व्यवस्थाविवरण 29

मोआब देश मा परमेश्वर नी वाचा

1इसराएलिया सी ज वाचा बांदने क हुकुम योहोवा न मूसा क मोआब क देश मा आप्यो ओक यो त बुल छे, आरू ज वाचा हेरेसी हुयो होरेब बोयड़ा पोर बाँध्यो हुतो यो हेरेसी अळग छे।

2ओळी मूसा न सब इसराएलिया क बुलाविन कोयो, “ज काहीन योहोवा न मिस्र देश मा तुमरे देखते फिरोन आरू ओक सब कर्मचारियों, आरू ओका आखा देश सी कोर्यो हुयो तुम न देख्यो छे; 3हुये मोटी मोटी पारोख, आरू सोहलानी, आरू मोटा मोटा चमत्कार तारा डुळा क अगळ हयो; 4बाखून योहोवा न आज लगुन क नी त समझने क दिल, आरू नि देखने क डुळा, आरू नी सोमळने क कान्टा आप्या छे। 5हाव त तुम क जंगल मा चाळिस साल लिन फिर्यो; आरू नि तुमरा डिल पोर छिंदरा जुनला होया, आरू न तारि जूतिया तारा पायों ना जुनली रोहे; 6रुटु ज तुमू नी खाने पाये, आरू दाखमधू आरू मदिरा ज तुम नि पिने पाया, हुये एकालिय हुयो की तुमू जानू की हाव योहोवा तुमरो परमेश्वर छे। 7आरू जब तुम इना जाग पोर आया, तब हेशबोन क राजा सीहोन आरू बाशान क राज ओगळ, यो दुयू युद्ध क लिय आमरे सामनो करने क निकळ आया, आरू हामू ओक जितिन ओक देश ली लेदा; 8आरू रुबेनियों, गादियो, आरू मनश्शे क आधे गोत्र क मानसो क निज वाटो करिन आप देदो। 9एकालिय एनी वाचा क वात क पाळन करू, ताकि ज काहीन करु हुयो सफळ होयू।

10“आज काय डाहला मानसे, काय प्रधान, तुमरा मूखी-मूखी मानसे, काय गोत्र गोत्र क तुमू सब इसराएली मानसे, 11काय तुमरा बाळ- बच्चा आरू बायरा, काय लाकड़ा काटन्या, काय पानी भोरन्या, काय तारी छावनी मा रहनेवाळा पारका, तुम सब क सब आपना परमेश्वर योहोवा क अगळ एकालिय उबा होय रोया, 12की जो वाचा तारो परमेश्वर योहोवा आज तार सी बाँधलो छे, आरू ज शपथ हुयो आज तुख क खावाड़े छे, हेरेम तू साझी होय जाय; 13एकालिय कि हेना बुल क ओनसारे ज हुयो तुख आप्यो, आरू हेनी शपथ क ओनसारे ज हुयो अब्राहम, इसहाक , आरू याकुब, तारा डाहडा सी खादो हुतो, हुयो आज तुख क आपनी‍ प्रजा कोहे, आरू आप तारो परमेश्वर कोहाये। 14ओळी हाव आज एनी वाचा आरू एना शपथ मा केवल तुम क नी, 15बाखून ओक वी, ज आज आमरे पुठी यां आमरो परमेश्वर योहोवा क अगळ उबा छे, आरू ज आज याँ आमरे पुठी नी छे, साझी कोरो छे। 16तुमू जानता होय की जब हामु मिस्र देश मा रोहता हुता, आरू जब वाट मा क राष्ट्र क विचो विच होईन आय रोया हुता, 17तब तुम न ओकी कोसी-कोसी घिनोनी चिजे, आरू लकड़ा, दोगड़ा, चाँदी, सोन क कोरी मुरत देख्या। 18एकालिय ओसो नी होये, की तुमू मानसो म ओसो काहीन मानुस, एने बायोर, एने कुल, एने गोत्र क मानसे होय जेरो मन आज आमरा परमेश्वर योहोवा सी जाय, आरू हुये जाईन हेनू राष्ट्र क देवताओं क उपासना कोरे; ओळी ओसो नी होये की तुमरा विच ओसी काहीन जड़ होये, जेरेसी जहर एने कड़वो उग्यो होय, 19आरू ओसो मानुस एना शपत क वचन क बुल सोमळीन आपसा क बोरकोत क योग्य माने, आरू यो विचार क चाहे हाव आपना मन क हठ पोर चालू, आरू आफरिन पिस क मिटाय नाखो, ते वी मारो कुशल होयसे। 20योहोवा ओक पाप माफ नी कोरसे, बाखुन योहोवा क कोप आरू जळन क धुवाड़ो ओका छाय लेसे, आरू जोतरा शाप एनी किपात मा लिख्या छे हुये सब हेर पोर आय पोड़से, आरू योहोवा ओक नाव धोरती पोर सी मिटाय देसी। 21आरू वेवसता क एनी किपात मा जेनी वाचा क वात छे ओक सब शापो क ओनसारे योहोवा ओक इसराएली क सब गोत्रो मा सी हानि क लिय अगळ कोरसे। 22आरू आवनेवाळी पिढी मा तुमरा ओवलियाद क मानसे ज तुमरे वाद पोयदा होयसे, आरू पारका मानुस वी ज नांबे देश सी आवसेहुयो हेना देश क विपत्तियाँ आरू हेरेम योहोवा क फैलाव हुया रूग देखिन, 23आरू यो वि देखीन कि ओकी सब भुमी गन्धक आरू लोन सी भर गोय, आरू याँ लोगुन जळ गोयो छे कि हेरेम नि काहईन वेर्यो जाय,आरू नी काइ जम सोके, आरू नी खोड़ो उगे छे, बाखुन सदोम आरू गमोरा , अदमा आरू सबोयीम क जोसा होय गोया छे जेनुक योहोवा न आपना कोप आरू जलजलाहट मा उलटाव देदो हुतो; 24आरू सब राष्ट्र क मानसे पुछसे, ‘योहोवा न एना देश सी ओसो काहा कोर्यो? आरू एना मोटा कोप क भड़कने क काय कारण छे?’ 25तब मानसे यो जोपाप आपसे, ओक डाहडा क परमेश्वर योहोवा न जी वाचा ओक सात मिस्र देश देश सी निकाळने क टेमे बांदली हुती ओक हुये तुड़्या छे, 26आरू पारका देवताओ क उपासना करला छे जेनुक हुये पेहेल नी जानता हुता, आरू योहोवा न ओक कनी आप्यो हुतो; 27एकालिय योहोवा क कोप एना देश पोर भोड़ोक उठ्यो छे, की किपात म लिख्या हुया सब शराप एना पोर आय पोड़े; 28आरू योहोवा न कोप आरू जलजलाहट आरू मोटि त रीस कोरिन हेनुक ओक देश मा सी उखाड़ीन दिसरा देश मा नाख देदा, जोसो कि आज प्रगट छे।

29“गुप्त वाते आमरा परमेश्वर योहोवाक होक मा छे; बाखून ज प्रगट कोरी गोयली छे हुयि सदा क लिय आमरा आरू आपमरा होक मा रोहसे, एकालिय कि एनी वेवसता क आखी वार पुरी कोरी जाय।