Skip to content
BibleKenya

Cua Bible Literal Text

Mak 11

Tuôôy oot hooy jeq truh Jê-ru-sa-lem, truh Bê-pha-jê ji Bê-tha-ni, wih truh đoot Ô-liu, Kadraq patăk vaarq dro khơl xatyauq ku kadraq hooy, ji đnooy dii oot: “Dayh hooy muut palơy pla kangưưr oh ay, hloay tuôôy muut truh nưq, oh ay hnoq hloq muuyq lưưa koot biq vek, koq hmưq e kơyq acho tol ni. Dayh luh talơy vek ka ni ji jarooy ni xuq đnen. Atoh kơyq nưq vôôch oh ay: ‘Aleq êêp ay dơơp anưq?’ yôôych dayh tơơl đaneq: ‘Lôôk e varơuq duh xung ni ji Kadraq hnoq atăq ăm ni hlê.’” Oot chuh hooy ji hloq muuyq lưưa koot biq vek ka 'mok gôk gah trôôk, lunưq oot luh talơy ka ni. Toleq dro dưk đnư đnooy kung oot: “Baarq ay đong dơơp kajoq đơu luh talơy vek lưưa koot nưq?” Baarq tơơl hlê toleq adro nưq đaji Lôôk Jê-xu heq pato, ji khơl adro nưq xôq ka baarq hooy. Oot jarooy lưưa koot xuq ka Lôôk Jê-xu yôôch hlơơk aau kahliik oot tol lưưa, ji Kadraq 'ngôôy tok nưq. 'Ngưng dro hlơơk aau oot vlôh tol trôôk, măn dii sôôq kadrơy, yôôych hlơơk kaluh đook gay heq koh xing manay gôk. Kaah khơl adro hooy adroyq hloay khơl adro tyauq atêq pariau kôt:

“Hô-sa-na! Đangq ayuôôt laat Kơy kahri truh taayh yal Lôôk.

Vanong hloay daak dêh hnoq truh ku mo kơy Đa-vik haay!

Hô-sa-na đom aduq thier raa yơơt!”

Kadraq heq hooy muut theng Jê-ru-sa-lem, muut đom hnhư hơu, ji tuôôy heq 'yo raa wiit tôôy thưq, vii wat nưq kung jeq klôôy yôôch, Kadraq hooy vlôh truh Bê-tha-ni kung kưl vaarq dro jah rơơlh. Hngơy atêq, tuôôy oot heq hooy vlôh klơlh Bê-tha-ni, yôôych Kadraq pangoot. Tuôôy 'yo hloq muuyq ưk pok puut e 'ngưng hla xing kơn xangưưy, Kadraq truh, leh kheoq Kadraq hnoq axek hloq e play leq tol ưk be. Đơu tuôôy heq truh aduq ưk nưq, Kadraq be hloq e kajoq vơơ hla, vii koq aalq laa xiêk pok puut. Xôq hlê varơuq neq, Kadraq xanoh dii ưk nưq: “Hnoq paq e đnoyq măn kơyq xa play xing aduq may đnoyq.” Khơl xatyauq Kadraq tameng apok nưq.

Tuôôy hooy truh Jê-ru-sa-lem, ji muut đom hnhư hơu, Kadraq xarôp đuôôy dro tek manih root đom hnhư hơu vlôh pi gôk, Kadraq vlơq kahlôôp para ku khơl adro tađôôy jêêt ji ragê ku khơl adro tek xêêp katrơu. Kadraq leh ăm pheep paq kê kơyq xagook kaluh đôô gamưh hlê hnhư hơu. Yôôch Kadraq pato oot ji đnooy: “Be aalq e apok valơk đaneq:

‘Hnhư gô hnoq jah taayh laa hnhư xadrook apôôy ka tôôy tamooy’ ih?

Bơh khơl êêp heq dơơp ni jêêk kôôp tapu ku khơl varoh.”

