व्यवस्थाविवरण 31

यहोशू मूसा क हकदार

1मूसा न जाईन यी वात इसराएलीयों क सोमवाड़ियो। 2आरू हुयो ओक यो वी कयो, “आज हाव एक सौ विस साल क छे; आरू हेमी हांव चाल फिर नी सकतलो; काहकी योहोवा न मार सी कोयो छे, कि यो तूको इनी यरदन नदीन पार नी जावाये। 3तारे अगळ पार जाने वाळो तारो परमेश्वर योहोवा त छे; हुयो हेनु राष्ट्र क तारे अगळ सी नष्ट कोरसे, आरू तू ओकज देश क होकदारीयो होयसे; आरू योहोवा क बुल क ओनसारे यहोशू तारे अगळ अगळ पार जासे। 4आरू जोस कोरीन योहोवा न एमोरियो क राजा सीहोन आरू ओगळ आरू ओकज देश क नाष कोर्यो छे, ओस कोरिन हुयो हेनू सब जतियों सी वी कोरसे। 5आरू जब योहोवा ओक तार सी हाराय देसे, ती तुम हेनु आखी हुकुमो क ओनसारे हेनुक करनो ज हाव न तुम क समवाड़ियो छे। 6तू हियाव बाँद आरू वातड़ू होय, हेनसी मा बिहये आरू नी भयभीत होय; काहकी तारे पुठी चालनेवाळो तारो परमेश्वर योहोवा छे; हुयो तुख धोको नी आपसे आरू नी छुड़से।”

7तब मूसा न यहोशू क बुलावीन सब इसराएलीयों क अगळ कोयो, “तू हियाव बांध आरू वातड़ो होय जा; काहकी एनू मानसो क पुठी हेना देश मा ज योहोवा न ओक पुर्वजों सी वायदो खाईन आपने क कयो हुतो तू जाइस; आरू तु एनूक ओक होकदारीयो कोर देसे। 8आरू तारे अगळ अगळ चालनेवाळो योहोवा ; हुयो तारे पुठी रोहसे, आरू नी त तुख धोखू आपसे आरू नी छुड़से; एकालिय मा बिहये आरू तारो मोन काचो नी होय।”

हर सातवे साल वेवोसता क भन्यो जानो

9ओळी मूसा न यी वेवसता लिखिन लेवीय याजको क, ज योहोवा क वाचा क पेटारो चुटनेवालळा हुता, आरू इसराएली क सब डाहला मानसो क सौंप देदा। 10तब मूसा न ओक हुकूम आप्यो, सात सात साल क वितने पोर, यानी छुटकारा क साल मा झोपड़ीवाला तिहवार पोर, 11जब सब इसराएली तारा परमेश्वर योहोवा क हेना जागा पोर जेनाक हुयो नेवाड़ लेसे आविन एकठा होये, ती यी वेवोसता सब इसराएलीयों क भोनिन सोमवाड़नो। 12काय अदमी, काय बायर, काय बाळ, काय तुमरा नगरन माहता रयने वाळा पारको, सब मानसो क एकठो करने क हुये सोमळिन सीके, आरू तुमरो परमेश्वर योहोवा क बिक माने, एनी वेवसता क आखा बुल क पाळन करने मा चोकसी कोरे, 13आरू ओक पुर्या जे यी बात नी सोमळ्या हुये वी सोमळिन सीखे, की तुमरा परमेश्वर योहोवा क बिक हेने टेमे लोगुन मानता रोहू, जब लोगुन तुम हेना देश मा जिवतला रोहू जेरो होकदारीयो होयन क तुमू यरदन पार जाय रोया होय।

मूसा क योहोवा क आखरी हुकूम

14ओळी योहोवा न मूसा सी कोयो, तारे मरने क दाहड़े धोड़े छे; तू यहोशू क बुलाव, आरू तुमू दुयो मिलापवाळा तम्बू मा आवीन हजर होये की हाव ओक हुकूम आपो। तब मूसा आरू यहोशू जाईन मिळापवाळा तम्बू मा हजुर होया। 15तब योहोवा न हेना तम्बू मा वादळ क खाम्बा मा होईन दर्शन आप्यो; आरू वादळा क खाम्बा तम्बू क झपला पोर ठहर गोयो।

