Ma-thi-ơ 4

1Yôôch Lôôk Jê-xu jah jarooy muut wăngq we bơyh Kơy Phool Hiel xôq chiuq kamuuych adô aluut. 2Atêq nưq, tuôôy heq deek xa poot kưl hngơy ji poot kưl mưng, yôôych Kadraq pangoot. 3Atêq tuôôy truh jeq, adro adô aluut đnooy dii Kadraq: “Atoh kơy laa Koot Kơy Plêêk, dayh đnooy dăt xôq kaluh kuk phơu neq vlôh jêêk tôôp yơu.” 4Bơh tơơl hlê, Kadraq đnooy: “E apok jah valơk: ‘Koot manih hnoq riirh be aalq gamưh tôôp hloh heq, bơh laa gamưh tôôy apok đnooy vlôh xing huuy Kơy Plêêk.’” 5Yôôch kamuuych taway Kadraq muut đom theng vah, ăm Kadraq dưk măn tol aduq yơơt dik ku hnhư hơu, 6ji đnooy dii Kadraq: “Atoh kơy laa Koot Kơy Plêêk, dayh katruyh xăk pôôt yơu, vii e apok jah valơk, đaneq: ‘Kadraq hnoq patăk dăt truh koot ka khơl yaak plêêk Kadraq,’ ji: ‘Oot hnoq tơơk koot ganưq tol ti oot, e kheoq jôôk koot hnoq ik xatôôlh muut kuk phơu.’”

7Lôôk Jê-xu tơơl hlê ni: “Mot kadrơy, e apok jah valơk: ‘Koot hnoq be thưh Lôôk, laa Kơy Plêêk ku koot.’” 8Muuyq yưk tra, kamuuych taway Kadraq tok muuyq ngok đoot thier yơơt ji ăm Kadraq 'yo dêq hloay kaluh daak tol dêh araak kung varơuq karoh e ku oot. 9Ji ni đnooy dii Kadraq: “Gô hnoq ăm kơy dêq hloay kaluh ưng neq, atoh kơy kuh ayuôôt gô, bơơn varơuq kul xăk pôôt.” 10Tuôôy nưq, Lôôk Jê-xu xanoh dii ni: “Sa-tan, dayh chuh xing neen! Vii e apok jah valơk: ‘Koot hnoq ayuôôt laat Lôôk, laa Kơy Plêêk ku koot, ji koot hnoq hơu varơuq vơ muuyq dro Kadraq.’” 11Yôôch kamuuych chuh klơlh Kadraq, ji 'yo hơq, khơl yaak plêêk truh ji xarôp hơu varơuq Kadraq.

12Tuôôy nưq, atêq tuôôy tameng đaneq Jăng heq biq rôp, Kadraq wiit xuq dêh Ga-li-lê. 13Tuôôy heq hooy klơlh Na-xa-ret, Kadraq truh riirh aduq theng Ka-bê-na-um gah tahli, đom vari dêh Sa-bu-lôn ji Nep-ta-li, 14xôq jah jêêk varơuq heq jah xanoh gamưh hnhư hlit Ê-sai, đaneq:

15“Vari Sa-bu-lôn ji vari Nep-ta-li,

trôôk hooy vlôh kơn ngưưr tahli, pi hơq tavook daak Jô-đanh,

nưq laa dêh Ga-li-lê ku kaluh tamooy daak kadrơy —

16tamooy 'ngôôy đom kamơng jaluk heq 'yo hloq xaraar tađnah kôt,

ji dii khơl adro 'ngôôy đom dêh vari ji long lơuq varơuq kaxêêt,

yôôych xaraar tađnah heq ahnhe tol oot.”

17Xing tuôôy nưq, Lôôk Jê-xu xarôp padoh pato ji xanoh: “Dayh wiit xuum, vii daak dêh daak plêêk heq truh jeq.” 18Tuôôy nưq, tuôôy đong hooy jôôk gah tahli Ga-li-lê, Kadraq 'yo hloq vaarq dro oh ay, Si-môn, jah taayh laa Phi-e-rơ, ji Anh-rê, ma oh kơy nưq, đong qwel lưyq pôôt tahli vii oot laa manih hmơt rôp kaa. 19Ji Kadraq dăt oot: “Dayh hooy tyauq thơy, yôôych thơy hnoq khienq oh ay jêêk khơl ti hmơt lưyq manih.” 20Vơ hloay, tuôôy heq ka'lăk lưyq oot, oot tyauq Kadraq. 21Atêq tuôôy xing nưq hooy đnoyq, Kadraq hloq vaarq dro oh ay kadrơy, laa Ja-kơ koot ku Xê-bê-đê, ji Jăng, ma oh kơy, đom ge kung dii Xê-bê-đê, vaq ku oot, đong kaval lưyq oot ji Kadraq tawooyh taayh oot, 22yôôch vơ hloay, tuôôy heq hooy klơlh ge ji Vaq oot, oot tyauq Kadraq.

23Ji Kadraq hooy kađneng kahơ loch dêq dêh Ga-li-lê, pato dayq đom kaluh hnhư tagumq ku tamooy dêh, padoh pato Hêêl Kaxay truh daak Plêêk, kung payơh tôôy bingq tâk ji tôôy jiq jiêh đom manih karôp. 24Hêêl đnooy truh Kadraq ahna vlôh dong truh loch dêq dêh Si-ri, ji khơl drơy jarooy truh ka Kadraq tôôy adro e bingq, biq tavơh 'ngưng kaluh bingq ji jiq 'nhok đêh mamuuyq, biq kamuuych nhôp, biq be drơy, taqwauq talêêt, ji Kadraq payơh dêq ka oot. 25Kaluh bing manih karôp hooy tyauq Kadraq xing Ga-li-lê, Đê-ka-bô-lơ, Jê-ru-sa-lem, Ju-đê ji pi hơq tavook daak Jô-đanh.