व्यवस्थाविवरण 30

बोरकोत आरू पुनर्स्थापना क शर्तें

1“ओळी जब बोरकोत आरू शरापन यी सब वात जो हांव तुको कयीन समळाड़लो छे, त्यो थारे पर घटे, आरू हेनू सब राष्ट्र क वीच मा रोहिन, जाँ तारो परमेश्वर योहोवा तार क जबरजस्ती पुगाड़से, एनी वात क फोम कोरे, 2आरू आपनी ओवलियाद भेळ आपना आखा मोन आरू आखा जिवसी आपना परमेश्वर योहोवा क भेनी फिरि ओक पास लौट आवे, आरू एनू सब हुकुम क ओनसारे ज हाव आज तुख सोमवाड़ो छे हेकी वात पाळनी करे; 3तोत्यार तारो परमेश्वर योहोवा तुख क बाँदाईइ सी पोछो ली आवसे, आरू तार पोर दोया करीन हेनू सब देशो क मानसो मा जेनुक विच मा हुये तुख तितर बितर कर देसो ओळी एकठो कोरसे। 4चाहे कळिन क छोर लोगुन तारो बरबस पुगाड़नो जानो होय, ती वी तारो परमेश्वर योहोवा तुख क होंया सी ली आवीन एकठो कोरसे। 5आरू तारो परमेश्वर योहोवा तुसेत हेना देश मा पुगाड़से जेनाक तारा पुरखा होकदारीया होया हुता, आरू तू ओळी ओक होकदारीयो होयसे; आरू हुयो तारि भलाई कोरसे, आरू तुख क तारा डाहडा सी वी गिनती मा वोदाड़से। 6आरू तारो परमेश्वर योहोवा तारे आरू तारी ओवलियाद क मन मा खतनो कोरसे, की तू आपना परमेश्वर योहोवा सी आपना आखा मोन आरू आखा प्राण क सात मोंग कोरे, जेरेसी तू जिवतलो रोहे। 7आरू तारो परमेश्वर योहोवा यो सब शराप क वाते तारा दुसमोल पोर ज तार सी बैर कोरिन तारे पोछोळ पोड़से मुकलसे। 8आरू तू फिरिस आरू योहोवा कि सोमळसे, आरू एनू सब हुकुम क मानसे ज हाव आज तुख सोमवाड़ो छे। 9आरू योहोवा तारी भोलाइ क लिय तारा सब कामो मा, आरू तारा ओवलियाद, आरू डुरो क बच्चा, आरू भुमी क उपज मा तारी वोदती कोरसे; काहकी योहोवा ओळी तारे उपोर भोलाई क लिय ओसोत खुशी कोरसे; जोसो हुयो तारा डाहडा क उपोर कोर्यो हुतो; 10काहकी तू आपना परमेश्वर योहोवा क सोमळिन ओकी हुकुम आरू विधियों क ज इनी वेवसता मा लिखायली छे मान्या कोरसे आरू आपना परमेश्वर योहोवा क भैनी मन आरू साखौ प्राण सी मोन फिरावसे।

11“देखू , योज हुकुम हाव आज तुमुक सोमवाड़ो, हुयो नी ते तारे लिय कठीन छे, आरू नी नांबे छे। 12आरू नी ते यो वादळा मा छे की तु कोहे, ‘कुन आमरे लिय वादळा मा चोढ़ीन हेना आमरे पास ली आवे, हामु क सोमवाड़े की हामु हेनाक मानजे?’ 13आरू नी यो दोरीया पार छे की तु कोहे, कुन आमरे लिय दोरिया पार जाय, आरू हेनाक आमरे पास लि आवे, आरू आमु क सोमवाड़े कि हामु हेनाक माने? 14बाखुन यो बुल तारे घोने धोड़े, बाखुन तारा मुयो मा आरू मोनोत मा छे, ताकी तू एना पोर चाले।

15“सोमोळ, आज मैन आज तुख क जिवन आरू मोरन, नुकसान आरू फायदा देखाड़्यो छे। 16काहकी हाव आज तुख हुकुम आपे छे, कि आपनो परमेश्वर योहोवा सी मोंग कोरजू, आरू ओक वाटो पोर चालनो, आरू हेनी हुकूमौ, विधियों, आरू कायदा, कायदा, क मानजू, जेरेसी तू जोवतलो रोहे, आरू वोदतो जाय, आरू तारो परमेश्वर योहोवा हेना देश मा जेरो होकदारीयो होयने क तु जाय रोयो छे, तुख बोरकोत आपे। 17बाखुन काहमाइन तारो मन भटक जाय, आरू तू नी सोमळे, आरू भटकिन पारका देवताओं क वांद्या कोरे आरू ओकी उपासना कोरने लागे, 18ती हाव तुमुक आज यो चितौनी आप्यो छे की तुम नि:सन्देह नष्ट होय जासु; आरू जेना देश क होकदारीयो होयने क लिय तू यरदन पार जाय रोयो छे, हेना देश मा तुमू घोना दाहड़ा क लिय रोहने नी पावसू । 19हाव आज वादळा आरू कळी दुयो क तुमरे अगळ एनी वात क गोवा बोनावो, की हाव न जिवन आरू मरण, बोरकोत आरू शराप क तुमरे अगळ मेकलो छे; एकालिय तू जिवन त क ओपनाय ले की तू आरू तारी ओवलियाद दुयू जिवतला रोहे; 20एकालिय आपना परमेश्वर योहोवा सी मोंग कोरे, आरू ओकी वात मानू, आरू हेरेसी थाबाईन रोहू; काहकी तारो जिवन आरू दिसरो जिवन योत छे, ओसो करने सी जेना देश क योहोवा अब्राहम, इसहाक आरू याकुब, तारा डाहडा क आपने क शपथ खादो हुतो हेना देश मा तू बोसलू रोहीस।”