व्यवस्थाविवरण 28

बोरकोत न वचन

(लैव्यव्यवस्था 26:3-13; व्यवस्थाविवरण 7:12-24)

1काहमाइन तू आपना परमेश्वर योहोवा क सब हुकुम , ज हाव आज तुख सोमवाड़ो छे, चौकसी सी पुरी करने क चित्त लागाड़िन ओकी सोमोळ, ती हुयो तुख कळी क सब राष्ट्र मा वारू कोरसे। 2ओळी आपना परमेश्वर योहोवा क सोमळने क कारण यो सब बोरकोत तार पोर पुरा होयसे। 3सोयाळ्ळो होये तू नगर मा,सोयाळ्ळो होये तारा खेतो मा। 4सोयाळी होये तारी ओवलियाद, आरू तारी भूमि क उपज, आरू गाय आरू गाडरा-बुकड़ा आदि डुरो क बच्चा। 5सोयाळी होये तारी टोगारी आरू तारी ठाहरो। 6सोयाळ्ळो होये तू धोड़े आवते टेमे, आरू सोयाळू होये तू खौयड़े जाते टेमे।

7योहोवा ओसो कोरसे की तारा दुसमोल ज तार पोर‍ चोढाई कोरसे हुये तार सी हार जासे; हुये एक वाट सी तार पोर चढ़ाई कोरसे, बाखुन तारे अगळ सी सात वाट सी होईन ढास जासे। 8तार खत्ता पर आरू जतरा कामों मा तू हात लागाड़से हेनू सब पोर योहोवा बोरकोत आपसे; एकालिय ज देश तारो परमेश्वर यहोव तुख आपे छे हेरम हुये तुख बोरकोत आपसे। 9काहमाइन तू आपना परमेश्वर यहोव क हुकुम क मानतो रोयो ओक वाटो पोर चाले, ती हुये आपनी शपथ क ओनसारे तुख आपनी चुखली प्रजा करिन स्थिर राकसे। 10आरू कळी क देश देश क सब मानसे यो देखीन, की तू योहोवा क कोहाये छे, तार सी बिह जासे। 11आरयय जेना देश क वाराम योहोवा न तारा डाहडा सी शपथ खाइन तुख आपने क कयो हुतो, हेरेम हुयो तारी ओवलियाद क, आरू भुमी क उपज क, आरू डुरो क बोढती करीन तारी भलाई कोरसे। 12योहोवा तारे लिय आपने आकाशरूपी वारू भण्डार खुलीन तारी भुमी पोर टेम पोर मेंह पाड़्या कोरसे, आरू तारा आखा कामो पोर बोरकोत कोरसे; आरू तु घोनी राष्ट्र क उधार आपसे, बाखुन काहना सी तुख उधार लेनो नि पोड़से। 13आरू योहोवा तुख छेमटो नी, बाखु न मुनको त मेकसे, आरू तू नेचो नी , बाखुन उपोर त रोहसे; काहमाइन परमेश्वर योहोवा क हुकुम ज हाव आज तुख सोमवाड़ो छे, तु हेनुक मानने मा मोन लागाड़िन‍ चौकसी कोरे; 14आरू जेना बुलो क हाव आज तुख हुकुम आपो छे हेनू मा काहना सी जेवड़िये एने डाखरिये वोविन पारका देवता क पोछोळ नी होय लेजो, आरू नी ओकी चाखरी कोरे।

हुकुम - तुड़नो क दुष्परिणाम

(लैव्यव्यवस्था 26:14-46)

15बाखुन काहमाइन तू आपना परमेश्वर योहोवा क वात नी सोमळे, आरू ओकी आखी हुकूम आरू विधियों क पाळन हाव आज सोमवाड़ो छे चौकसी नी कोरसे, तीयी सब शराप तार पोर आय पोड़से। 16यानी शापित होये तू नगर मा, शापित होये तू खेत मा। 17शापित होये तारी टोकरी आरू तारि ठाहरो। 18शापित होये तारी ओवलियाद, आरू भूमी की उपज, आरू गायों आरू गाडरा-बुकड़ा क बच्चा। 19शापित होये तू धोडे आवते टेमे, आरू शापित होये तू खोयड़े जाते टेमे।

