Skip to content
BibleKenya

Cua Bible Literal Text

Rô-ma 7

Wơơy oh ay (vii gô đong đnooy dii khơl adro xet ganuun), long laa oh ay leh xet đaneq ganuun e qwuyen tol muuyq dro đom truh dong leq dro nưq măn riirh long aleq? Vii dro khơl kadrê e kanau heq biq ganuun vek jư dii adro kanau măn riirh ku mư, bơh atoh kanau kaxêêt, yôôych mư jah dơyh ka'lăk klơlh ganuun truh adro kanau nưq. Lunưq, đom tuôôy kanau măn riirh, atoh mư xa vik dii muuyq dro khơl kanau kadrơy, yôôych mư hnoq ăm xet tajinq dii anơng taayh adro tuut taak. Bơh atoh kanau kaxêêt, yôôych mư jah rayơh rayơơy klơlh ganuun, mư leh aalq laa adro tuut taak long xa vik dii dro kanau kadrơy. Kung nưq, wơơy oh ay ku gô, kadih oh ay kung heq jah dơơp ăm kaxêêt đôôyq dii ganuun gamưh xăk xamơk ku Lôôk Wơơt Dêh, xôq ka oh ay jah anguk muuyq dii adro kadrơy, 'ngưq laa dii Kơy heq jah khienq riirh hlê xing aduq kaxêêt, xôq ka haay hnoq raak play ka Kơy Plêêk. Vii tuôôy haay đong măn đom xăk xamơk, kaluh hmưch trôôch kadrôôp maroh gamưh hlê ganuun 'miêh dưk dơơp đom kaluh xăk xamơk ku haay xôq raak play ka varơuq kaxêêt. Bơh juneq haay heq jah dơyh ka'lăk klơlh ganuun, vii heq kaxêêt đôôyq dii varơuq đơu haay 'miêh biq vek jư, lunưq haay hnoq ik hơu varơuq đom kach đơơu ku Kơy Phool Hiel đơu leh aalq kach hnu duut ku chư valơk.

Anưq, haay hnoq đnooy kajoq? Ganuun laa kadrôôp maroh ih? Varơuq nưq leh xalih vlôh ik. Lunư, gô heq be nhonq xet kadrôôp maroh atoh leh gamưh muut ganuun. Vii gô heq be nhonq xet kadrôôp hmưch trôôch atoh ganuun leh đnooy: “Xăk te hmưch trôôch.” Bơh kadrôôp maroh, atêq tuôôy rôp xok katuôôy hlê ganeen, heq taway hlê tôôy hmưch trôôch đom gô. Vii leh e ganuun yôôych kadrôôp maroh kaxêêt. Panưh kadrơy, droyq hơq, gô 'miêh riirh leh e ganuun, bơh atêq tuôôy ganeen truh, yôôych kadrôôp maroh heq riirh hlê, măn gô yôôych kaxêêt. Ji ganeen laa varơuq wih truh varơuq riirh, yôôych ni heq jah hloq đaji laa varơuq kaxêêt đôôyq dii gô. Vii atêq tuôôy rôp xok katuôôy gamưh muut ganeen, kadrôôp maroh heq aluut pa ôôh gô, ji gamưh hlê đnư, heq păk kaxêêt gô. Đanưq, ganuun laa vah, ganeen kung laa vah, hyioh jăk, ji tamaq kaxay.

Anưq, varơuq tamaq kaxay heq vlôh jêêk varơuq kaxêêt ka gô long aleq? Varơuq nưq leh xalih vlôh ik. Wih hlê, xôq gamưh hlê varơuq tamaq kaxay, kadrôôp maroh hnoq ik biq kahnoq vlôh laa kadrôôp maroh, 'ngưq laa varơuq taway hlê varơuq kaxêêt đom gô, xôq ăm hlê ganeen, kadrôôp maroh kang vlôh jêêk xơk aak paq ik. Vii haay xet đaneq ganuun laa danưng kooy, măn kadih xăk gô laa xăk xamơk, heq biq tek dơơp xapok 'laarq kadrôôp maroh. Bơyh gô leh hlolh varơuq gô dơơp vlôh. Vii be aalq gô dưk dơơp varơuq đơu gô trôôch. Bơh gô dưk dơơp varơuq đơu gô 'yarơ. Bơh atoh gô dơơp varơuq đơu gô leh trôôch, yôôych gô ưng anưq dii ganuun đaneq ganuun laa tolh kaxay. Bơh juneq kadih gô leh măn dơơp varơuq nưq đnoyq, đơu laa kadrôôp maroh đong măn đom gô! Vii gô xet đaneq varơuq kaxay be măn đom gô, 'ngưq laa đom xăk xamơk gô. Vii ưng trôôch varơuq kaxay yôôych đong măn e đom gô, bơh dơơp vlôh varơuq kaxay yôôych leh. Bơyh varơuq kaxay đơu gô trôôch yôôych gô leh dơơp, bơh varơuq xơk đơu gô leh trôôch, yôôych gô dưk dơơp ni. Măn atoh gô dơơp varơuq đơu gô leh trôôch, yôôych leh aalq kadih gô dơơp varơuq nưq đnoyq, bơh laa kadrôôp maroh măn đom gô. Lunưq, gô nhonq vlôh ganuun neq đom gô, 'ngưq laa đom koot manih ưng trôôch dơơp varơuq kaxay neq, nưq laa varơuq xơk đong măn e đom gô. Vii gô hlah trôôch truh ganuun ku Kơy Plêêk tyauq koot manih pi 'lăp. Bơh gô 'yo hloq muuyq ganuun kadrơy đom kaluh xăk xamơk gô damưq tachơơl hlê ganuun ku xuum biit gô ji rôp băt gô bơơn ganuun ku kadrôôp maroh, laa ganuun đong măn e đom kaluh xăk xamơk ku gô. Gô laa muuyq dro pơơl ra ơơh! Kơyq hnoq waak wơơt gô klơlh xăk xamơk ku varơuq kaxêêt neq? Kuh kway Kơy Plêêk gamưh Lôôk Wơơt Dêh Jê-xu, Lôôk haay! Vii anưq lunưq, tabơh dii xuum biit, kadih gô hơu varơuq ganuun ku Kơy Plêêk, bơh dii xăk xamơk yôôych deng ka ganuun ku kadrôôp maroh.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.