Mak 12

1Kadraq xarôp đnooy dii oot bơơn apok atoh: “Muuyq adro hơq pêêt hluôôt nho, panưk paga rawiit, xiel raluk raniaq lok, xơy muuyq kadroak jư, ji ăm khơl adro pêêt nho xapo hlê hluôôt, yôôch vlôh hooy xangưưy. 2Truh xiêk weelh, kơy patăk muuyq dro xapok truh dii khơl pêêt nho xôq xing khơl adro neq, kơy hnoq ik nhonq muuyq phon raak play ku hluôôt. 3Đơu atêq tuôôy jư xok ay nưq, bing oot hmơt đnayh yôôch đuôôy xuq ti hloh. 4Kơy laay patăk muuyq dro xapok kadrơy truh dii bing oot, ji dii adro nưq, oot tiel muut akoq ji đnooy ra ơơh. 5Yôôch Kơy patăk xapok kadrơy đnoyq, dii adro nưq, bing oot păk kaxêêt, ji dii 'ngưng adro kadrơy — tuôôy hmơt dook adro neq, tuôôy păk kaxêêt adro hơq. 6Kơy e muuyq dro tra, laa adro koot kanau thier xung, kơy patăk ay nưq, adro lôôch dik, truh dii bing oot, biit đaneq: ‘Bing oot hnoq 'yo yôq koot kanau kơy.’ 7Bơh khơl pêêt nho nưq tajauq dii mamuuyq đaneq: ‘Neq laa adro dưk hlê. Hooy yơu, haay dayh păk kaxêêt ni, yôôch garuh anôôp dưk hlê hnoq laa ku haay.’ 8Anưq laa atêq tuôôy rôp jư, bing oot păk kaxêêt adro koot nưq, yôôch avih ay vlôh pi gôk hluôôt nho. 9Lunưq, kôôch hluôôt nho hnoq dơơp kajoq? Kơy hnoq truh păk kaxêêt bing pêêt nho ji pahnăp hluôôt nho ka khơl adro kadrơy. 10Khơl kơy koq đok apok neq đom Rahlăp Vah ih?

‘Kuk phơu đơu thơq xơy hnhư dơyh ka'lăk,

phơu nưq heq jah vlôh jêêk phơu muum hnhư.

11Varơuq neq truh xing Lôôk,

ji nưq laa varơuq thier akêh đom mot haay.’”

12Nưq laa oot axek trôôk rôp Kadraq đơu oot yôq manih karôp, vii oot hlolh đaneq Kadraq taboon apok atoh nưq nhămq muut oot. Lunưq tuôôy chuh klơlh Kadraq, oot ka'lăk hooy.

13Yôôch oot patăk toleq dro bing thuôk adrơơk Pha-ri-si ji thuôk bing Hê-rôt truh kung Kadraq xôq bing oot dơơp đook Kadraq đom apok đnooy. 14Tuôôy truh, oot đnooy dii Kadraq: “Kuh thơy, 'wot xet đaneq thơy laa manih dong dik ji aduq thơy, leh e varơuq tameng tyauq paq kê dro leq, vii thơy be 'yo muut pi gôk ku khơl kadrơy, tađôôy muut đnư, thơy pato dayq trôôk daak ku Kơy Plêêk jơq tyauq varơuq dik. E troq ganuun long leh tuôôy nôôp xơu ka Sê-sa? Haay duh nôôp long leh duh nôôp?” 15Bơh vii xet katâk xuum pa ôôh lar ku oot, Kadraq đnooy dii oot: “Aleq êêp kơy laay thưh gô? Dayh xagook ka gô muuyq đơ-ni-ê xôq gô 'yo.” 16Anưq laa oot xagook truh muuyq ravơu, yôôch Kadraq đnooy dii oot: “Long lơuq ji yal dơuq neq laa ku kơyq?” Oot tơơl kung Kadraq: “Ku Sê-sa.” 17Tuôôy nưq, Lôôk Jê-xu patăk dăt oot: “Dayh bla ka Sê-sa kaluh kajoq ku Sê-sa, ji bla ka Kơy Plêêk kaluh kajoq ku Kơy Plêêk.” Oot raay tưng hưng adroyq Kadraq.

18Yôôch bing manih Sa-đu-sê, laa khơl adro đnooy đaneq leh e varơuq riirh hlê, truh kung Kadraq ji vôôch 'yo Kadraq, đaneq: 19“Kuh thơy, Môi-se heq valơk ăm ka haay đaneq: ‘Atoh ay ku muuyq kơyq nưq kaxêêt hlơơp xôq hlê kadrê đơu koq e koot, yôôych ma oh ku adro ay pheq xok dro kadrê nưq ji pa jooy ka ay ni.’ 20E pơh oh ay nưq, adro ay ka xok kadrê yôôch kaxêêt, leh e koot, 21Adro thưq vaarq pajêêk ay nưq, yôôch kaxêêt, leh e koot, ji adro thưq pe kung anưq, 22Dêq pơh dro raay leh e koot. Atêq dêq hloay, adro mư kadrê kung kaxêêt. 23Truh tuôôy riirh hlê, tuôôy oot riirh hlê, ay hơq hnoq laa kadrê ku kơyq đom sôôq oot? Vii pơh dro raay heq xok ay nưq dơơp kadrê.” 24Lôôk Jê-xu đnooy dii oot: “Be aalq êêp kơy biq jarooy hooy hyaak hyul bơyh varơuq neq aleq, vii leh hlolh xet Rahlăp Vah kung đaji taay yaak ku Kơy Plêêk? 25Vii tuôôy khơl kadrơy xing aduq kaxêêt riirh hlê, khơl kadrơy leh pajêêk long ga, bơh oot hnoq dang đaji yaak plêêk tol plêêk. 26Măn truh varơuq manih kaxêêt jah riirh hlê, be aleq êêp kơy koq đok đom rahlăp ku Môi-se, măn phon varơuq truh pôôp jaliê, luleq đơu Kơy Plêêk xanoh dii kơy đaneq: ‘Gô laa Kơy Plêêk ku Ap-ra-ham, Kơy Plêêk ku I-sak, ji Kơy Plêêk ku Ja-kôp’? 27Kadraq leh aalq laa Kơy Plêêk ku adro kaxêêt, đơu laa ku manih riirh. Êêp kơy đong hyaak hyul thier kôt.”