20ओळी जेना-जेना काम मा तू हात लागाड़े, हेरेम योहोवा तब तक तुख क शराप आपसे, आरू उलझन कोरतो, आरू धमकी आपतो रोहसे, जब लोगुन तू मिट नि जाय, आरू तोत्यारूत नष्‌ट होय जाय; यो ओस कोरीन हयसे की तू योहोवा क तियागिन दुष्ट काम कोरसे। 21आरू योहोवा ओसो कोरसे की मरी तार मा फेलीन हेने टेमे लोगुन लागली रोहसे, जोत्यार लोगुन हेनी भूमी क होकदारीयो होयने क लिय तू जाय रोय छे हेर पोर सी तारो नास नी होय जाय। 22योहोवा तुको क्षयरोग सी, आरू बुखार, आरू दाह, आरू मोटि जळन सी, आरू तलवार, आरू झुलस, आरू गेरूई सी मारसे; आरू यो तेने टेमे लोगन तारो पोछोळ कोरता रोहसे, जब लोगुन तारो सत्यनाश नी होय जाय। 23आरू तारा मुनका क उपोर वादळा पीतळ क, आरू तारा पाय क तळे भूमी लुहड़ा की हय जासे। 24योहोवा तारा देश मा पानी क बोदले बालू आरू बालू पाड़से; हुयो वादळा सी तार पोर याँ लोगुन पोड़से की तारो सत्यनाश होय जासे।

25योहोवा तुख दुसमोल सी हारावसे; आरू तु एक वाट सी ओक सामनो कोरने क जासे, बाखुन सात वाट सी होईन ओक अगळ सी ढास जाईस आरू कळी क सब राजो मा मोर्यू-मोर्यू फिरिस। 26आरू तारो शव वादळा क भाँती-भाँती क चिल्ला, आरू धोरती क डुरोन क आहार होयसे; आरू ओक कोय ढासने वाळो नी होयसे। 27योहोवा तुख मिस्र क सी फुड़ा, आरू बवासीर, आरू दाद, आरू खुजली सी ओसो पीड़ा कोरसे, की तु आरगो नी होय सोकसे। 28योहोवा तुख गांडो आरू आंदळो कोर देसे, आरू तारा मन क बेस घाबराड़ देसे: 29आरू जोसो आंधळो आंधारलाम म टटोळतो छे तोसे त तू दीसू दुपहरी मा टटोलतो फिरिस, आरू तारो काम-काज सफळ नी होयसे; आरू तू सदैव केवल आंधारो सहन कोरिस आरू लुटता त रोहसे, आरू तारो कोय छुड़ावनेवाळो नी होयसे। 30तू बायोर सी इयाव क वात लागाड़िस, बाखुन दिसरो मानुस ओक भ्रष्ट कोरसे; घोर तु बोनाविस, बाखुन हेरेम बोसने नी पाविस;दाख क वाड़ी तु लागाड़िस, बाखुन ओक फोव खाने नी पाविस 31तारा बुईल तारा डुळा क अगऴ मार्या जसे, अरु तू ओक क मांस खाय नी सोकसे; तारा गोदड़ तारा डुळा क सामने लूट मा जात रोहसे, आरू तुख ओळी नी मिळसे; तारा गाडरा-बुकड़ा तारा दुसमोल क हात लाग जासे, आरू तारे भेनी सी ओक कुई छुड़ावनेवाळो नी होयसे। 32तारा पुर्या पारी दिसर देश क मानसो क हात लाग जासे, आरू ओका लिय चाव सी देखता देखता तारा डुला रो जासे; आरू तारो काई बस नी चालसे। 33तारी भुमी क उपज आरू तारि आखी कमाय एक अनजान्या देश क मानसे खाय जासे; आरू सदा तू केवल आंधारो सहन आरू वेला कोरतो रोहीस; 34याँ लोगुन की तू हेनी वातो क कारन ज आपना डुळा सी देखीस गांडवाय जायिस। 35योहोवा तारा घुटना आरू पाय मा, बाखून नख सी मुनके लोगिन वि घोना फुड़ा निकळिन तुख पिड़ा आपसे।

