Rô-ma 5

1Anưq yôôych, vii heq jah xưng hyioh jăk bơyh xuum tuôq, haay hnoq ik jah varơuq tagu dii Kơy Plêêk gamưh Lôôk haay, laa Lôôk Wơơt Dêh Jê-xu, 2đơu hlê Kơy nưq, haay bơyh xuum tuôq kung heq e trôôk muut đom vanong plêêk neq, laa aduq đơu haay dưk kajưk măn taalh, ji haay hlah xuum gamưh tol xuum takôô gamưh truh tađnah tađnaak ku Kơy Plêêk. 3Bơh leh vơ đanưq, đơu haay măn hlah xuum đom 'ngưng pơơl hwơơl, vii xet đaneq pơơl dal taway truh ka paraat chiuq uunq; 4măn ka paraat chiuq uunq neq yôôych taway truh phâmh châk jah atuq tôôy, măn phâmh châk jah atuq tôôy neq yôôych taway truh varơuq takôô gamưh. 5Măn varơuq takôô gamưh nưq be dơơp ăm kamưưl, bơyh kơq xung xiaq ku Kơy Plêêk heq jah kahrôq uk muut xuum haay gamưh Kơy Phool Hiel, Kơy heq jah kahniq ka haay. 6Kung koq dêq, tuôôy haay măn laa khơl adro ravoch, yôôych muut klip tuôôy kawat, Lôôk Wơơt Dêh heq kaxêêt thay ka khơl adro e kadrôôp. 7Dik leh klêq e kơyq hnoq chiuq kaxêêt thay ka manih hyioh jăk. Long e hnoq e adro kung hôôk kaxêêt thay ka adro xuum kaxay. 8Bơh Kơy Plêêk ăm hloq xung xiaq ku kadih Kadraq đôôyq dii haay, nưq laa tuôôy haay măn laa manih kadrôôp, yôôych Lôôk Wơơt Dêh heq kaxêêt thay ka haay. 9Anưq, juneq, tuôôy heq jah xưng hyioh jăk bơyh vahaap Kadraq, yôôych haay hnoq kang jah wơơt klơlh đơơt tôq dayh 'ngưng iaq đnoyq gamưh Kadraq. 10Vii atoh haay, long laa tachơơl, heq jah tagu hlê dii Kơy Plêêk gamưh varơuq kaxêêt ku Koot Kadraq, yôôych tuôôy heq jah tagu hlê yôôch, haay hnoq kang jah wơơt bơyh varơuq riirh ku Kadraq 'ngưng iaq đnoyq. 11Bơh leh vơ anưq, đơu haay măn pa ưưt xăk đom Kơy Plêêk gamưh hlê Lôôk haay, laa Lôôk Wơơt Dêh Jê-xu, đơu gamưh Kadraq, juneq haay heq nhonq jah varơuq tagu hlê.

12Vii kakơq nưq, đaji vơ hlê muuyq adro đơu kadrôôp maroh heq muut đom dêh araak, ji hlê kadrôôp maroh varơuq kaxêêt, lunưq varơuq kaxêêt kung lơy taba truh dêq hloay koot manih, vii kơq varơuq nưq đơu tôôy dro heq lôp kadrôôp. 13Vii ăm truh katuôôy ku ganuun, yôôych kadrôôp maroh 'miêh heq e đom dêh araak yôôch, bơh kadrôôp leh ik jauq truh tuôôy koq e ganuun. 14Lunư, varơuq kaxêêt heq dưk xanok xing đơơy A-đam ăm truh đơơy Môi-se, pheq đnooy tol khơl adro leh lôp kadrôôp măn dang raa achung dii varơuq lôp kadrôôp ku A-đam, đơu kơy laa long lơuq ku Kơy pheq truh.

15Lunưq, varơuq lôp kadrôôp leh dang vanong kaxay tyauq kach đanưq. Vii atoh bơyh varơuq lôp kadrôôp ku muuyq dro đơu 'ngưng dro heq kaxêêt, yôôych vanong plêêk ku Kơy Plêêk, ji kadrool bơyh vanong plêêk ku muuyq dro, 'ngưq laa Lôôk Wơơt Dêh Jê-xu, deng ka 'ngưng dro laa raah jôh kang 'ngưng iaq đnoyq! 16Kadrool nưq leh aalq đaji kach gamưh hlê muuyq dro lôp kadrôôp. Vii long varơuq xưh xadrah xing muuyq dro đơu vlôh, jarooy truh varơuq tiel dook, bơh vlôh xing 'ngưng varơuq lôp kadrôôp, vanong kaxay wih truh varơuq xưng hyioh jăk. 17Vii atoh bơyh varơuq lôp kadrôôp ku muuyq dro, đơu varơuq kaxêêt heq dưk xanok gamưh hlê muuyq dro nưq, yôôych khơl adro nhonq jah varơuq raah jôh ku vanong plêêk ji ku kadrool truh varơuq hyioh jăk hnoq kang dưk xanok 'ngưng iaq đnoyq đom varơuq riirh gamưh muuyq dro, 'ngưq laa Lôôk Wơơt Dêh Jê-xu. 18Lunưq, đaleq bơyh muuyq lôp kadrôôp wih tôôy dro muut varơuq hmơt dook, yôôych bơyh muuyq varơuq dơơp hyioh jăk kung wih tôôy dro truh varơuq xưng hyioh jăk ku varơuq riirh đanưq. 19Vii pheq đnooy đaleq bơyh varơuq leh tameng ku muuyq dro, đơu 'ngưng dro biq jêêk manih kadrôôp, yôôych kung bơyh varơuq tameng tyauq ku muuyq dro đơu 'ngưng dro hnoq jah jêêk hyioh jăk đanưq. 20Panưh kadrơy, ganuun heq xalieh muut xôq varơuq lôp kadrôôp hnoq ik athêêp 'ngưng. Bơh aduq leq kadrôôp maroh athêêp 'ngưng, yôôych vanong plêêk kang raah jôh athêêp, 21Xôq ka kadrôôp maroh dưk xanok đom varơuq kaxêêt đaji đaleq, yôôych vanong plêêk kung hnoq ik dưk xanok bơyh varơuq hyioh jăk đaji đanưq xôq wih truh varơuq riirh đơơy đơơy, gamưh Lôôk Wơơt Dêh Jê-xu, Lôôk haay.