Rô-ma 8

1Lunưq, juneq be e xadrah dook leq dêq ka khơl leq măn đom Lôôk Wơơt Dêh Jê-xu. 2Vii ganuun Kơy Phool Hiel ku varơuq riirh đom Lôôk Wơơt Dêh Jê-xu heq luh vlôh gô klơlh ganuun ku kadrôôp maroh ji varơuq kaxêêt. 3Bơyh đôôyq dii varơuq leh dơơp ik ku ganuun, 'ngưq laa đom varơuq ni 'miêh ravoch kơq xăk xamơk, yôôych Kơy Plêêk, atêq tuôôy patăk kadih Koot Kadraq truh đom ka varơuq dang đaji xăk xamơk kadrôôp maroh ji vii kơq kadrôôp maroh, Kadraq heq rôp xadrah kadrôôp maroh đom xăk xamơk, 4xôq kaluh varơuq hyioh jăk ku ganuun jah dơơp xaleep đom haay, laa khơl adro leh tawaak hooy tyauq xăk xamơk bơh tyauq Kơy Phool Hiel. 5Vii khơl adro riirh tyauq xăk xamơk yôôych tabông muut kaluh varơuq thuôk xăk xamơk, măn khơl adro tyauq Kơy Phool Hiel yôôych tabông muut kaluh varơuq thuôk Kơy Phool Hiel. 6Bơyh xuum biit ku xăk xamơk laa varơuq kaxêêt, măn xuum biit ku Kơy Phool Hiel laa varơuq riirh ji hrok hrol; 7nưq laa vii xuum biit ku xăk xamơk yôôych tachơơl hlê dii Kơy Plêêk, bơyh ni leh chiuq tameng 'laarq ganuun ku Kơy Plêêk, jo ni leh e paraat xôq dơơp anưq. 8Măn khơl adro riirh tyauq xăk xamơk yôôych be hnoq ik dơơp hlah xuum Kơy Plêêk. 9Lunưq, oh ay leh măn đom xăk xamơk, đơu laa đom Kơy Phool Hiel, atoh Kơy Phool Hiel ku Kơy Plêêk dong dik măn đom oh ay. Măn atoh kơyq leh e Kơy Phool Hiel ku Lôôk Wơơt Dêh, yôôych adro nưq leh thuôk xuq Kadraq. 10Wih hlê atoh Lôôk Wơơt Dêh măn đom oh ay, yôôych long xăk xamơk laa varơuq kaxêêt vii kơq kadrôôp maroh, bơh Kơy Phool Hiel laa varơuq riirh vii kơq varơuq hyioh jăk. 11Măn atoh Kơy Phool Hiel ku Kơy heq khienq Lôôk Jê-xu riirh hlê xing aduq kaxêêt đong măn đom oh ay, yôôych Kơy heq khienq Lôôk Wơơt Dêh Jê-xu riirh hlê xing aduq kaxêêt kung hnoq kahniq varơuq riirh ka xăk xamơk tameng 'laarq varơuq kaxêêt ku oh ay, hlê Kơy Phool Hiel Kadraq măn đom oh ay.

12Lunưq, wơơy oh ay, haay leh aalq laa adro pơq lôôkq xăk xamơk xôq riirh tyauq xăk xamơk. 13Vii atoh oh ay riirh tyauq xăk xamơk, oh ay hnoq pheq kaxêêt, măn atoh gamưh Kơy Phool Hiel, oh ay dơơp kaxêêt kaluh varơuq dơơp ku xăk xamơk, yôôych oh ay hnoq riirh. 14Vii long kơyq jah jarooy bơyh Kơy Phool Hiel ku Kơy Plêêk, khơl adro nưq laa koot ku Kơy Plêêk. 15Vii oh ay heq leh nhonq xok danưng kooy ku ka varơuq dơơp xapok xôq hlê wih truh varơuq yôq varaal, bơh oh ay heq nhonq xok Kơy Phool Hiel ku varơuq dơơp koot văch, gamưh đnư haay taayh atok: “A-ba, Vaq!” 16Jơq Kơy Phool Hiel dơơp xanưk kung dii danưng kooy haay đaneq haay laa koot xau Kơy Plêêk. 17Đơu atoh laa koot xau, yôôych kung laa adro dưk katôôl: muuyq panưh laa khơl adro dưk katôôl ku Kơy Plêêk, panưh kadrơy laa khơl adro kung dưk katôôl dii Lôôk Wơơt Dêh — atoh haay dong dik chiuq pơơl dii Kadraq xôq haay kung jah tađnah tađnaak dii Kadraq.