36योहोवा तुख हेना राजा भेळ, जेक तु आपना उपोर मेकसे, तारे आरू तारा डाहडा क लिय अनजानी एक राष्ट्र क विच पुगाड़से; आरू ओक विच मा रोहिन तू काठ आरू दोगड़ा क दिसरा देवताऔं क उपासना आरू पुजा कोरसे। 37आरू हेनू सब राष्ट्र मा जेरा विच मा योहोवा तुख क पुगाड़से , होंया क मानसो क लिय तु चकित होयने क , आरू उदाहरण आरू शाप क कारण कहवायसे। 38तू खेत मा विज ते घोना ली जासे, बाखुन उपज थुड़िक कुत एकठी कोरसे; काहकी टिड्या ओक खाय जासे। 39तू दाख क वाड़ी लागाड़िन ओक मा काम ते कोरसे, बाखून ओकी दाख क मधु पिने नी पावसे, बाखुन फोव वी तुड़ने नि पावसे; काहकी किड़ा ओक खाय जासे। 40तारा आखा देश मा जेतुन क झाड़ ते होयसे, बाखुन ओक तेल तू आपना डिल मा लागाड़ने नी पावसे; काहकी हुये झड़ जासे। 41तारा पुर्या-पारी ते पोयदा होयसे, बाखुन तारा रोहसे नी ; काहकी हुये कैद मा जात रोहसे। 42तारा सब झाड़ आरू तारि भुमी क उपज टिड्या खाय जासे। 43जे तारा पारका तारे विच मा रोहसे हुये तारे सी विदता जासे; आरू तू आपसुत् घोटतू जात रोहीस।

44तुयो तुख क उधार आपसे, बाखुन तु ओक उधअर नी आप सोकीस हुये ते तारा मुनका आरू तारा छेमटो कोहायसे। 45तू ज आपना परमेश्वर योहोवा क आपली हुयी हुकुम आरू विधीयों क माणे क ओक नी सोमळे , ओस करीन हुये ससब शराप पोर आय पोडसे, आरू तारे पोछोळ पोड़ रोहसे, आरू तुख क धोर लेसे, आरू नास मा तु नष्ट होय जाईस। 46आरू हुये तार पोर आरू तारी ओवलियाद पोर सदा क लिय बोनलो रोहीन सोहलानी आरू चमत्कार कोहायसे।

47तू ज सब चीज क घोने होयने पोर वी खुशी आरू प्रसन्नता क सात आपना परमेश्वर योहोवा क‍ चाखरी नी कोरिस, 48ओस करीन तुख क भुकलो, तिसलो, नांगो आरू सब चीजो सी रहित होईन आपना एनू दुसमोल क चाखरी कोरनो पोड़से जेनूक यो हो वा तारे विरुद्ध मुकलसे; आरू जब लोगुन तू नाश नी होय जाय ती लोगुन योहोवा तारा गोळा पोर लुहड़ा क जुड़ो मेक देसे। 49योहोवा तारे विरुद्ध नांबे सी बाखुन धरती क छोर सी वेग सी उड़ावनेवाळा उकाब सी एक राष्ट्र क चोढ़ाय लावसे जेरी भाषा तू नी सोमझसे; 50ओकी राष्ट्र क मानसो क वेवहार क्रूर होयसे, हुये नी ते डाहला क मुय देखिन आदर कोरसे, आरू नी पुर्या पोर दया कोरसे; 51आरू हुये तारा डुरो क पुर्या आरू भूमि क उपज याँ लोगुन खाय जासे की तु नाश होय जासे; आरू हुये तारे लिय नी ओन, आरू नी नोवलो दाखमधु , अरु नी जेतुन तेल, आरू नी बछड़ा, न मेम्ना छुड़से, याँ लोगुन की तु नाष होय जासे। 52आरू हुये तारा परमेश्वर योहोवा क आपला आखा देश क सब फाटको क धोड़े तुख घेर राखसे; हुये तारा सब झपला क धोड़े तुख हेने टेमे लोगुन घेरसे, जब लोगुन तारा आखा देश मा तारी उँची-उँची आरू वाताड़ा शहरपनाहें जेनू पोर तू भुरसो कोरीस पोड़ नी जाय। 53तोत्यार घेरव कामे आरि हेना संकट क टेम जेरेसी तारो शत्रु तारे क नाखसे, तू आपना निज जन्माए पुर्या-पारी क मांस जेनुक तारो परमेश्वर योहोवा तुख क आपे खासे। 54आरू तुख मा ज मानुस कोमल आरू घोनो सुकुमार होय हुयो वी आपना भाई , आरू आपनी प्राण-प्रिया आरू आपना वाचला होंया पुर्या क क्रूर निगाह सी देखसे; 55आरू हुयो हेरेम सी काइ क वी आपना पुर्या क मांस मा सी ज हुयो आप खासे काइन नी आपसे, काहकी घेरवीन जाने आरू हेनी पिड़ा मा, जेरेम तारा दुसमोल तारा आखा झोपला क धोड़े तुख घेर नाखसे, ओक पास काईन नी रोहसे। 56आरू तुख मा ज बायोर यां लगुन कोमल आरू सुकुमार होय कि सुकुमारपन आरू कोमलता क मारे भुमी पोर पाय मेके वी बिहये होय, हुये वी आपना प्राणप्रिय घोरवाळा, आरू पुर्या, आरू पुराय क, 57आज जनला हुया पुर्या क क्रूर नजर सी देखसे, काहकी घिर जाने आरू हेना संकट क टेम जेरेम तारा दुसमोल तारा झोपला क धोड़े घेरवीन जाने आरू हुयो सब चिजो क घोटी क मारे हेरेम डुकाय क खासे।

