व्यवस्थाविवरण 34

मूसा नू मौत

1अळतेन मूसा मोआबन अराबा सी नबो बयड़ा पोर ज पिसगान एक चोटी आरू योरीहोन अगळ छे, चोहोड़ गयो; आरू योहोवा न ओक दान लोगुन क गिलाद नावोन आखो देश, 2आरू नप्ताली क आखो देश, आरू एप्रैम आरू मनश्शे क देश, आरू बुडेवने क दोरीया लोगुन क यहूदा क आखौ देश, 3आरू नेगेब देश, आरू सौअर लोगुन योरीहो नावोन खजूरवाळा नगर क तराई, यो सब देखाड़्यो। 4तोत्यार योहोवा न हेरेसी कोयो, जेना देश क वाराम हाव न अब्राहम, इसहाक, आरू याकुब सी शपथ खाइन कयो हुतो, की हाव एनाक तारा ओवलियद क आपीस हुयो योंत छे। हाव न ओक तुसे साक्षात देखाड़ देदलो छे, बाखून तू पार होईन होंया नी जाय पावीस। 5तोत्यार योहोवा क कहने क ओनसारे ओक दास मूसा होंया मोआब क देश मा मोर गोयो, 6आरू हुयो ओक मोआब क देश मा बेतपोर क सामने एक तराई मा धुळू आप्या; आरू आज क दाहड़े लोगुन कोय नी जानतो की ओकी कोबोर काँ छे। 7मूसा आपनी मौत क टेमे एक सौ बीस साल क हुतो; बाखुन नि ती ओका डुळा धुँदरा पोड़्या, आरू नि ओक पौरूष घोट्यो हुतो। 8आरू इसराएली मोआब क अराबा मा मूसा क लिय तीस दाहड़ा लगुन रोड़ता रोया; तोत्यार मूसा क लिय रोड़ने आरू विलाप करने क दाहड़ा पुरा हुया।

9आरू नुन क पुर्य यहोशू बुद्धिमानी की आत्मा सी भरायला हुतो, काहकी मूसा न आपसा हात हेना पोर मेकलो हुतो; आरू इसराएली हेनू हूकुम क ओनसारे ज योहोवा न मूसा क आप्यो हुतो ओक मानता रोया। 10आरू मूसा क जसो इसराएली मा ओसो कोय कागळीयो नी उठ्यो, जेरेसी योहोवा न आंबा-सांबा वात कोर्या, 11आरू ओक योहोवा न फिरौन आरू मीसर क सब कामकोरन्या क सामने आरू ओका आखा देश मा, आखी सोहलानी आरू चिन्ह चमत्कार करने क मुकल्यो हुतो, 12आरू मूसा आखा इसराएलीयो क निगाह मा ताकोतवाळो हात आरू मोटी बिक क काम करीन देखाड़्यो।