16तब योहोवा मूसा सी कयो, तू ते मरनेन बाद मा थारा डाहडा न क साथ मा भेसकाय जाने पोर छे; आरू ये मानसे उठिन हेना देश क पारका देवता क पोछोळ, जेनका विच मा जाईन रोहसे, व्यभिचारी होय जासे, आरू मक त्यागिन हेनी वाचा क ज मैन हेनूसी बाँदली छे तुड़से। 17हेने टेमे मारो कोड एनू पोर भौड़कसे, आरू हाव वी एनूक त्यागिन एनूसी आपनो मुय साताड़ लिस, आरू ये आहार होय जासे; आरू घोनी सी पीड़ा आरू क्लेश एनू पोर आय पोड़से, याँ लोगुन की ये हेने टेम कोहसे, काय यी पीड़ा हामु पोर ओस करिन ते नी आय पोड़े, काहकी आमरो परमेश्वर आमरा विच मा नी रोयो? 18हेने टेमे हाव हेनू सब बुराईयो क कारन ज ये पारका देवताऔ क भैनी फिरिन कोरसे, नि:संदेह हेनुक आपना मुय साताड़ लेसे। 19एकालिय हेमी तुमू यो गीत लिख लेवू, आरू तू एनाक इसराएलियो क सीकाड़िन वारू फौम कोर देजी , एकालिय की यो गीत जोक विरूद्ध मारो गोवा रोहसे। 20जब हाव ओक हेना देश मा पुगाड़से जेना देश क हाव न ओक डाहडा सी शपथ खादो हुतो, आरू जेरेम दुध आरू मधु क धाराएँ उहवे छे, आरू खाता-खाता ओक पेट भोराय जाय, आरू हुय आरगा ढोट होय जासे; तोत्यार ये पारका देवताओं क भेनी फिरिन ओकी उपासना कोरने लागसे, आरू मारो तिरस्कार करिन मारी वाचा क तुड़ देसे। 21बाखुन हेमी वी जब हाव एनूक हेना देश मा जेरे वाराम हाव न शपथ खादलो छे, पुगाड़ नी चुक्यो, मेसे मालुम छे कि यो काय कल्पना कोर रोया छे; एकालिय जब घोनी सी पीड़ा आवे क्लेश एनू पोर आय पोड़से, तब यो गीत एनू पोर गोवा आपसे, काहकी ओकी ओवलियाद ओक वी नी विसरसे। 22तब मूसा न तेनेत दाहड़े यो गीत लिखिन इसराएलियो क सीकाड़ियो।

23आरू योहोवा न नुन क पुर्य यहोशू क यो हुकुम आप्यो, हियाव बांध आरू वातडो होय; काहकी इसराएलियो कक हेना देश मा ज हेनुक आपने क हाव न हेनुसी शपथ खादलो छे तू पुगाडीस; “आरू हाव आप तारे पूठी रोहीस।”

24जब मूसा एनू वेवसता क बुल क आदि सी नास लोगुन किपात मा लिख चुक्या, 25ती मूसा योहोवा क पेटारो चुटनेवाळो लेवीयो क हुकूम आप्यो, 26वेवसता क एनू किपात क लिन आपना परमेश्वर योहोवा क वाचा क पेटारो क पास मेक देवु, की यो होया तारे पोर गोवा आपता रोहे। 27काहकी तारो बलवो आरू हठ मेसे मालुम छे; देखू, मारे जिवतलो आरू पुठी रोहते हुवे वी तुमू योहोवा सी बलवो कोरता आया होय; ओळी मारे मरने क वादविवाद काहा नि कोरसु! 28तुमू आपना गोत्र क सब डाहला मानसो क आरू आपना सरदारो क मार पास एकठा करू की हाव ओक यो बुल सोमवाड़िन ओक विरुद्ध वादळा आरू कळ दुयो क गवा बोनावू। 29काहकी मेसे मालुम छे की मारी मौत क वाद तुमु छाचीन बिगड़ी जासु, आरू जेनी वाट मा चालनो क हुकुम आपो मी न तुक समवाड़ियो छे ओक वी तुम छुड़ देसू; आरू आखरी क दाहड़ा मा जब तुम हुयो काम करी ज योहोवा कक निगाह मा भुंडो छे, आपनी बुराई हयली चीजो क पूजा करिन ओक रीस देवाड़सू, तब तुमरे पोर पीडा आय पोड़से।

मूसा क गीत

30तब मूसा न इसराएलिया क आखी सभा क एना गीत क बुल सुरू सी आखरी लोगुन कहीन समवाड़े: