भुजाएँ छे।

हुयो दुसमोल क तारे सामने सी निकाल देये,

आरू कोहतो छे, ओक सत्यानाश कोर दे।

28आरू इसराएली निडर बसलो रोहे छे,

ओन आरू नोवलो दाखमधु क देश मा

याकुब क सोता एखलो त रोहतो छे;

आरू ओक उपोर क आकाश सी ओस पोड़्या कोरे छे।

29हे इसराएली, तू काय त सोयाळो छे!

हे योहोवा सी छुटकारो जोड़ली प्रजा,

तारे जसो कुन छे?

हुयो त तारी सहायता क लिय ढाल,

आरू तारा प्रताप क लिय तलवार छे;

तारा शत्रु तुख सराहेंगे,

आरू तू ओक ऊँचा जागा क रोंदसे।”