व्यवस्थाविवरण 26

पहली उपज क अर्पण

1“ओळी जोत्यार तू हेना देश मा जेनाक तारो परमेश्वर योहोवा तारो निज वाटो करके तुख आपे छे पुगे, आरू ओक होकदारीयो होईन हेरेम बस जाय, 2जब ज देश तारो परमेश्वर योहोवा तुख आपे छे, ओकी भूमी क भाँती-भाँती क ज पेहली उपज तू आपने घर लावसे, हेरेम सी काइन टोपला मा लिन हेना जागा पोर जाजु,जेनाक तारो परमेश्वर योहोवा आपने नाव क निवास करने क लिय नेवाड़ लेये। 3आरू हेनू दाहड़ा क याजक क पास जाईन यो कोहजु, ‘हाव आज तारो परमेश्वर योहोवा क अगळ घोषणा द्योंव,की योहोवा न हामु मानसो क जेना देश क आपने क आमरा डाहडा सी शपथ खादो हुतो हेरेम हाव आय गोयलो छे।’ 4तब याजक तारा हात सी हुये टुपली लिन तारा परमेश्वर योहोवा क वेदी क अगळ मेक देये। 5तब तू आपना परमेश्वर योहोवा सी अस करीन कोरजू, ‘मारो मुलमानुस एक अरामी मानुस हुतो जो भटकने वाळो हुतो; आरू हुयो आपना नाना सा परिवार भेळ मिस्र क गयो, आरू होंया पारका होईन रोया; आरू होंया हेरेसी एक मोटि, आरू सामर्थी, आरू घोना कम मानसे सी भोरायली होयी राष्ट्र पोयदा होयी। 6आरू मीसरीयो न हामु मानसो सी भुंडो वेवहार कोर्या, आरू आमुक दुख आप्या, आरू आमरे सी काठी काम कराया । 7बाखुन हामु न आपना डाहडा क परमेश्वर योहोवा क विनता आप्या, आरू योहोवा न आमरी सोमळीन आमरा दुक मेहनोत आरू दुखोर पोर निगाह कोर्यो; 8आरू योहोवा न बलवन्त हात आरू बढ़ाई हुयी भुजा सी घोनो भयानक सोहलानी आरू चमत्कार देखाड़िन हामु क मिस्र सी निकाळ लाया; 9आरू हामु इना जागा पोर पुगाड़िन यो देश जेरेम दूध आरू मधु क धाराएँ उहवे छे हामु आप देदो छे। 10हेमी हे योहोवा, देख, ज भूमी तू न मक आप्यो छे ओक पेहली उपज हाव तार पास ली आयो छे।’ तब तू ओक आपना परमेश्वरत योहोवा क अगळ मेकजी; अरु योहोवा क वान्दया कोरजी; 11आरू जोतरा वारला चीज तारो परमेश्वर योहोवा तुख आरू तारा घोराना क आपे, ओक कारण तू लेवीयो आरू आपना विच मा रोहनेवाळा पारका भैऴ खुशी कोरजी।

12“तिसरा साल ज दशमांश आपने क सात रोहे छे, जब तू आपनी सब भाती क बोदती क दशमांश क निकाळ चुक्या, तब हेनाक लेवीय, पारका, विखावाळो, आरू रोंडायलो क आपजी, कि हुये तारा झपला क धोड़े खाईन आफरी जाय; 13आरू तू आपना परमेश्वर योहोवा सी कोहनो, ‘हाव न तारी सब हुकुमो क ओनसारे चुखो ठहरावलो हयी चिजोक आपने घर सी निकळ्यो आरू लेवीय, पारका, विखावाळो, आरू रोंडायलो क आप देदो छे; तारी काहनी हुकुम क हाव न नि त टाळ्यो छे, आरू नी विसरीयो छे। 14हेनी चीजो मा सी हाव म शोक क टेमे नी खादो, आरू नी हेरेम सी काहीन चीज वीटोळ क दशा मा घर सी निकाळी, आरू नी काहिन शोक करनेवाळो क आप्यो; मैन आपना परमेश्वर योहोवा क सोमळ्यो, हाव न तारी सब हुकूम क ओनसारे कोर्यो छे। 15तू सोरोग मा सी, ज तारो चुखलो धाम छे, निगाह करीन आपनी प्रजा इसराएली क बोरकोत आपे, आरू एना दूध आरू मधु क धाराओं क देश क भुमी पोर बोरकोत आपे, ज तू न आमरा डाहडा सी खादली शपथ क ओनसारे आमुक आप्यो छे।’

परमेश्वर क खुदन लोगहन

16“आज क दाहड़े तारो परमेश्वर योहोवा तुख क एनू विधियों आरू कायदा क मानने क हुकुम आपे छे; एकालिय आपना आखा मन आरू आखा जीवो सी एनूक मानने मा चौकसी करजी। 17तु न आज योहोवा क आपनो परमेश्वर मानिन यो बुल आप्यो छे, कि हाव तारा देखाड़ली वाटो पोर चालिस, आरू तारी विधियों, हुकुमो क, आरू कायदा क मान्या करिस, आरू तारी सोमळ्या कोरिस। 18आरू योहोवा न वी आज तुख क आपना बुल क ओनसारे आपनो प्रजारूपी निज धोन-जायदाद मानलो छे, की तु ओकी सब हुकुमो क मान्या कोरे, 19आरू की हुयो आपनी बोनावली हुयी सब देशो सी जादा प्रशंसा, नाव, आरू शोभा क वाराम तुख प्रतिष्ठित कोरे, आरू तु ओक बुल क ओनसारे आपना परमेश्वर योहोवा क चुखली प्रजा बोनली रोहे।”