व्यवस्थाविवरण 32

1हे वादळा, कानटा लागाड़, की हाव कोहो; आरू हे कळ , मारे मुय क वात सोमोळ। 2मारो उपदेश मेंह क जसो बरसेग, आरू मारि वात ओस क जोसी टपकसे, जोसी की निळ्ळो खोडो पोर झींसी, आरू पौधा पोर झड़ियाँ।

3हाव त योहोवा नाव क घोषणा कोरीस। तूम आपसो परमेश्वर क महिमा क मानु! 4हुयो चाफरिया छे, ओक काम छाचो छे; आरू ओकी आखा रस्ता नियाव कोर्यो छे। हुयो खोरलो भोगवान छे, हेरम कुटिलता नी, हुयो न्यायी आरू सीदो छे। 5बाखुन एनी राष्ट्र क माने टेढ़ा आरू तिरछा छे; ये बिगोड़ गोया, ये ओका पुर्या नी; ये ओक कलंक छे।

6हे मुढ़ आरू विनोकल्या मानसे, काय तुमू योहोवा क यो बदलो आपता होय? काय हुयो तारो बाबो नी छे, ज तुख क मोल लिदो छे? हुयो तूक बोनायो आरू स्थिर वी कोर्य छे। 7प्राचिनकाल क दाहड़ा क फोम कोरू, पीढ़ी पीढ़ी क सालो क पुछु; आपना बाप सी पूछू, आरू हुयो तुमू क बताड़ो; आपना डाहडा मानसो सी सोवाल कोरू, आरू हुये तुख सी कोय देसे।

8जब परमप्रधान न एक एक राष्ट्र क निज वाटो वाट देदो, आरू लोगहन क अळग-अळग वसाड़ियो, तब हुयो देश देश क मानसो क सीमाएँ इसराएलीयों क गिनती क ओनसारे कोहाये।

9काहकी योहोवा क अंशट ओकी प्रजा छे; याकुब ओक नेवाळलो हुयो निज वाटो छे।

10हुयो ओक जंगल मा, आरू सुनसान आरू गरजनेवाळा सी भोरायली होयी मरुभूमी मा पायो; हुयो ओक च्यारू मेर रहीन ओकी गुवाळी कोर्यो, आरू आपना डुळा क पापन्या क जसो ओकी सुधी राख्यो। 11जसो उकाब आपना पुतरा क हालवि हालविन आपना पिला क उपोर-उपोर उड़ावसे, तसोत हुयो आपना पाखड़ा फैलाविन ओक आपना पाखड़ा पोर हुचोल लिदो। 12योहोवा अकेलो त ओकी अगवाय कोरतो रोयो, आरू ओक पुठी कोय पारको देवता नी हतो। 13हुयो ओक कळी क उचा उचा जागा पोर सोवर कोरायो, आरू ओक खेतों क उपज खावाड़्यो; हुयो ओक चट्टान मा सी मधु आरू चकमक क‍ चट्टान मा सी तेळ चुसाड़्यो।

14गायो क दही, आरू गाडरा-बुकड़ा क दुध, मेम्नों क चोरबी, बुकड़ा आरू बाशान क राष्ट्र क मेढ़े, आरू गोंहोव क वारू सी वारू पीठो वी; आरू तू दाखरस क मधु पिया कोरतो हुतो। 15बाखुन यशुरुन मोटो होईन लात देने लाग्यो; तू मोटो आरू ह्रष्ट-पुष्ट होय गोयो, आरू चोरबी सी छाय होयो छे; तब हुयो आपना बोनावन्या परमेश्वर क तज आप्यो, आरू आपना उद्धारन चट्टान क तुच्छ जाने।

16हुये पारका देवताओं क मानीन हेरेम जलन उपजाई; आरू घाड़ाय काम करीन ओक रीस आपाड़्यो।

