Skip to content
BibleKenya

Cua Bible Literal Text

Kô-lô-se 4

Adro dơơp kôôch, dayh taway truh ka khơl xapok ku kơy varơuq hyioh jăk ji muuyq atoq, vii xet aneq oh ay kung e muuyq Kôôch tol plêêk.

Dayh garơng kajưk đom varơuq apôôy, tuôôy parol đom varơuq dơơp neq bơơn varơuq kuh kway, kung đaji anguk mamuuyq apôôy ka 'wot, xôq ka Kơy Plêêk luh ka 'wot poop 'mok ku varơuq padoh taboon đaauq, xôq đnooy vlôh varơuq kadook truh Lôôk Wơơt Dêh, kung vii varơuq kadook nưq đơu gô biq rôp karuk, aleq ka gô hnoq ik đnooy vlôh apok kadook nưq kach ro raang, đaji gô pheq đnooy. Dayh xa măn đom varơuq khôôt xet đôôyq dii khơl koq tuôq, dayh xet xok kawat. Apok xarooy oh ay pheq hloay e vanong, tuôôy athêêp voh muut, xôq xet varơuq nưq thier duh ka oh ay đaleq xôq tơơl hlê dii tôôy muuyq adro.

Tôôy varơuq tapiq truh gô, yôôych muuyq adro oh ay thier xung xiaq, muuyq adro xapok muuyq xuum, ji muuyq adro kung dơơp varơuq đom Lôôk, laa Ti-chi-kơ hnoq kahnoq ka oh ay xet, ay nưq laa manih đơu gô patăk truh tavơh oh ay vii kơq neq, nưq laa xôq oh ay xet hêêl truh 'wot, ji xôq oh ay hnoq ik ahluk ahlul xuum oh ay, hooy kung laa Ô-nê-sim, dro oh ay muuyq xuum ji xung xiaq, ay nưq e kung dêh xing oh ay, oot hnoq ăm oh ay xet kaluh varơuq măn kađnen.

A-ri-tak, 'wơyq măn tu ku gô, vôôch hlơq oh ay, kung dii Mak, oh nhu ku Ba-na-ba (oh ay heq nhonq jah apok pato nhăk truh ay nưq; atoh ay nưq truh dii oh ay, yôôych dayh kaa đoonq ay nưq), kung đaji Jê-xu, dro jah taayh laa Juk-tu đnoyq. Đom khơl adro e pa iir vlôh laa manih heq goch kađuh, vơ e oot laa khơl 'wơyq waak varơuq vơ e kung gô vii daak dêh ku Kơy Plêêk, oot laa varơuq hlơq hlôôp ku gô. Ê-phap-ra vôôch hlơq oh ay, ay nưq vlôh xing oh ay, laa muuyq dro xapok ku Lôôk Wơơt Dêh Jê-xu, tuôôy hloay tahmơt vii oh ay đom varơuq apôôy, xôq oh ay jah dơơp ka dưk kajưk, kôt tok, ji tuôq kajưk đom kaluh iq trôôch ku Kơy Plêêk. Vii gô dơơp xanưk truh ay nưq, đaneq ay nưq heq chiuq pơơl hwơơl thier 'ngưng vii oh ay, kung đaji vii khơl tuôq aduq Lao-đi-xê ji aduq Hi-ê-ra-bô-li. Lu-ka, adro thơy jarơơu xung xiaq, kung Đê-ma, vôôch hlơq oh ay. Xiin vôôch hlơq khơl oh ay aduq Lao-đi-xê, ji Nim-pha, kung tayuup vah anguk aduq hnhư ku mư nưq. Tuôôy hla thư neq heq jah đok payôôch đom katul oh ay, pheq chăk đaneq ni kung jah đok aduq Tayuup vah Lao-đi-xê, ji kajưk đaneq oh ay kung duh đok thư xing Lao-đi-xê đnoyq. Xiin đnooy dii A-chip, đaneq: “Dayh tabông muut varơuq dơơp đơu ay heq nhonq đom Lôôk, xôq ay hnoq ik dơơp payôôch varơuq dơơp nưq.”

Apok vôôch hlơq neq jo kadih ti gô — Phao-lô. Dayh văch truh kaluh talơy looy tooy ku gô. Apôôy vanong plêêk măn kung oh ay.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.