Skip to content
BibleKenya

Cua Bible Literal Text

Kô-lô-se 1

Phao-lô, dro jah rơơlh ku Lôôk Wơơt Dêh Jê-xu tyauq iq trôôch Kơy Plêêk, ji Ti-mô-thê, adro oh ay ku haay, atăq ka khơl vah ji oh ay muuyq xuum đom Lôôk Wơơt Dêh aduq Kô-lô-se. Apôôy vanong plêêk ji varơuq hrok hrol xing Kơy Plêêk, laa Vaq ji Lôôk haay, laa Lôôk Wơơt Dêh Jê-xu, truh tol oh ay.

'Wot kuh kway Kơy Plêêk, Vaq ku Lôôk haay, laa Lôôk Wơơt Dêh Jê-xu, đom tôôy aduq apôôy ka oh ay, vii heq tameng truh xuum tuôq ku oh ay đom Lôôk Wơơt Dêh Jê-xu ji đom xuum xung xiaq đơu oh ay e đôôyq dii dêq hloay khơl vah, vii kơq xuum takôô gamưh jah deng 'miêh ka oh ay tol kaluh tal plêêk, laa varơuq đơu oh ay heq tameng tuôôy adroyq đom apok đaauq ku varơuq dik, nưq laa Hêêl Kaxay, laa varơuq đong măn đom katul oh ay, đơu Hêêl Kaxay nưq đong vlôh raak play ji jah kôt tok tol dêq dêh araak đaleq, yôôych kung đanưq măn đom oh ay, xing hngơy oh ay heq tameng ji hok xet vanong plêêk ku Kơy Plêêk đom varơuq dik, dang đaji oh ay heq hok xet xing Ê-phap-ra, adro waak varơuq thier xung xiaq ku 'wot, ay laa muuyq adro xapok muuyq xuum ku Lôôk Wơơt Dêh thêq ka 'wot, ji laa adro heq kahnoq ka 'wot xet xuum xung xiaq ku oh ay đom Kơy Phool Hiel.

Kơq anưq, xing hngơy 'wot tek đanưq, yôôych 'wot hloay hloay apôôy ka oh ay ji apôôy vôôch, xôq ka oh ay jah galơh galaay varơuq xet hlolh xuum trôôch Kadraq đom tôôy varơuq khôôt xet ji hlolh xet danưng kooy, xôq tawaak hooy kach taxưngq dii Lôôk đom tôôy varơuq kaxay iq Kadraq, raak play đom tưng varơuq kaxay tamaq, jah kôt tok đom varơuq nhonq xet Kơy Plêêk, jah kalh paraat dii galơh galaay paraat kalh tyauq tong taay yaak tađnah tađnaak ku Kadraq, xôq jah truh tôôy varơuq raanq uunq ji atuq xuum dii xuum hlah hlaak, tơơk tưp apok kuh kway Vaq, Kơy heq khienq oh ay đu varơuq măn đom varơuq jưq phon kơ ngiip dii khơl vah đom varơuq tađnah. Jơq Kơy nưq heq wơơt haay klơlh qwuyen ku varơuq kamơng jaluk, ji jarooy haay truh daak dêh ku Koot xung xiaq ku Kadraq, đom Koot nưq, haay e varơuq wơơt xok, nưq laa varơuq ka'lăk karôp maroh. Koot nưq laa long lơuq ku Kơy Plêêk leh hloq ik, laa Kơy pajêêk vlôh adroyq dik đom tôôy paroh. Vii đom Koot, tôôy paroh tol plêêk long 'laarq vari, tuôông hloq ik long tuôông be hloq ik, raay heq jah jêêk panưk. Ju e laa ngôôy vuua, long qwuyen xakaq 'yo, long padrok, long qwuyen da uh, yôôych dêq hloay raay jah jêêk panưk vlôh xing Koot ji vii Koot. Koot nưq e adroyq tôôy paroh, ji tôôy paroh jư kajưk dii mamuuyq đom Koot. Koot nưq kung laa akoq ku xăk xamơk, nưq tayuup vah. Jơq Koot nưq laa kapa tep dik, laa Kơy pa iir vlôh adroyq nhưk xing đom katul khơl kaxêêt, xôq ka Koot nưq dơơp Kơy dưk adroyq dik tol tôôy paroh. Vii Kơy Plêêk heq hlah xuum xôq ka tôôy varơuq xaleep măn đom Koot, ji gamưh Koot xôq dơơp tagu hlê tôôy paroh dii jơq Kadraq, ju laa kaluh paroh 'laarq vari, long kaluh paroh tol plêêk, vii heq taway truh varơuq dơơp tagu xing Koot nưq, gamưh vahaap tol gay charăk ku Koot. Tuôôy adroyq, tuôôy oh ay biq 'yo laa manih leh qween xet ji laa khơl tachơơl đom xuum biit, đom kaluh varơuq dơơp xơk tauq, đơu juneq, oh ay heq jah dơơp tagu hlê gamưh varơuq kaxêêt đom xăk xamơk ku Koot, xôq dưk kahnoq vlôh oh ay adroyq kangưưr Kadraq, laa khơl adro hlăng vah, leh hlêêl tachoot, ji be e aduq đnooy ik, nưq laa atoh oh ay kưq măn đom xuum tuôq, chiuq vlok rayah, dưk kajưk, ji leh biq vlôh klơlh xuum takôô gamưh ku Hêêl Kaxay đơu oh ay heq tameng, laa Hêêl Kaxay heq jah padoh taboon vlôh ka tôôy paroh 'laarq plêêk, đơu vii anưq, gô, Phao-lô, heq jêêk vlôh muuyq adro xapok.

Juneq gô hlah hlaak đom kaluh pơơl dal ku gô vii oh ay, ji bơơn xăk xamơk gô, gô đong galôp viik kaluh phon măn thiuq đom kaluh varơuq jiq jiêh ku Lôôk Wơơt Dêh, vii kơq xăk xamơk Kadraq, nưq laa tayuup vah, đơu xing đnư, gô heq vlôh jêêk muuyq dro xapok, tyauq varơuq jư xakaq ku Kơy Plêêk, đơu varơuq nưq heq jah pahnăp ka gô vii oh ay, xôq payôôch varơuq padoh taboon apok ku Kơy Plêêk, nưq laa varơuq kadook heq jah padu kinq xaloot kaluh đơơy xanưm ji tuôôt 'ngưng adrơơk, đơu juneq, varơuq kadook nưq heq jah kahnoq vlôh ka khơl vah ku Kadraq, laa khơl adro đơu Kơy Plêêk xung kahnoq vlôh đaleq laa varơuq karoh e tađnah tađnaak ku varơuq kadook neq đom katul kaluh tamooy kadrơy, nưq laa Lôôk Wơơt Dêh đom oh ay, nưq laa varơuq takôô gamưh tađnah tađnaak. Nưq laa Kơy đơu 'wot padoh taboon, tuôôy đnooy panhăk tôôy adro, ji pato dayq tôôy adro dii dêq hloay varơuq khôôt xet, xôq 'wot hnoq ik dưk kahnoq vlôh tôôy adro laa xaleep đom Lôôk Wơơt Dêh. Kung vii varơuq nưq đơu gô dơơp galeh galal, tahmơt tyauq đaji varơuq ku Kadraq đong dưk dơơp dii da uh đom gô.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.