58काहमाईन तू एनू वेवोसता क आखा बुलो क पाळन करने मा, ज एनी किपात मा लिख्यो छे, चौकसी करीन हेना आदरणीय आरू भययोग्य नाव क, ज योहोवा तारो परमेश्वर क छे बिक नी माने, 59ती योहोवा तुख क आरू तारी ओवलियाद क अनोख अनोखा डोन आपसे, हुये दुष्ट आरू घोना दाहड़ा रोहनेवाळो रुग आरू भारी-भारी डोन होयसे। 60आरू हुये मिस्र क हेनू सब रुगो क ओळी तारे उपोर लागाड़ देसी, जेरेम तू बिक खातू हुतू; आरू हुये तुख मा लागला रोहसे। 61आरू जोतरा रुग आदि डोन एनी वेवसता क किपात मा नी लिख्या छे, हेनू सबो क वी योहोवा तुख क याँ लोगुन लागाड़ देसे, की तारो सत्यनाश होय जासे। 62आरू तू आपना परमेश्वर योहोवा क नी मानसे , ओस करीन वादळा क तारा क जसो अनगिनत होयने क बोदले तुक मा सी घोना त मानसे रोह जासे। 63आरू जसो हेमी योहोवा क तुमरी भोलाई आरू वोदती करने सी हर्ष होये छे, तोसो त तब ओक तुमरो नाश बाखुन सत्यनाश करने क हर्ष होयसे; आरू जेनू भुमी क होकदारीयो होयने क तुमू जाय रोया होय हेर पोर सी उखाय जासु। 64आरू योहोवा तुख क कळी क एना छोर सी लीन ओक छोर लोगुन क सब देश क मानसे तितर बितर कोरसे; आरू होंया रोहीन तू आपना आरू आपना पुराखा क लिय अनजान काठ आरू दोगडा क दिसरा देवताओं क उपासना कोरसे। 65आरू हेनू राष्ट्र मा तू कोदी चैन नी पावसे, आरू नी तारा पाय क ठिकानो मिळसे; काहकी होंया योहोवा ओसो कोरसे कि तारो काळजो कापतो रोहसे, आरू तारा डुळा धुँदरा पोड़ जासे, आरू तारो मोन व्याकुल रोहसे; 66आरू तुख क जिवन पोर नित्य संदेह रोहसे; अरु तू दाहड़ो रात थरथरायतो रोहसे, आरू तारो जीवन क काईन भुरसो नी रोहसे। 67तारा मन मा ज बिक बोनलो रोहसे, आरू तारा डुळा क ज काईन देखायतो रोहसे, ओक कारण तू भोर क दम माइन कोहसे, साँझ क ब होयसे! आरू साँझ क दम मारीन कोहसे, “कोत्यार सोंदारो होयसे! 68आरू योहोवा तुख क नावो पोर चोड़ाविन मिस्र मा हेनी वाट सी लौटाय देसे, जेरा वाराम मैन तारे सी कोयो हुतो, की हुयो ओळी तारे देखने मा नी आवसे; आरू होंया तुम आपना दुसमोल क हात दास-दासी होयने क लिय वेचनेत क रोहसू, बाखून तुमरो कुदु गिराक नी हयसे।”