व्यवस्थाविवरण 27

दोगड़ा पोर लिखायला कायदा

1ओळी इसराएली क डाहला मानसो भेळ मूसा न प्रजा क मानसो क यो हुकुम आप्यो, “जोतरा कायदा हाव आज तुमुक सोमवाड़ो ओक सब क मानजो। 2आरू जब तुम यरदन पोर होये हेना देश मा पुगू, ज तारो परमेश्वर योहोवा तुख आपेछे, तब मोट्टा मोटा दोगड़ा उबा कोर देजो, आरू हेनू पोर चुनू पूतजू; 3आरू पार होयने क वाद हेनू पोर एनू वेवसतान क आखा बुलो क लिखजो, एकालिय की ज देश तारा डाहला क परमेश्वर योहोवा आपना बुल क ओनसारे तुख आपे‌ छे, आरू जेरेमा दूध आरू मधु क धाराएँ उहवे छे, हेना देश मा तू जाने जुवे। 4ओळी जेना दोगड़ा क वाराम हाव न आज कायदा आपलो छे, हेनुक तुमू यरदन क पार होयने एबाल बोयड़ा पोर उबो कोरजू , आरू हेना पोर चूनू पोतजू। 5आरू हुयो आपना परमेश्वर योहोवा क लिय दोगड़ा क एक वेदी बोनावजु, हेना पोर काहीम ओवजार नी चालाड़जू। 6आपना परमेश्वर योहोवा क वेदी विनागढ़े दोगड़ा क बोनाविन हेर पोर ओका लिय होमबलि चढ़ावजू; 7आरू हुये मेलबलि वी चोढ़ावीन भोजन कोरजू, आरू आपना परमेश्वर योहोवा क अगळ खुशी कोरजू। 8आरू हेना दोगड़ा पोर एनी वेवसता क सब बुलो क चुखी रीती सी लिख देजो।”

9ओळी मूसा आरू लेवीय याजकको न सब इसराएलीया सी यो वी कोयो, इसराएली, चुप रोहीन सोमोळ; आज क दाहड़े तू आपना परमेश्वर योहोवा क प्रजा होय गोयलो छे।

10एकालिय आपना परमेश्वर योहोवा क वात मानजी, आरू ओक ज ज हुकुम आरू विधि हाव आज तुख सोमवाड़ो ओक पाळन कोरजी।

अभिशाप शापित

11ओळी तेने दाहड़े मूसा न प्रजा क मानसो क यो हुकुम आप्यो, 12जब तुमू यरदन पार होय जावु तब शिमोन, लेवी, यहूदा, इस्साकार, युसुफ, आरू बिन्यामीन ये गिरिज्जीम बोयड़ा पोर उबा होईन बोरकोत सोमवाड़े। 13आरू रुबेन, गाद , आशेर, जबूलून, दान, आरू नप्ताली, ये एबाल बोयड़ा पर उबा होईन शराप सोमवाड़े। 14तोत्यार लेवीय मानसे सब इसराएली मानसो सी आयड़ीन कोहे:

15शापित होये छे मानसे जे काहनी मुरत कारीगर सी खूंदाड़ीन एने घोड़ाविन वारला जागा मा स्थापन कोरे, काहकी एरेसी योहोवा घाड़ाय कोरे छे। तत्यार सब मानसे कोहे, आमीन।

16शापित होय चो ज आपना बाबा एने आया क तुच्छ जाने। तत्यार सब मानसे कोहे, आमीन।

17शापित होये ज काहना दिसरा क सीमा क छेटो कोरे। तत्यार सब मानसे कोहे, आमीन।

18शापित होये चो ज आन्धळा क वाट सी भोटकाड़े। तत्यार सब मानसे कोहे, आमीन।

19शापित होये च ज पारको, विखावाळो, एने रोंडायली क नियाव बिगाड़े। तत्यार सब मानसे कोहे, आमीन।

20शापित होये चो ज आपनी सौतेली आया सी कुकर्म कोरे, काहकी हुयो आपना बाबा क ओढ़नो उगाड़े छे। तत्यार सब मानसे कोहे, आमीन।

21शापित होये चो ज काहना वी भातिन क ढुर सी कुकर्म कोरे। तत्यार सब मानसे कोहे, आमीन।

22शापित होये जो च आपनी बोहनीस, चाहे सगी होय चाहे सौतेली, सी कुकर्म कोरे। तत्यार सब मानसे कोहे, आमीन।

23शापित होये ज च आपनी सास क संग कुकर्म कोरे। तत्यार सब मानसे कोहे, आमीन।

24शापित होये ज च कुदाक डुकाइन मारे। तत्यार सब मानसे कोहे, आमीन।

25शापित होये ज च विनगुनाळा क जन क मार नाखने क लिय धन लेये। तत्यार सब मानसे कोहे, आमीन।

26शापित होये ज च एनी वेवसता क बुलो क मानीन पुरो नी कोरे। तत्यार सब मानसे कोहे, आमीन।