Rô-ma 6

1Nưq yôôych, haay hnoq đnooy đaleq? Haay duh dơơp đnoyq đom kadrôôp maroh xôq vanong plêêk athêêp raah jôh be? 2Varơuq nưq leh xalih vlôh ik. Haay laa adro heq kaxêêt đôôyq dii kadrôôp maroh yôôych dơơp aleq haay hnoq măn riirh đom ni? 3Long oh ay leh xet đaneq atoh kơyq heq chiuq bap-tem đom Lôôk Wơơt Dêh Jê-xu laa heq jah bap-tem muut đom varơuq kaxêêt ku Kadraq long aleq? 4Kơq nưq, haay heq ik up dii Kadraq gamưh pheep bap-tem muut đom varơuq kaxêêt, xôq ăm dang đaji Lôôk Wơơt Dêh gamưh tađnah tađnaak ku Vaq heq jah khienq riirh hlê xing aduq kaxêêt đaleq, yôôych haay kung hnoq ik tawaak hooy đom varơuq riirh đơơu đanưq. 5Bơyh atoh haay heq vlôh jêêk anguk muuyq dii kung muuyq dang varơuq kaxêêt ku Kadraq, yôôych panưh kadrơy, haay kung hnoq laa đanưq aduq varơuq riirh hlê ku Kadraq; 6Bơyh xet varơuq neq, đaneq koot manih duut ku haay heq biq đongq đing dii Kadraq, xôq xăk xamơk ku kadrôôp maroh hnoq ik biq dơyh ka'lăk, be măn khienq haay dơơp xapok ka kadrôôp maroh đnoyq. 7Vii kơyq heq kaxêêt yôôych jah 'nhuôôt ka'lăk kaluh rôp xadrah xing kadrôôp maroh. 8Bơh atoh haay heq kaxêêt dii Lôôk Wơơt Dêh, yôôych haay tuôq đaneq haay kung hnoq riirh kung dii Kadraq, 9vii xet đaneq atêq tuôôy jah khienq riirh hlê xing aduq kaxêêt, Lôôk Wơơt Dêh leh măn kaxêêt đnoyq; varơuq kaxêêt leh măn dưk xanưk tol Kadraq. 10Vii varơuq kaxêêt đơu Kadraq heq chiuq, nưq laa Kadraq heq kaxêêt đôôyq dii kadrôôp maroh muuyq yưk đu hloay. Măn varơuq riirh đơu Kadraq riirh, nưq laa Kadraq riirh ka Kơy Plêêk. 11Kung tyauq kach nưq, tabơh oh ay pheq 'yo kadih xăk laa adro kaxêêt đôôyq dii kadrôôp maroh, bơh laa riirh ka Kơy Plêêk đom Lôôk Wơơt Dêh Jê-xu.

12Anưq, te xôq kadrôôp maroh dưk xanok đom xăk xamơk tameng 'laarq varơuq kaxêêt ku oh ay, xôq yôôch tameng tyauq kaluh hmưch trôôch ku ni. 13Kung te noop kaluh xăk xamơk ku haay ka kadrôôp maroh đaji valong đôô ku varơuq leh hyioh jăk. Bơh dayh tơơk tưp kadih haay ka Kơy Plêêk, đaji laa đong riirh hlê xing adro kaxêêt, ji kaluh xăk xamơk ku haay đaji valong đôô ku varơuq hyioh jăk ka Kơy Plêêk. 14Bơyh kadrôôp maroh hnoq be ik dưk xanok tol oh ay, vii oh ay leh măn 'laarq ganuun, bơh laa 'laarq vanong plêêk.

15Anưq yôôych đaleq? Haay e duh lôp kadrôôp vii haay be măn 'laarq ganuun, đơu măn 'laarq vanong plêêk be? Varơuq nưq leh xalih vlôh ik. 16Oh ay leh xet đaneq oh ay noop kadih xăk ka varơuq kajoq đaji xapok đom varơuq tameng tyauq, yôôych oh ay vlôh jêêk xapok ka varơuq đơu xăk tameng tyauq long aleq— paq kê laa ku kadrôôp maroh jarooy truh varơuq kaxêêt, long laa ku varơuq tameng tyauq jarooy truh varơuq hyioh jăk? 17Bơh kuh kway Kơy Plêêk vii oh ay 'miêh laa xapok ku kadrôôp maroh, đơu oh ay heq xing 'lăp xuum klaak tameng tyauq đôôyq dii kaluh apok pato dayq đơu xăk jah pato ăm. 18Măn atêq tuôôy jah luh vlôh vlôh klơlh kadrôôp maroh, oh ay heq jah dơơp xapok ka varơuq hyioh jăk. 19Gô đnooy tyauq kach koot manih bơyh kơq ka varơuq ravoch ku xăk xamơk oh ay. Vii đaleq oh ay heq noop kaluh xăk xamơk ku haay đaji xapok ka varơuq klơơr 'yêq ji ka varơuq xơk tauq neq truh varơuq xơk tauq hơq, yôôych juneq, kung đanưq, oh ay dayh tơơk tưp kaluh xăk xamơk ku haay đaji xapok ka varơuq hyioh jăk wih truh varơuq yuôôr vah. 20Vii tuôôy oh ay măn laa xapok ku kadrôôp maroh, yôôych oh ay 'miêh jah rayơh rayơơy đôôyq dii varơuq hyioh jăk. 21Nưq yôôych oh ay heq e raak play kajoq tuôôy nưq truh kaluh thưq đơu juneq oh ay kadih hloq kamưưl? Vii lôôch dik ku kaluh varơuq nưq laa varơuq kaxêêt. 22Bơh juneq, atêq tuôôy jah luh vlôh vlôh klơlh kadrôôp maroh ji jah dơơp xapok ka Kơy Plêêk, oh ay e raak play ku xăk jarooy truh varơuq yuôôr vah, đơu lôôch dik laa varơuq riirh đơơy đơơy. 23Vii jêêt kông ku kadrôôp maroh laa varơuq kaxêêt, bơh vanong kaxay ku Kơy Plêêk laa varơuq riirh đơơy đơơy đom Lôôk Wơơt Dêh Jê-xu, Lôôk haay.