Kô-lô-se 2

1Vii gô xung oh ay xet gô e varơuq tahmơt kôt đaleq ka oh ay, ji ka khơl tuôq aduq Lao-đi-xê, kung dii xet toleq adro đnoyq koq hmưq hloq mot gô đom phon xăk xamơk, 2xôq xuum oot jah ahluk ahlul, tuôôy jah anguk dii mamuuyq đom xuum xung xiaq, ji wih truh tôôy varơuq viik vauq ku varơuq xet hlolh galơh galaay kajưk, jarooy truh varơuq nhonq xet varơuq kadook ku Kơy Plêêk, nưq laa Lôôk Wơơt Dêh, 3đơu đom Kadraq laa varơuq kadook xôq dêq hloay kaluh varơuq khôôt xet ji hlolh xet. 4Gô đnooy varơuq neq xôq be kơyq hnoq ik pa ôôh lar oh ay bơơn apok đnooy adô aluut. 5Vii long jơq laa gô leh măn đom xăk xamơk, bơh gô măn dii oh ay đom danưng kooy, hlah hlaak ji 'yo hloq varơuq e adroyq e atêq đom oh ay, kung dii paraat kalh ku xuum tuôq ku oh ay đom Lôôk Wơơt Dêh.

6Vii anưq, hloay tuôôy oh ay heq nhonq xok Lôôk Wơơt Dêh Jê-xu dơơp Lôôk, yôôych dayh tawaak hooy đom Kadraq, 7chiuq vlok rayah ji jah kôt tok đom Kadraq, kung jah dơơp ka kajưk đom xuum tuôq dang đaji oh ay heq jah pato dayq, ji raah jôh đom varơuq kuh kway.

8Dayh rơơt rol, leh kheoq muuyq kơyq nưq hnoq laa adro rôp jư oh ay bơơn apok tagêh pa ôôh ji apok pato hong heng, tyauq apok taboon ku koot manih, tyauq kaluh huuy xarooy ku dêh araak, đơu leh tyauq Lôôk Wơơt Dêh. 9Vii đom Kadraq, dêq hloay varơuq đu tolh ku yaak Kơy Plêêk măn đom xăk xamơk, 10ji oh ay heq jah dơơp ka đu tolh đom Kadraq, Kơy laa ưk ku tôôy qwuyen xakaq ji qwuyen da uh, 11đơu đom Kơy nưq, oh ay kung jah goch kađuh dii pheep goch kađuh leh aalq xing ti manih dưk dơơp, bơh bơơn varơuq look ka'lăk katik xăk xamơk, nưq laa bơơn pheep goch kađuh ku Lôôk Wơơt Dêh, 12vii heq jah up dii Kadraq đom pheep bap-tem, ji đom Kadraq oh ay heq jah riirh hlê gamưh xuum tuôq aduq taay yaak ku Kơy Plêêk, Kơy heq dơơp Kadraq riirh hlê xing aduq kaxêêt. 13Truh phon oh ay, đong tuôôy kaxêêt hlơơp đom kaluh lôp kadrôôp ji đom varơuq xăk xamơk koq goch kađuh ku oh ay, yôôych Kadraq heq dơơp ka oh ay kung riirh dii Kadraq, vii heq ka'lăk kaluh lôp kadrôôp ka haay, 14heq ka'lăk dêq jơyq valơk truh varơuq tachơơl hlê haay, nưq 'miêh laa varơuq tachơơl dii haay, ji Kadraq heq ka'lăk ni klơlh katul kaluh nưq vlôh, tuôôy đongq đing ni muut gay charăk, 15vih ka'lăk kaluh qwuyen xakaq ji qwuyen da uh, Kadraq heq khienq oot dơơp varơuq xagiel ka tôôy manih, tuôôy jah jay oot tol gay charăk.

16Vii anưq, te xôq kơyq xưh xadrah oh ay đom tuôông xa ji đom tuôông hôôch, long đom tuôôy ku hngơy lêh, hngơy xiêk đơơu, long hngơy Sa-bat, 17đơu kaluh nưq vơ laa long lơuq ku kaluh varơuq jeq truh, măn dong dik thuôk truh Lôôk Wơơt Dêh. 18Te xôq dro leq dơơp oh ay hlơơp phon kadrool, tuôôy kahnoq vlôh xiaq trôôch veeh apôôt xăk ji varơuq kuh kul yaak plêêk, gamưh muut kaluh kajoq xăk jek heq 'yo hloq, jêêk vlôh katơơk galơh kach leh yuôôr aal xing xuum biit tyauq xăk xamơk ku ni, 19ji be pagăp riit dii Akoq, đơu xing aduq Kadraq, dêq xăk xamơk xing kaluh atu taboot ji talơy aluq alaq jah riirh ji hooy hlê dii mamuuyq; xăk xamơk nưq kôt tok dii paraat kôt tok truh xing Kơy Plêêk.

20Atoh oh ay heq kaxêêt kung dii Lôôk Wơơt Dêh, vlôh klơlh kaluh ganuun ku dêh araak, yôôych vii aleq đom tuôôy đong măn riirh đom katul dêh araak, oh ay laayq tameng tyauq kaluh ganuun ku ni: 21“Leh adrơk, leh nhemq, leh vêq!” 22nưq laa kaluh ganuun đơu dêq hloay raay jarooy truh varơuq hruh hrek tuôôy xok dơơp, tyauq kaluh ganuun ji apok pato dayq ku koot manih? 23Dêq hloay nưq laa varơuq kajoq, ju tađnưk varơuq kaveeh khôôt xet đom lêh lâp vlôh kadih, kung varơuq apôôt xăk ji pơq parêq ku xăk xamơk, yôôych be ik xung liq xôq tachơơl hlê hmưch trôôch ku xăk xamơk.