18Vii gô biit đaneq kaluh pơơl jiq măn katuôôy juneq be taxưngq taso dii tađnah tađnaak jeq jah kahnoq vlôh ka haay. 19Bơyh varơuq dong dik takôô kôô ku tôôy paroh đong pơl wol takôô kôô varơuq kahnoq vlôh ku koot xau Kơy Plêêk. 20Vii tôôy paroh heq biq rôp tyauq 'laarq ka varơuq hư hlơơp, be aalq ưng iq, bơh laa vii Kơy heq khienq oot pheq tameng tyauq, ganưq muut varơuq takôô gamưh 21đaneq kadih tôôy paroh kung hnoq jah wơơt klơlh vlôh klơlh xăk xamơk dơơp xapok ku varơuq hư hlơơp xôq muut varơuq rayơh rayơơy đom tađnah tađnaak ku koot xau Kơy Plêêk. 22Vii haay xet đaneq padêq hloay tôôy paroh kung tanguh alo ji axe axek đom jiq jiêh dong truh hngơy neng. 23Lunư, leh vơ laa anưq, đơu haay kung anưq, long e jah play adroyq dik ku Kơy Phool Hiel — kadih haay kung tanguh alo đom xăk, đong tuôôy pơl wol takôô kôô jah dơơp koot văch, 'ngưq laa varơuq wơơt bla xăk xamơk ku haay. 24Vii haay heq jah wơơt đom xuum takôô gamưh kajưk dik. Đơu takôô gamưh atoh jah 'yo hloq yôôych leh aalq laa takôô gamưh. Vii e kơyq takôô gamưh truh varơuq đơu ni hloq ik? 25Măn atoh haay takôô gamưh truh varơuq haay koq hloq, yôôych haay đong pơl wol takôô kôô bơơn varơuq wêêt xuum.

26Bơh tyauq kach dang anưq, Kơy Phool Hiel kung waak đom varơuq ravoch ku haay. Vii haay leh xet varơuq đơu haay duh apôôy đaji haay đangq pheq dơơp, bơh jơq Kơy Phool Hiel talăng jăk apôôy thaay dii kaluh apok ramôôl alo leh hnoq đnooy vlôh bơơn apok. 27Măn Kơy 'yo hloq xuum manih yôôych xet xuum biit ku Kơy Phool Hiel laa đaleq, vii Kadraq apôôy thaay tamuut iq trôôch Kơy Plêêk ka khơl jah rơơlh. 28Panưh kadrơy, haay xet đaneq Kơy Plêêk dưk dơơp tôôy varơuq kung dii mamuuyq xôq wih truh varơuq tolh kaxay deng ka khơl adro xung xiaq Kơy Plêêk, 'ngưq laa ka khơl adro e jah varơuq taayh tawooyh tyauq iq đinq ku Kadraq. 29Vii khơl adro đơu Kadraq heq xet adroyq, yôôych Kadraq kung heq đinq 'miêh xôq dang đaji long lơuq ku Koot Kadraq, xôq ka Koot nưq vlôh jêêk koot ay katul 'ngưng oh ay. 30Panưh kadrơy, khơl leq đơu Kadraq heq đinq 'miêh, yôôych khơl adro nưq Kadraq kung heq taayh. Ji khơl kơyq đơu Kadraq heq taayh, yôôych khơl dro nưq Kadraq kung heq xưng hyioh jăk. Măn khơl leq đơu Kadraq heq xưng hyioh jăk, yôôych khơl dro nưq Kadraq kung heq dơơp ăm tađnah tađnaak.

31Nưq yôôych, haay hnoq đnooy aleq truh kaluh varơuq neq? Atoh Kơy Plêêk thay mot ka haay, yôôych kơyq tachơơl hlê haay? 32Kadraq dong dik laa Kơy heq leh alay kadih Koot kadraq, bơh heq pahnăp Koot nưq xaloah thêq dêq hloay haay, yôôych kơq kajoq đơu Kadraq hnoq be kahniq ăm tôôy varơuq kung dii Koot nưq ka haay? 33Kơyq hnoq rôp kadrôôp tachơơl hlê khơl adro jah rơơlh ku Kơy Plêêk? Kơy Plêêk laa Kơy xưng hyioh jăk. 34Kơyq laa adro rôp xadrah? Lôôk Wơơt Dêh Jê-xu laa Kơy heq kaxêêt — bơh iaq nưq đnoyq, atêq tuôôy jah khienq riirh hlê, Kơy nưq pheq đnooy măn pi ti akoh ku Kơy Plêêk — ji Kadraq đong apôôy thaay ka haay. 35Kơyq hnoq aklah đêh haay vlôh klơlh xung xiaq ku Lôôk Wơơt Dêh? Jơq be pơơl dal, pơơl hwơơl, rôôp toop, pangoot thaal, xăk lalôk, ngwi hiêmh, long xieh mak? 36Đaji apok jah valơk, đaneq:

“Vii kơq Kadraq, 'wot koot chiuq xadrah kaxêêt tuôôt hngơy.

'Wot koot biq 'yo đaji trưưu deng ka varơuq pưk vloot.”

37Lunư, đom tôôy varơuq nưq, haay jah jay padêq hloay gamưh Kơy xung xiaq haay. 38Vii gô jah tuôq kajưk đaneq be e varơuq kaxêêt, long varơuq riirh, be e khơl yaak plêêk, long khơl dưk xanok, long kaluh varơuq juneq, long kaluh varơuq hnoq truh, be e qwuyen lưk, 39long pi yơơt, long pi jaruq, kung be e paq kê tôôy paroh leq đêh, hnoq e paraat aklah vlôh haay vlôh klơlh xung xiaq ku Kơy Plêêk, laa varơuq măn đom Lôôk Wơơt Dêh Jê-xu, Lôôk haay.