17हुयो पिशाचों क लिय ज परमेश्वर नी हुता बली चाढ़ावे, आरू ओक जुगु हुये ओनजान्या भोगवान हुता, हुये ते नोवली-नोवली आत्मा हुता ज इतराकत दाहड़ा सी उबजला हुता, आरू जेनुसी ओक पुरखा कोदी बिहये नी। 18जेनी चट्टान सी तू पोयदा हुया ओक तू विसरी गयो, आरू परमेश्वर जेरेसी तारी पोयदावारी होये ओक वी तू विसरी गयो छे। 19एनी वातो क दे खिन योहोवा न ओक तुच्छ जान्यो, काहकी ओक पुर्या-पारी न ओक रिस आपाड्या हुता। 20तब हुयो कयो, हाव हेनुसी आपनो मुख साताड़लिस, आरू देखीस कि ओक नास कोसो होयसे, काहकी एनी राष्ट्र क मानसे घोना टेढ़ा छे आरू धोखौ आपनेवाळा पुर्या छे खोरा नी हय। 21हुये ओसी चिज मानीन ज ईश्वर नी हय, मारेम जलन पोयदा कोर्या, आरू आपनी व्यर्थ चिजो क लारे मेसे रिस आपाड़्यो। एकालिय हाव वी ओक लारे ज मारी प्रजा नी छे ओक मन मा जळन पोयदा कोरिस; आरू एक मूढ़ राष्ट्र क लारे ओक रीस आपाड़िस।

22काहकी मारा कोप क आगठो भोड़की उठे छे, ज पाताळ क तह लोगुन धोपती जासे, आरू कळ आपनी उपज भेळ भस्म होय जासे, आरू बोयड़ा क नीवों मा वी आगठो लागाड़ देसे। 23हाव हेनू पोर पिड़ा पोर पिड़ा मुकलीस आरू हेनू पोर हाव आपनी सब तीरों क छुड़ीस।

24हुये भूख सी पातळा होय जासे, आरू अंगारो सी आरू वातड़ा महारूगो सी ग्रसीत होय जासे; आरू हाव हेनू पोर डुरो क दात लागाड़िस, आरू धुली पोर रेंगनेवाळा घोड़सा क जहर छुड़ दिस।

25खोयड़े हुये तलवार सी मरसे,

आरू बीकोन क धोड़े सी;

काय छोल्ला एने

काय छल्ली, काय दूद पिन्या पुर्या

आरू काय पाक्को बालवाळा, सब एने

भातिन बरबाद होयसे।

26मैन कयो हुतो, की मे ओक नांबे नांबे लोगुन

तितर-बितर कोरिस,

आरू मानुस मा सी ओको फोम लोगुन मिटाय दिस;

27बाखुन मक दुसमलो क चिढ़ क बिक हुतो, ओसो नी होये की द्रोही ओको उलटो सोमझिन यो कोहने लाग्या, हामु आपना त बाहुबल सी प्रबल हुयो, आरू हुये सब योहोवा सी नी हुयो। 28यी राष्ट्र युक्तिहीन ते छे, आरू हेरेम सोमझ छे त नी। 29भलो होये की यो ओकलवान होये, की ओक समझ लेये, आरू आपसो नास क विचार कोरता! 30काहमाइन ओकि‍ चट्टान त ओक नी वेच देतो, आरू योहोवा ओक दिसरा क हात मा नी कोर देतो; ती यो कोसो होय सोके की ओक हजार क पोछो एकक मानुस कोरतो, आरू ओक दस हजार क दुय मानुस डासाढ़ देये?

31काहकी जसो आमरी चट्टान छे तोसी ओक चट्टान नी छे, चाहे आमरा दुसमोल त काहा नी नियायी होय। 32काहकी ओकी दाखलता सदोम क दाखलता सी निकळी, आरू गमोरा क दाख क वाड़ी मा कोर्यो छे; ओकी दाख जहर भरली, आरू ओक गुच्छा कोड़वा छे, 33ओक दाखमधु घोड़सा क सो जहर, आरू काळ्ळा घोड़सा क सो घातक छे।

34काय यो वात मारा मन मा राखली छे, आरू मारा भण्डारो मा मुहरबन्द नी छे?