Khơl thơy tơơk tưp kôt ji thơy pato ganuun tameng đanưq, yôôych oot axek trôôk đơu oot hnoq ik păk kaxêêt Kadraq, vii oot yôq Kadraq, bơyh dêq manih karôp raay tưng hưng truh varơuq pato dayq ku Kadraq. Truh tuôôy rayôôp klôôy, oot chuh klơlh theng.

Muut ka xaroq, đong tuôôy hooy dalơh hlê, oot hloq ưk pok puut heq kateh ha'yauq xing ưk rayah. Atêq tuôôy văch hlê, Phi-e-rơ tơơl dii Kadraq: “Ra-bi, 'yo hơq! Ưk pok puut đơu thơy axaap heq kateh ha'yauq yôôch.” Tuôôy tơơl hlê, Lôôk Jê-xu đnooy dii oot: “Dayh e xuum tuôq aduq Kơy Plêêk. Dong dik, Thơy đnooy dii oh ay, đaneq adro leq đnooy dii ngok đoot neq: ‘Dayh vưyq tok ji qwel pôôt tahli,’ đơu leh biit ravơq đom xuum haay, bơh tuôq đaneq varơuq haay đnooy jeq xalih vlôh, yôôych varơuq hnoq jêêk ka adro nưq. Vii anưq, thơy đnooy dii oh ay, dêq hloay tôôy varơuq oh ay xadrook apôôy ji ratuut vôôch, dayh tuôq đaneq oh ay heq nhonq jah, yôôych varơuq nưq hnoq jêêk ka oh ay. Tuôôy oh ay dưk xadrook apôôy, atoh oh ay e varơuq tachơơl dii kơyq nưq, yôôych dayh tha ka'lăk, xôq Vaq ku oh ay laa Kơy măn tol plêêk kung tha ka'lăk oh ay truh kaluh lôp kadrôôp ku oh ay.” (Bơh atoh oh ay leh tha ka'lăk, yôôych Vaq ku oh ay laa Kơy măn tol plêêk kung hnoq leh tha ka'lăk kaluh lôp kadrôôp ku oh ay.) Yôôch oot laay hooy truh Jê-ru-sa-lem ji tuôôy Kadraq đong hooy đom hnhư hơu, khơl thơy tơơk tưp kôt, khơl thơy pato ganuun, ji khơl kadraq lơơk truh kung Kadraq. Oot đnooy dii Kadraq: “Bơyh taay yaak leq đơu kơy dơơp kaluh varơuq nưq ji kơyq heq palo ăm kơy taay yaak neq xôq kơy hnoq ik dơơp kaluh varơuq nưq?” Bơh Lôôk Jê-xu đnooy dii oot: “Gô kung hnoq vôôch êêp kơy muuyq apok, ji dayh tơơl apok gô, yôôch gô hnoq đnooy ka êêp kơy bơyh taay yaak leq đơu gô dơơp kaluh varơuq nưq. Pheep bap-tem ku Jăng laa xing plêêk long xing koot manih? Dayh tơơl apok gô.” Oot tajauq dii mamuuyq đaneq: “Haay duh tơơl đaleq? Atoh haay đnooy: ‘Xing plêêk’, dro neq hnoq đnooy: ‘Atoh anưq, vii kơq kajoq đơu êêp kơy leh tuôq Jăng?’ Wih hlê, atoh haay đnooy: ‘Xing koot manih,’ …?” (Bing oot yôq manih karôp, vii kơyq kơyq kung 'yo đaneq Jăng dong dik laa muuyq kơy hlit.) Lunưq tuôôy tơơl apok Lôôk Jê-xu, oot tơơl: “'Wot leh xet.” Lôôk Jê-xu đnooy dii oot: “Gô kung leh đnooy dii êêp kơy xing taay yaak leq đơu gô dơơp kaluh varơuq nưq.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.