Ma-thi-ơ 3

1Đom kaluh hngơy nưq, Jăng Bap-tit truh pato dayq đom wăngq we dêh Ju-đê, 2đaneq: “Dayh wiit xuum, vii daak dêh daak plêêk heq jeq.” 3Vii neq laa adro heq jah đnooy truh bơyh hlit Ê-sai, đaneq:

“E xarooy manih taayh kôt đom wăngq we:

‘Dayh deep 'miêh trôôk ku Lôôk,

dayh dơơp manay hyioh tôôy trôôk Kadraq.’”

4Jăng neq hlưp aau xing hlôôk lak đa, hnek vek katêêk bơơn kađuh rawiit katêêk, măn tuôông xa ku kơy laa lêêp ji daak hlut gôk. 5Yôôch tamooy theng Jê-ru-sa-lem, dêq dêh Ju-đê ji dêq hloay dih dêh rawiit gah tavook daak Jô-đanh truh dii kơy, 6ji tuôôy đong xưng kadrôôp oot, oot jah kơy dơơp bap-tem đom tavook daak Jô-đanh. 7Atêq tuôôy 'yo hloq 'ngưng manih Pha-ri-si ji Sa-đu-sê truh vii pheep bap-tem ku kơy, kơy đnooy dii oot: “Bing koot xau ku voolh đôk hơq! Kơyq heq đnooy adroyq ka êêp klôônq xadăk klơlh đơơt tôq dayh jeq truh? 8Lunưq, dayh raak play taxưngq dii xuum wiit xuum. 9Ji êêp kơy kung te biit đơu dăt mamuuyq: ‘Haay e mo kơy Ap-ra-ham.’ Vii gô đnooy dii êêp kơy đaneq Kơy Plêêk hnoq ik panưk tok koot xau ka Ap-ra-ham xing kaluh kuk phơu neq. 10Bơh xuôôk heq jah xôq angôôk rayah ưk yôôch. Lunưq, dêq hloay kaluh ưk atoh leh vlôh play kaxay yôôych biq kơl pôôt ji qweek muut ôôlh. 11Gô dơơp bap-tem truh varơuq wiit xuum ka oh ay bơơn daak. Bơh Kơy truh atêq gô e taay yaak galơh iaq gô, truh Kơy nưq yôôych gô laa adro leh taxưngq xôq ta'nhaak kaxôôp ku Kadraq. Kadraq hnoq dơơp bap-tem ka oh ay bơơn Kơy Phool Hiel ji bơơn ôôlh; 12kapưk ku Kadraq măn đom ti kadraq, yôôch Kadraq hnoq ôôp xarêh chaal pôh va Kadraq ji anguk va ku Kadraq muut pơ. Bơh Kadraq hnoq vuh jaq juch hre bơơn ôôlh be dong leq apoch ik.”

13Tuôôy nưq, Lôôk Jê-xu hooy xing dêh Ga-li-lê truh daak Jô-đanh, aduq ku Jăng, xôq jah kơy dơơp bap-tem rơy. 14Bơh Jăng akhiim axek trôôk klơl Kadraq, đaneq: “Gô đơơu e duh jah Kadraq dơơp bap-tem, anưq đơu Kadraq laay truh dii gô ih?” 15Bơh tuôôy tơơl hlê, Lôôk Jê-xu đnooy dii kơy: “Juneq, dayh dơơp anưq yơu, vii đanưq laa tamuut đôôyq dii haay xôq dơơp xaleep tôôy varơuq hyioh jăk.” Yôôch Kadraq xôq kơy dơơp. 16Tuôôy nưq, atêq tuôôy chiuq bap-tem yôôch, Lôôk Jê-xu vơ hloay tok klơlh daak, ji 'yo hơq, kaluh taalh plêêk jah luh vlôh ka Kadraq, yôôch Kadraq 'yo hloq Kơy Phool Hiel ku Kơy Plêêk kahri pôôt dang đaji xêêp ka trơu, găp tol Kadraq, 17ji 'yo hơq, muuyq apok xanoh xing kaluh taalh plêêk đaneq: “Neq laa Koot xung xiaq ku Gô. Gô thier hlah xuum aduq Koot nưq.”