Cua Bible Literal Text
Ma-thi-ơ 2
Atêq tuôôy Lôôk Jê-xu heq jah pa iir vlôh aduq Bêt-lê-hem dêh Ju-đê đom đơơy vuua Hê-rôt yôôych dayh 'yo hơq, khơl hnhư thơy jarơơu xing pi hngơy vlok truh aduq Jê-ru-sa-lem, vôôch đaneq: “Kơy heq jah pa iir vlôh laa Vuua manih Jo Thaiq măn 'leq? Vii 'wot heq hloq xalok ku Kadraq aduq pi hngơy vlok ji truh xôq akuh ayuôôt Kadraq.” Bơh atêq tuôôy tameng varơuq nưq, vuua Hê-rôt biq xôôl dôôl, ji dêq hloay theng Jê-ru-sa-lem kung đaji kơy. Yôôch atêq tuôôy patăk anguk dêq hloay khơl thơy tơơk tưp kôt ji khơl thơy pato ganuun đom manih karôp, kơy vôôch 'yo oot: “Wơơt Lôôk jah pa iir vlôh aduq 'leq?” Oot tơơl dii vuua: “Aduq Bêt-lê-hem dêh Ju-đê, vii heq jah valơk đanưq gamưh khơl hnhư hlit,
‘Măn Bêt-lê-hem, vari Ju-đa,
xăk be aalq laa de dik đom khơl dưk xanok ku Ju-đa,
vii xing xăk hnoq vlôh muuyq Kơy dưk xanok
laa Kơy hnoq xakaq jarooy I-sơ-ra-ên, tamooy gô.’”
Tuôôy nưq, atêq tuôôy padu kadook taayh khơl hnhư thơy jarơơu truh, Hê-rôt vôôch 'yo oot kawat rama vlôh ku xalok. Tuôôy heq xôq oot hooy truh Bêt-lê-hem, kơy patăk: “Atêq tuôôy hooy, êêp kơy dayh vôôch 'yo dong hlolh truh oh de, yôôch tuôôy êêp kơy heq axek hloq, dayh đnooy ka gô xôq gô kung truh vanê ayuôôt Kadraq.” Atêq tuôôy heq tameng vuua, oot dưk hooy, ji dayh 'yo hơq, xalok đơu oot heq 'yo hloq pi hngơy vlok hooy adroyq oot dong truh tuôôy heq truh yôôych ni dưk hnhep ataalh aduq oh de măn. Tuôôy heq 'yo hloq xalok, oot thier raa hlah hlaak đom xuum hlah paq ik. Atêq tuôôy muut đom hnhư, oot hloq oh de kung Ma-ri, miq Kadraq. Yôôch tuôôy heq kul pôôt yôôych oot kuh ayuôôt Kadraq, ji tuôôy heq tơq kuah tưp ku oot vlôh, oot tơơk tưp ka Kadraq kaluh kuah lêh: vajang, jarơơu ji ka hlơu. Ji vii heq jah đnooy adroyq te wiit xuq hlê dii Hê-rôt đom muuyq vik apau, oot xuq daak oot bơơn trôôk kadrơy.
Tuôôy oot heq hooy yôôch, yôôych dayh 'yo hơq, muuyq yaak plêêk ku Lôôk rama vlôh dii Jô-sep đom muuyq vik apau, xanoh đaneq: “Atêq tuôôy kadrăch kah, dayh xagook oh de kung miq Kadraq ji vlôh du dêh Ai Kâp, yôôch dayh măn hlê đnư dong truh tuôôy leq gô dăt ay, vii Hê-rôt đinq axek oh de xôq păk kaxêêt.” Yôôch atêq tuôôy kadrăch kah, kơy xagook oh de kung miq Kadraq vlôh du Ai Kâp đom ka klôôy, ji kơy măn hlê đnư dong truh tuôôy Hê-rôt kaxêêt, nưq laa xôq jah jêêk varơuq heq jah xanoh xing Lôôk gamưh kơy hlit, đaneq: “Gô hnoq taayh koot Gô vlôh klơlh Ai Kâp.”
Tuôôy nưq, Tuôôy hloq đaneq ni heq biq khơl hnhư thơy jarơơu 'yo leh ra kajoq, Hê-rôt thier tôq jaraq, atêq tuôôy pahêêr dăt hooy, kơy păk kaxêêt dêq hloay khơl oh kanau xing vaarq xanưm hooy apôôt aduq Bêt-lê-hem ji đom dêq hloay ku dêh nưq, tyauq đaji kawat đơu kơy nưq vôôch 'yo xing khơl hnhư thơy jarơơu. Đanưq laa jah jêêk varơuq heq jah xanoh gamưh hnhư hlit Jê-rê-mi, đaneq:
“Muuyq apok alo jah tameng tek đom theng Ra-ma,
xarooy nhim ook ji taayh alo dik miik,
Ra-chên nhim ka khơl koot ni,
ji mư leh chiuq jah hlơq hlôôp, vii oot leh măn đnoyq.”
Tuôôy nưq, tuôôy Hê-rôt heq kaxêêt, yôôych dayh 'yo hơq, muuyq yaak plêêk ku Lôôk rama vlôh dii Jô-sep đom muuyq vik apau aduq Ai Kâp, dăt đaneq: “Tuôôy heq kadrăch kah, ay dayh xagook oh de ji miq Kadraq yôôch hooy truh vari I-sơ-ra-ên, vii khơl adro axek păk kaxêêt xăk riirh ku oh de heq kaxêêt.” Yôôch tuôôy heq kadrăch kah, kơy xagook tyauq kơy oh de kung miq Kadraq, ji muut đom vari I-sơ-ra-ên. Lunư, atêq tuôôy tameng đaneq A-chê-la-u đong dưk xanok dêh Ju-đê thay ka Hê-rôt, vaq kơy, kơy yôq hooy truh đnư. Bơh tuôôy heq jah đnooy adroyq đom vik apau, kơy wiit xuq dêh Ga-li-lê, ji tuôôy heq truh đnư yôôch, kơy măn hlê đom muuyq theng jah taayh laa Na-xa-ret, xôq jah jêêk varơuq heq jah xanoh gamưh khơl hnhư hlit, đaneq Kadraq hnoq jah taayh laa manih Na-xa-ret.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.