Phi-lip 3

1Atêq lôôch, wơơy oh ay ku gô, dayh hlah hlaak đom Lôôk. Đôôyq dii gô, be tawaq kajoq tuôôy valơk hlê kung kaluh varơuq neq ka oh ay, vii laa varơuq hrok hrol deng ka oh ay. 2Dayh rơơt rol kaluh xo, dayh rơơt rol khơl adro dơơp kông xơk tauq, dayh rơơt rol pheep goch kađuh pa ôôh. 3Vii haay chiuq pheep goch kađuh dik — nưq laa khơl dro ayuôôt laat bơơn Kơy Phool Hiel ku Kơy Plêêk, pa ưưt đom Lôôk Wơơt Dêh Jê-xu, ji leh takôô gamưh aduq xăk xamơk, 4long gô pheq đnooy e kơq takôô gamưh aduq xăk xamơk. Atoh kơyq nưq biit e kơq xôq gamưh aduq xăk xamơk, yôôych gô măn e 'ngưng iaq: 5gô chiuq pheep goch kađuh muut hngơy thưq thơơm, thuôk tamooy I-sơ-ra-ên, bing ja Bên-ja-min, manih Hê-bơ-rơ, koot ku manih Hê-bơ-rơ; tyauq ganuun, laa manih Pha-ri-si; 6truh xuum talăng jăk yôôych rôp toop tayuup vah; truh varơuq hyioh jăk tyauq ganuun yôôych jah ăm laa leh e aduq đnooy trek. 7Lunư, paq kê varơuq kajoq 'miêh laa lơơy đôôyq dii gô, yôôych vii kơq Lôôk Wơơt Dêh, gô heq 'yo kaluh nưq laa lôôh. 8Bơh măn iaq đanưq đnoyq, gô pheq đnooy 'yo dêq hloay raay laa lôôh vii kơq jaq triq galơh iaq dêq ku varơuq nhonq xet truh Lôôk Wơơt Dêh Jê-xu, Lôôk ku gô, vii Kadraq đơu gô heq chiuq hlơơp dêq hloay — dik, gô 'yo kaluh nưq đaji ka'nhah ka'nhau — xôq ka gô jah Lôôk Wơơt Dêh 9ji jah axek hloq đom Kadraq, leh aalq vii e varơuq hyioh jăk aduq xăk xamơk gô xing ganuun bơh laa varơuq hyioh jăk gamưh xuum tuôq aduq Lôôk Wơơt Dêh — nưq laa varơuq hyioh jăk truh xing Kơy Plêêk tol kahnier xuum tuôq — 10xôq nhonq xet Kadraq ji taay yaak varơuq riirh hlê ku Kadraq kung dii varơuq ahlook đom kaluh pơơl dal ku Kadraq, tuôôy jah taway truh aduq dang dii varơuq kaxêêt ku Kadraq, 11long bơơn kach leq, yôôych gô hnoq ik jah truh varơuq riirh hlê xing varơuq kaxêêt. 12Nưq leh aalq laa gô heq jah kadrool yôôch, long heq jah xaleep yôôch, bơh gô đong charơơk tyauq xôq aleq ka gô hnoq ik tagoa xok kadrool đơu vii kơq nưq, gô kung heq jah Lôôk Wơơt Dêh Jê-xu tagoa xok. 13Wơơy oh ay, gô leh ăm laa kadih xăk gô heq tagoa jah. Bơh gô kưq dơơp muuyq varơuq: tuôôy tawol dêq kaluh kajoq pi katoor đơu kathôp truh kaluh varơuq pi ngưưr, 14wih truh muuyq varơuq, gô đong chawiq tyauq xôq dong jah kadrool truh varơuq tawooyh taayh măn tol plêêk ku Kơy Plêêk đom Lôôk Wơơt Dêh Jê-xu. 15Vii anưq, dêq hloay khơl leq kôt tok raay duh 'yo biit đanưq, măn atoh e aduq leq oh ay biit kach đêh raa, Kơy Plêêk kung hnoq kahnoq vlôh varơuq nưq ka oh ay. 16Lunư, haay heq jah truh mưk leq yôôych dayh tawaak hooy tyauq mưk nưq.

17Wơơy oh ay, dayh jêêk vlôh khơl adro atôôlh tyauq gô, ji dayh 'yo muut khơl dro đong riirh đom kach nưq, tyauq đaji ramil oh ay hloq aduq 'wot. 18Vii e 'ngưng manih — laa khơl dro đơu gô heq ragơy đnooy dii oh ay, bơh juneq gô pheq đnooy pheq nhim đơu đnooy — oot đong riirh đaji khơl dro tachơơl hlê gay charăk ku Lôôk Wơơt Dêh, 19lôôch dik ku khơl adro nưq laa hư hlơơp, lôôk ku oot laa vaduk klaak, ji tađnah tađnaak ku oot măn đom varơuq dơơp thier kamưưl ku oot, nưq laa khơl adro vơ biit truh kaluh varơuq dêh araak. 20Bơh vii qwuyen adro koot ku haay e 'miêh tol plêêk, đơu xing aduq nưq haay hlah hlaak takôô Kơy Wơơt Xok, laa Lôôk, nưq Lôôk Wơơt Dêh Jê-xu, 21laa Kơy hnoq tađôôy đơơu xăk xamơk adrah ku haay jêêk vlôh dang dii xăk xamơk tađnah tađnaak ku Kadraq, dang tyauq varơuq dưk dơơp ku taay yaak Kadraq xôq rôp băt kaluh paroh ka Kadraq.