28Tuôôy muuyq đom khơl thơy pato ganuun heq truh jeq, tameng jah oot đong tagêh dii mamuuyq, hloq đaneq Kadraq tơơl apok khơl adro hơq thier haay, yôôych Kơy vôôch Kadraq: “Varơuq leq laa ganeen 'yo duh dik đom dêq hloay?” 29Lôôk Jê-xu tơơl đaneq: “Ganeen 'yo duh dik laa: ‘Nee I-sơ-ra-ên, dayh tameng ne, Lôôk, Kơy Plêêk ku haay, laa Lôôk vơ muuyq 30Koot pheq vado xiaq Lôôk laa Kơy Plêêk ku koot dii dêq hloay xuum klaak koot, dii dêq hloay phool hiel koot, dii dêq hloay xuum biit koot, ji dii dêq hloay paraat koot.’ 31Ganeen thưq vaarq laa nee: ‘Koot pheq xung xiaq adro gah gih ku koot đaji xăk xamơk koot.’ Be e ganeen leq đêh kôt iaq vaarq ganeen neq.” 32Thơy pato ganuun đnooy dii Kadraq: “Jơq dik, kuh thơy! Thơy heq đnooy tyauq varơuq dik đaneq Kadraq laa vơ muuyq, ji be e Lôôk leq kadrơy đêh Kadraq. 33Vado xiaq Kadraq bơơn dêq xuum klaak, dii dêq hloay hlolh xet, kung dii dêq hloay paraat, ji xung xiaq manih gah gih đaji kadih xăk pheq đnooy e jaq iaq tôôy kuah lêh vuh ji kuah tơơk tưp.” 34Atêq tuôôy 'yo kơy, vii kơy heq tơơl hlê trôôk khôôt xet, Lôôk Jê-xu đnooy dii kơy: “Kơy leh xangưưy klơlh daak dêh ku Kơy Plêêk 'leq.” Ji leh kơyq măn hôôk vôôch 'yo Kadraq đnoyq.

35Xôq tơơl hlê, tuôôy đong pato dayq đom chaal hnhư hơu, Lôôk Jê-xu đnooy: “Dơơp đaleq khơl thơy pato ganuun đnooy đaneq Lôôk Wơơt Dêh laa koot vuua Đa-vik? 36Kadih vuua Đa-vik, đom Lôôk phool hiel, heq đnooy:

‘Lôôk xanoh dii Lôôk gô:

“Dayh 'ngôôy pi bơ Gô,

dong truh tuôôy leq Gô xôq khơl adro tachơơl koot 'laarq jôôk ku koot.”’

37Kadih vuua Đa-vik taayh Kadraq laa ‘Lôôk,’ yôôych dơơp aleq Kadraq laa koot ku vuua nưq ik?” Bing manih karôp xaam tameng Kadraq kach ahrơh trôôch.

38Đom varơuq pato dayq ku kadraq, Kadraq đnooy: “Dayh văch 'yo dii khơl thơy pato ganuun, laa khơl adro ưng trôôch hooy dưk đom qwuân aau yơơt, kaluh apok vôôch hrok katul aduq tabôôt xa, 39aduq 'ngôôy tơơl dal đom hnhư tagumq kung kachô adroyq dik aduq đaamq pajêêk. 40Khơl adro nưq luôôt hnhư ku mo valơu, dơơp bôô xadrook apôôy dong yơơt. Bing manih neq hnoq chiuq xưh xadrah găk khăk iaq.”

41Yôôch tuôôy heq 'ngôôy pôôt ta hyioh aduq xôq trăp xôq jêêt tưp ku hnhư hơu, Kadraq 'yo manih karôp viet jêêt muut trăp đaji luleq. 'Ngưng adro karoh viet muut kasôôq 'ngưng jêêt. 42Tuôôy muuyq mo valơu adrah tawaak truh, mo viet muut vaarq ravơu jêêt de, jaq triq muuyq chưng laa muuyq xu. 43Atêq tuôôy taayh khơl xatyauq ku kadraq hlê, Kadraq đnooy dii oot: “Dong dik, thơy đnooy dii oh ay đaneq mo valơu adrah neq heq tưp 'ngưng iaq dêq hloay khơl adro heq viet jêêt muut trăp hơq. 44Vii dêq hloay oot raay tưp xing varơuq raah e ku oot, bơh mo neq, xing đom varơuq adrah pơơl ku mo, heq tưp dêq padêq hloay mo e, 'ngưq laa tôôy thưq deng xôq văch riirh mo.”