Rô-ma 4

1Nưq, haay hnoq đnooy Ap-ra-ham, mo kơy ku haay tyauq ka panưh xăk xamơk, heq 'yo hloq jah kajoq? 2Bơyh atoh Ap-ra-ham jah xưng hyioh jăk bơyh varơuq dơơp, yôôych kơy e kơq xôq pa ưưt, bơh leh aalq laa kangưưr Kơy Plêêk. 3Vii Rahlăp Vah đnooy kajoq? “Ap-ra-ham tuôq gamưh Kơy Plêêk, ji varơuq nưq jah 'yo laa hyioh jăk ka kơy.” 4Panưh kadrơy, đôôyq dii kơyq dơơp varơuq, yôôych jêêt kông leh ik 'yo đaji vanong, bơh laa đaji lôôkq. 5Măn đôôyq dii kơyq leh dơơp varơuq, đơu tuôq aduq Kơy khienq adro e kadrôôp jêêk hyioh jăk, yôôych xuum tuôq ku adro nưq jah 'yo laa hyioh jăk. 6Pheq đnooy đaji Đa-vik kung đnooy truh vanong kaxay ku adro đơu Kơy Plêêk 'yo laa hyioh jăk be bơyh varơuq dơơp:

7“Vanong ka khơl leq đơu kaluh varơuq xơk aak ni heq jah tha,

ji kaluh kadrôôp maroh ni heq ik katuh galôp.

8Vanong ka adro đơu Lôôk kajưk dik heq leh jauq truh kadrôôp maroh ku xăk.”

9Nưq yôôych, vanong kaxay neq deng ka adro chiuq goch kađuh, long kung deng ka adro leh goch kađuh? Bơyh haay đong đnooy: “Xuum tuôq nưq jah 'yo laa hyioh jăk ka Ap-ra-ham.” 10Nưq, xuum tuôq hơq heq jah 'yo đaji đaleq? Laa đom tuôôy heq goch kađuh long đom tuôôy koq goch kađuh? Leh aalq đom tuôôy heq goch kađuh, bơh laa đom tuôôy koq goch kađuh. 11Kơy heq nhonq hlêêl goch kađuh đaji dơuq xanưk ku varơuq hyioh jăk xing xuum tuôq, nưq laa xuum tuôq đom tuôôy koq goch kađuh, xôq ka kơy laa mo kơy ku dêq hloay khơl leq e xuum tuôq long koq goch kađuh, jarooy truh varơuq hyioh jăk jah 'yo ka khơl adro nưq; 12kung xôq ka kơy laa mo kơy ku adro chiuq goch kađuh đôôyq dii khơl leq leh vơ vlôh xing pheep goch kađuh, đơu măn laa khơl adro dơơp tyauq hlêêl jôôk xuum tuôq ku Ap-ra-ham, mo kơy haay, đom tuôôy koq goch kađuh.

13Vii apok tavek deng ka Ap-ra-ham long deng ka koot xau ku kơy, nưq laa xôq ka adro laa adro dưk hlê dêh araak, be aalq gamưh ganuun bơh laa gamưh varơuq hyioh jăk ku xuum tuôq. 14Vii atoh khơl adro dưk hlê vlôh xing ganuun, yôôych xuum tuôq biq hlơơp paq ik xung, ji apok tavek biq ka'lăk. 15Bơyh ganuun taway hlê đơơt tôq dayh, bơh aduq leq leh e ganuun yôôych kung leh e varơuq lôp kadrôôp. 16Vii kakơq nưq, lunưq khơl adro dưk katôôl laa vlôh xing xuum tuôq, xôq ăm tyauq ka kach ku vanong plêêk, xôq apok tavek laa kajưk dik ka tôôy koot xau — leh ăm adro vơ vlôh xing ganuun đơu heq, bơh laa ka adro kung vlôh xing xuum tuôq ku Ap-ra-ham, đơu kơy laa mo kơy ku dêq hloay haay, 17đaji heq jah valơk đaneq: “Gô heq lăp koot dơơp vaq ku 'ngưng tamooy daak,” măn kangưưr Kơy đơu kơy tuôq gamưh, 'ngưq laa Kơy Plêêk, Kơy khienq ka adro kaxêêt e varơuq riirh ji taayh kaluh varơuq leh e đaji đong e; 18đơu kơy laa adro heq tuôq gamưh tol xuum takôô gamưh galơh iaq hloay varơuq takôô, xôq ka kơy jah vlôh jêêk vaq ku 'ngưng tamooy daak, tyauq đaji varơuq heq jah xanoh: “Koot xau ku koot hnoq laa đanưq.” 19Ji long leh hmưq hraap pôôt đom xuum tuôq, kơy heq nhonq hloq xăk xamơk kadih kơy đaji biq kaxêêt yôôch (vii jah kơh muuyq hreek xanưm), kung đom varơuq kateh ha'yauq aduq klaak koot ku Sa-ra. 20Bơh wih truh apok tavek ku Kơy Plêêk, kơy heq be biq biit ravơq aklah xuum muut varơuq leh tuôq, wiit hlê, kơy heq jah kalh paraat đom xuum tuôq, tuôôy tơơk tađnah tađnaak tok Kơy Plêêk, 21ji heq xaleep jah tuôq kajưk đaneq varơuq kajoq Kadraq heq tavek, yôôych Kadraq kung e taay yaak xôq dưk dơơp. 22Lunưq “xuum tuôq nưq jah 'yo laa hyioh jăk ka kơy”. 23Panưh kadrơy, apok heq jah valơk đaneq “xuum tuôq nưq jah 'yo laa hyioh jăk ka kơy”, be aalq vơ vii kơy, 24đơu măn vii haay, laa ăm khơl adro đơu xuum tuôq nưq hnoq jah 'yo laa hyioh jăk, 'ngưq laa ka khơl leq tuôq aduq Kơy heq khienq Lôôk Jê-xu, Lôôk haay, riirh hlê xing aduq kaxêêt, 25đơu Kadraq heq biq nôôp vii varơuq vii lôp ku haay ji heq jah dơơp ăm riirh hlê vii varơuq xưng hyioh jăk ku haay.