Ma-thi-ơ 1

1Rahlăp adrơơk ku Lôôk Wơơt Dêh Jê-xu, koot xau Đa-vik, koot xau Ap-ra-ham: 2Ap-ra-ham pahleh I-sak, I-sak pahleh Ja-kôp, Ja-kôp pahleh Ju-đa ji oh ay ku kơy, 3Ju-đa xok Ta-ma pahleh Phê-rêt ji Sê-rach, Phê-rêt pahleh Hêt-rôn, Hêt-rôn pahleh A-ram, 4A-ram pahleh A-mi-na-đap, A-mi-na-đap pahleh Na-ach-son, Na-ach-son pahleh Sanh-môn, 5Sanh-môn xok Ra-hap pahleh Bô-ô, Bô-ô xok Ru-tơ pahleh Ô-bêt, Ô-bêt pahleh Je-sê, 6Je-sê pahleh vuua Đa-vik, Đa-vik xok kadrê ku U-ri pahleh Sa-lô-môn,

7Sa-lô-môn pahleh Rô-bô-am, Rô-bô-am pahleh A-bi-ja, A-bi-ja pahleh A-sa, 8A-sa pahleh Jô-sa-phat, Jô-sa-phat pahleh Jô-ram, Jô-ram pahleh Ô-xia. 9Ô-xia pahleh Jô-tam, Jô-tam pahleh A-cha, A-cha pahleh Ê-xê-chia, 10Ê-xê-chia pahleh Ma-na-se, Ma-na-se pahleh A-môn, A-môn pahleh Jô-si-a, 11Jô-si-a pahleh Jê-kô-nia ji oh ay ku Kơy muut katuôôy biq rôp dơơp xapok hlê Ba-bi-lôn,

12ji atêq katuôôy biq rôp dơơp xapok hlê Ba-bi-lôn, Jê-kô-nia pahleh Sa-la-thi-ên, Sa-la-thi-ên pahleh Xô-rô-ba-bên, 13Xô-rô-ba-bên pahleh A-bi-ut, A-bi-ut pahleh Ê-li-a-kim, Ê-li-a-kim pahleh A-xô, 14A-xô pahleh Sa-đôk, Sa-đôk pahleh A-chim, A-chim pahleh Ê-li-ut, 15Ê-li-ut pahleh Ê-lê-a-xa, Ê-lê-a-xa pahleh Ma-than, Ma-than pahleh Ja-kôp, 16Ja-kôp pahleh Jô-sep, kanau ku Ma-ri, đơu gamưh mo, Lôôk Jê-xu, Kơy jah taayh laa Lôôk Wơơt Dêh, jah pa iir vlôh. 17Đanưq, dêq hloay kaluh adrơơk xing Ap-ra-ham truh Đa-vik laa kưl poot đơơy adrơơk, xing Đa-vik truh katuôôy rôp dơơp xapok hlê Ba-bi-lôn laa kưl poot đơơy adrơơk, ji xing katuôôy rôp dơơp xapok hlê Ba-bi-lôn truh Lôôk Wơơt Dêh laa kưl poot đơơy adrơơk.

18Varơuq pôôt dêh ku Lôôk Wơơt Dêh Jê-xu laa luneq: Tuôôy Ma-ri, miq Kadraq, heq jah taboot apok xarooy dii Jô-sep, bơh adroyq tuôôy baarq xa măn dii mamuuyq, mư biq jah xet e bonq xing aduq Kơy Phool Hiel. 19Măn Jô-sep, kanau mư, laa manih hyioh jăk, ji vii leh ưng taboon xơuq mư, nhu đinq kadook ji ka'lăk mư. 20Bơh tuôôy nhu đong biit truh kaluh varơuq nưq, yôôych dayh 'yo hơq, yaak plêêk ku Lôôk rama vlôh kung nhu đom vik apau, đnooy: “Jô-sep, koot xau Đa-vik, nhu te kamưưl xok Ma-ri dơơp kadrê, vii oh de jah e đom mư nưq laa xing aduq Kơy Phool Hiel. 21Mư nưq hnoq pa iir muuyq koot kanau, ji nhu hnoq xôq anơng ka koot laa Jê-xu, vii koot nưq hnoq wơơt tamooy haay vlôh klơlh kadrôôp maroh oot.” 22Tôôy varơuq neq xalih vlôh xôq jah jêêk varơuq heq jah Lôôk xanoh gamưh kơy hlit, đaneq:

23“Dayh 'yo hơq, khơl drê tadăp hnoq măn bonq ji pa iir muuyq koot kanau, ji khơl drơy hnoq taayh yal Kadraq laa Em-ma-nu-ên” — iq laa “Kơy Plêêk măn kung haay.”

24Yôôch atêq tuôôy jah nhơk kah klơlh tuôôy vik, Jô-sep heq dơơp dang đaji yaak plêêk ku Lôôk heq xanoh dăt ji xok mư nưq dơơp kadrê nhu. 25Bơh nhu leh xa măn dii mư nưq dong truh tuôôy mư pa iir muuyq koot kanau. Yôôch nhu taayh anơng koot nưq laa Jê-xu.