35पलटो लेनो आरू बदलो देनो मारात काम छे, यो ओक पाय फिसड़ने क टेमे प्रगट होयसे; काहकी ओकी पिड़ाक दाहड़ो निकट छे, आरू ज दु:ख हेनु पोर पड़नेवाळो छे, हुये छाटात आय रोया छे।

36काहकी जब योहोवा देखसे कि मारी प्रजा क शक्ति राष्ट्र रोही, आरू काय बन्धुआ आरू काय स्वाधीन, ओक कुई वाच नी रोयो, तब योहोवा आपना मानसो क नियाव कोरसे, आरू आपना दासो क वाराम तरस खासे। 37तब हुयो कोहसे, ओक देवता का छे, यानी हुयो‍ चट्टान काँ जेर पोर ओक भुरसो हुतो,

38ज ओक बलिदानन चर्बी खाता हुता, आरू ओक चड़ावा क दाखमधु पीता हुता? हुयेत उठिन तुमरी मोतोत कोरे, आरू तुमरी आड़ होये! 39एकालिय हेमी तुमू देख लेवू की मैत हुयो छे, आरू मारे पुठी कोय देवता नी: मैत मार नाकतो, आरू हाव जिवाड़ो वी ; हाव त घायल कोरतो, आरू हाव त आरगो वी कोरतो ; आरू मारा हात सी कोय नी छुड़ सोकतो।

40काहकी हाव आपनो हात सोरोग क भेनी उठिन कोहतो छे, काहकी हाव अनन्त काल लिय जीवतलो छे, 41एकालिय काहमाइन हाव विजवी क तलवार पोर सान धोरीन झलकाड़ो, आरू नियाव आपना हात हाव ली लोम, ती आपना द्रोहियों सी बोदलो लीस, आरू आपना बैरियो क बोदलो आपीस।

42हाव आपना तीरो क लूहुय सी मतवाळो कोरिस, आरू मारी तलवार मांस खासे- हुयो लुहुय मार्या हुया आरू बांदायला क, आरू हुयो मांस शत्रुओं क नांबा झोटा वाळा प्रधानो क होयसे।

43“ हे राष्ट्र-राष्ट्र क मानसे, ओकी प्रजा क सात खुशी मनावू; काहकी हुयो आपना दासो क लूहुय क पलटो लेसे, आरू आपना द्रोहियों क बोदलाव देसे, आरू आपना देश आरू आपनी प्रजा क पाप क लिय ढाप देसे।”

44एना गीत क सब बुल मूसा न नुन क पुर्या यहोसु भेळ आविन मानसो क सोमवाड़ियो।

मूसा क आखरी निर्देश

45जब मूसा यो बुल सब इसराएलीयों सी कोय चुक्यो, 46तोत्यार हुयो हेनुक कोयो, “जोतरी वाते हाव आज तार सी चिताकोरीन कोहो हेनू सब पोर आपनो आपनो मन लागाड़ु, आरू ओक यानी एनी वेवोसता क आखी वातो क मानने मा चौकचोया कोरने क हुकूम आपना पुर्या क आपू। 47काहकी यो तुमरे लिय व्यर्थ काम नी, बाखुन तुमरो जीवन त छे, ओसो करने सी हेना देश मा तुमरी उमोर क दाहड़ा घोना होयसे, जेरा होकदारीया होयने क तुमू यरदन पार जाय रोया होय।”

48ओळी तेने दाहड़े योहोवा न मूसा सी कोयो, 49“हेना अबारीम बोयड़ा क नबो नावोन चोटी पोर, ज मोआब देश मा योरीहो क अगळ छे, चोहड़िन कनान देश, जेनाक हाव इसराएलीयों क निज भूमी कोर आपो छे, ओक देख लेवू। 50ती जोसो तारो भाईस हारून होर बोयड़ा पोर मोरीन आपना मानसो मा मिळ गोयो, तोसोत तू एना बोयड़ा पोर चोहड़िन मोर जासे, आरू आपना मानसो मा मिळ जासे। 51एरो कारण यो छे की सीन जंगल मा, कादेश मरीबा नावोन सोता पोर, तुमू दुयू न मारे गुणा कोर्यो, काहकी तुम न इसराएलीयो क विच मा मक चुखो नी कोहाये। 52एकालिय हुयो देश ज हाव इसराएलीयो क आपो छे, तू आपना सामने देख लेसे, बाखुन होंया जाने नी पावसे।”