Kô-lô-se 3

1Vii anưq, atoh oh ay heq jah dơơp ăm riirh hlê dii Lôôk Wơơt Dêh, yôôych dayh axek akhiim kaluh varơuq măn tol plêêk, aduq Lôôk Wơơt Dêh đong 'ngôôy pi bơ Kơy Plêêk. 2Dayh wih xuum biit truh kaluh varơuq măn tol plêêk, leh aalq kaluh thưq măn 'laarq vari. 3Vii oh ay heq kaxêêt, ji varơuq riirh oh ay heq jah kadook dii Lôôk Wơơt Dêh đom Kơy Plêêk. 4Tuôôy Lôôk Wơơt Dêh, laa varơuq riirh ku oh ay, rama vlôh, yôôych oh ay kung hnoq rama vlôh dii Kadraq đom tađnah tađnaak.

5Vii nưq, dayh dơơp kaxêêt kaluh phon 'laarq vari — đaji apuq atrăp, klơl 'yêq, tuut taak, hmưch trôôch xơk tauq, ji hmưch trôôch, đơu hmưch trôôch laa akuh vangưl, 6Vii kaluh varơuq neq đơu đơơt tôq jaraq ku Kơy Plêêk đong truh, 7đơu adroyq nưq, oh ay kung heq tawaak hooy đom kaluh varơuq nưq, tuôôy oh ay măn riirh đom kaluh nưq. 8Bơh juneq oh ay pheq ka'lăk kaluh varơuq neq — đaji jaraq karưn, tôq dayh, xơk tauq, đnooy ra ơơh, kung apok a'moh vlôh xing huuy oh ay. 9Te đnooy pa ôôh mamuuyq, vii heq leh ka'lăk koot manih duut kung kaluh varơuq dơơp ku ni, 10ji heq hlưp muut koot manih đơơu, nưq laa manih đong jah dơơp đơơu đom varơuq hlolh xet tyauq long lơuq ku Kơy jêêk panưk ni, 11laa aduq đơu leh e manih Hi Lap ji manih Jo Thaiq, manih goch kađuh ji manih leh goch kađuh, manih leh e xa hok, manih Si-the, manih xapok, manih rayơh rayơơy, bơh Lôôk Wơơt Dêh laa tôôy varơuq, ji đom tôôy varơuq.

12Vii anưq, đaji khơl jah rơơlh ku Kơy Plêêk, laa manih vah ji jah xung xiaq, dayh hlưp xok xuum angơuq, kaxay xuum, apôôt xăk, xuum be huq, atuq xuum, 13chiuq uunq mamuuyq ji ka'lăk kadrôôp mamuuyq, atoh đaji kơyq nưq e varơuq ramooy dii khơl drơy, yôôych đaji Lôôk heq ka'lăk kadrôôp oh ay đaleq, oh ay kung duh pheq dang đanưq. 14Bơh taalh kaluh varơuq nưq, pheq hlưp xok xuum xung xiaq, nưq laa thơơl taboot ku varơuq xaleep. 15Dayh xôq varơuq hrok hrol ku Lôôk Wơơt Dêh xakaq 'yo đom xuum oh ay, đơu oh ay kung heq jah taayh truh varơuq hrok hrol nưq đom muuyq xăk xamơk ji dayh kahnoq vlôh xuum xet ơơn. 16Dayh xôq ka apok Lôôk Wơơt Dêh măn đom oh ay kach galơh galaay, tuôôy pato dayq bơơn dêq hloay varơuq khôôt xet, ahmưk nhăk mamuuyq bơơn kaluh thi thiên, kaluh baai kacheeu ayuôôt ji kaluh linh khuk, kacheeu dii varơuq xet vanong đom xuum oh ay deng ka Kơy Plêêk. 17Tôôy varơuq đơu oh ay dơơp, ju bơơn apok đnooy long bơơn varơuq dơơp, dayh dơơp dêq hloay đom yal Lôôk, laa Lôôk Jê-xu, gamưh Kadraq kuh kway Kơy Plêêk, laa Vaq. 18Khơl dơơp kadrê, dayh tameng apok kanau xăk, đaji nưq laa varơuq taxưngq đom Lôôk. 19Khơl dơơp kanau, dayh xiaq kadrê xăk, ji te dơơp ra ơơh dii kadrê. 20Khơl dơơp koot, dayh tameng apok miq vaq êêp đom tôôy varơuq, vii neq laa varơuq kaxay xuum Lôôk. 21Khơl dơơp vaq, te tache jaraq koot xau êêp, xôq oot leh huq gưlh xuum. 22Manih dơơp xapok, dayh tameng apok kôôch êêp đom phon xăk đom tôôy varơuq, leh aalq dii varơuq 'yo jư ku kôôch đaji toleq adro ragơy xok xuum khơl drơy, bơh dii xuum dong dik, kuh yôq Lôôk. 23Long oh ay dơơp muuyq varơuq kajoq, dayh dơơp xing aduq xuum klaak đanưq ka Lôôk đơu leh aalq ka khơl drơy, 24vii xet đaneq oh ay hnoq nhonq phon kadrool truh kơ ngiip ku oh ay xing aduq Lôôk. Oh ay đong dơơp xapok ka Lôôk, jơq laa Lôôk Wơơt Dêh. 25Bơh adro leq dơơp varơuq xơk tauq hnoq nhonq hlê varơuq đơu adro nưq heq dơơp kach xơk tauq, ji leh e varơuq bing kơyq.