Skip to content
BibleKenya

Cua Bible Literal Text

Phi-lip 4

Nưq yôôych, wơơy oh ay xung xiaq ji văch takôô ku gô, xuum hlah hlaak ji đoat ku gô, oh ay xung xiaq lơơy, dayh kưq dưk kajưk đanưq đom Lôôk.

Gô ahmưk nhăk Ê-vô-đi ji ahmưk nhăk Sin-ti-kơ e kung muuyq xuum biit đom Lôôk. Kajưk dik đaneq, gô kung xiin ay, adro kung dơơp varơuq dong dik lơơy, ay dayh waak khơl mư nưq, oot heq kung gô tahmơt ka Hêêl Kaxay, kung dii Kơ-lê-măn ji khơl 'wơyq kung dơơp varơuq kadrơy ku gô, đơu anơng ku oot măn đom Rahlăp Varơuq Riirh.

Dayh kưq hloay hlah hlaak đom Lôôk. Gô hnoq đnooy đnoyq, dayh hlah hlaak yơu! Dayh xôq tôôy dro xet xuum klaak hien tagu ku oh ay. Lôôk heq jeq yôôch. Te biit lo kajoq dêq, tađôôy muut đnư, đom tôôy varơuq, bơơn varơuq apôôy ji apôôy vôôch kung dii varơuq kuh kway, dayh xôq kaluh apok apôôy vôôch ku oh ay jah đnooy vlôh ka Kơy Plêêk, yôôch varơuq hrok hrol ku Kơy Plêêk, laa varơuq galơh iaq tôôy hlolh xet, hnoq jư 'yo xuum oh ay ji xuum biit ku oh ay đom Lôôk Wơơt Dêh Jê-xu.

Atêq lôôch, wơơy oh ay, atoh varơuq kajoq laa dong dik, atoh varơuq kajoq đangq vado, atoh varơuq kajoq hyioh jăk, atoh varơuq kajoq paxa rêh, atoh varơuq kajoq đangq xiaq, atoh varơuq kajoq e xarooy kaxay, atoh varơuq leq e katik tolh ji atoh varơuq leq đangq vado, yôôych oh ay pheq biit truh kaluh nưq. Kaluh varơuq oh ay heq hok xet, heq nhonq xok, heq tameng ji heq hloq aduq gô, yôôych dayh dơơp tyauq kaluh varơuq nưq, yôôch Kơy Plêêk hrok hrol hnoq măn kung oh ay.

Gô thier jah hlah hlaak đom Lôôk vii juneq lôôch dik oh ay laay tabông truh gô, dong dik, đom varơuq neq, oh ay 'miêh heq tabông truh gô, bơh leh e kawah xôq kahnoq vlôh. Nưq be aalq laa gô đnooy truh varơuq duh gô, vii gô heq hok pheq hlah xuum long gô măn đom varơuq xalih truh leq. Gô vơơ xet biq adrah, vơơ xet e raah jôh. Đom tưng tôôy varơuq ji đom tôôy aduq, gô heq hok kaah tuôôy jah phiq ji tuôôy chiuq pangoot, kaah tuôôy e raah jôh ji tuôôy biq thiuq. Gô e đu paraat xôq dơơp dêq hloay gamưh Kơy dơơp ka gô kalh paraat. Lunư, oh ay heq dơơp tolh tuôôy kung ahlook aklah varơuq pơơl hwơơl ku gô. Wơơy oh ay theng Phi-lip, oh ay kung xet đaneq đom hngơy patep ku Hêêl Kaxay, tuôôy gô vlôh klơlh Ma-xê-đoan, leh e tayuup vah leq ahlook dii gô đom varơuq baak jêêt, đêh vlôh muuyq adro oh ay, vii hloay aduq Tê-sa-lô-ni-ka, oh ay heq muuyq vaarq yưk atăq tuôông duh xung ka gô. Nưq leh aalq laa gô trôôch axek kadrool, đơu gô trôôch axek raak play athêêp tok raah jôh muut phon e ich lơơy ku oh ay. Gô đong e đu tôôy thưq ji raah jôh đnoyq. Gô heq jah đu, tuôôy nhonq aduq Ep-ba-phô-đich atăq kadrool truh xing oh ay, laa muuy thơơm, laa kuah lêh jah nhonq xok, laa varơuq kaxay xuum Kơy Plêêk. Kơy Plêêk ku gô hnoq kahniq ăm đu tôôy varơuq duh ku oh ay tyauq varơuq karoh e ku Kadraq đom varơuq tađnah tađnaak aduq Lôôk Wơơt Dêh Jê-xu. Apôôy tađnah tađnaak thuôk xuq Kơy Plêêk, Vaq haay, dong truh đơơy đơơy miet miet. Amen.

Xiin vôôch hlơq tôôy khơl vah đom Lôôk Wơơt Dêh Jê-xu. Khơl oh ay măn kung gô vôôch hlơq oh ay. Dêq hloay khơl vah vôôch hlơq oh ay, đơu yưk laa khơl adro thuôk hnhư Sê-sa.

Apôôy vanong plêêk ku Lôôk, laa Lôôk Wơơt Dêh Jê-xu măn kung danưng kooy oh ay. Amen.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.