Cua Bible Literal Text
Mak 13
Tuôôy Kadraq đong chuh klơlh hnhư hơu, muuyq đom khơl xatyauq Kadraq tơơl dii Kadraq: “Thơy lơơy, 'yo hơ! Kaluh talaat phơu kôt xet toleq ji kaluh xơy panưk kaxay liep xet taleq!” Lôôk Jê-xu đnooy kung khơl xatyauq nưq: “Ay hloq kaluh hnhư kôt yơơt neq ih? Hnoq be măn e muuyq kuk phơu leq măn đnen ik xôq rahloot tol kuk phơu kadrơy đơu phơu nưq hnoq leh biq dơơp hrưp.”
Ji tuôôy Kadraq đong 'ngôôy tol đoot Ô-liu ta hyioh hnhư hơu, Phi-e-rơ, Ja-kơ, Jăng ji Anh-rê vôôch đêh Kadraq: “Xiin thơy đnooy ka 'wot, tuôôy leq kaluh varơuq nưq hnoq xalih vlôh? Ji e dơuq hlêêl kajoq tuôôy tôôy varơuq nưq jeq ik jah jêêk?” Tuôôy nưq, Lôôk Jê-xu tok apok đnooy dii oot: “Dayh rơơt rol, te xôq kơyq jarooy pato oh ay hooy hyaak hyul. 'Ngưng dro hnoq truh taayh yal thơy, đnooy đaneq: ‘Laa gô neq,’ ji oot hnoq jarooy 'ngưng adro hooy hyaak hyul. Măn tuôôy oh ay tameng truh hmơt jăk ji hêêl đnooy truh hmơt jăk, yôôych te biit yôq; varơuq nưq pheq xalih vlôh, bơh koq aalq laa lôôch dik. Vii tamooy neq hnoq dưk tok tachơơl hlê tamooy kadrơy, ji daak neq tachơơl hlê daak hơq. Hnoq e hrưng vari măn 'ngưng aduq, hnoq e 'ngưng naanq pangoot. Bơh varơuq nưq laa đơơu xarôp ku kaluh đơơt jiq pa iir.
Mot kadrơy, kadih oh ay pheq 'yo rơơt. Khơl kadrơy hnoq nôôp oh ay ka hnhư xadrah ji ka hnhư tagumq, oh ay hnoq biq tiel đnayh, hnoq dưk kangưưr khơl adro padrok ji khơl vuua vii kơq thơy, đaji muuyq apok xanưk ka oot. Ji adroyq dik, Hêêl Kaxay pheq jah padoh taboon ka tôôy daak tamooy. Tuôôy oot rôp jarooy oh ay hooy atăq nôôp, te biit truh apok haay pheq đnooy. Lunư, atoh apok leq jah kahniq ka oh ay đom wat nưq, yôôych dayh đnooy apok nưq; vii oh ay be aalq laa adro đong đnooy, bơh laa Kơy Phool Hiel. Ay hnoq nôôp oh muut aduq kaxêêt, vaq yôôych nôôp koot. Yôôch koot xau hnoq dưk tok tachơơl hlê vaq miq ji khienq oot biq kaxêêt. Oh ay hnoq biq tôôy dro tachơơl 'yarơ vii yal ku thơy. Bơh kơyq kajưk xuum dong truh lôôch dik, dro nưq hnoq jah wơơt.
Mot kadrơy, tuôôy oh ay hloq varơuq ramêq ku varơuq hruh hrek xalih vlôh aduq leh duh e (dro đok pheq hlolh), yôôych khơl leq măn aduq dêh Ju-đê dayh charơơk klôônq tok đoot, măn kơyq măn tol apo hnhư, te pôôt kung te muut 'lăp xôq xok paq kê thưq kajoq vlôh klơlh hnhư xăk, ji kơyq măn manay ruôngq, te wiit hlê xuq dii kaluh thưq măn pi atêq xôq xok aau kahliik ku xăk. Bơh ra ơơh dik hloay ka khơl kadrê đong măn bonq ji khơl drê ăm koot uq đom kaluh hngơy nưq! Wih hlê, dayh xadrook apôôy xôq varơuq nưq leh xalih vlôh muut xiêk ka oaq. Vii đom kaluh hngơy nưq hnoq e pơơl dal truh mưk koq hmưq e đanưq jauq xing tuôôy xarôp panưk pajêêk, laa tuôôy Kơy Plêêk panưk jêêk tôôy paroh dong truh juneq, ji kung hnoq leh dong leq e hlê. Ji atoh Lôôk leh hruut lêq kaluh hngơy nưq, tôôy xăk xamơk hnoq be jah wơơt. Bơh vii kơq khơl adro jah rơơlh, laa khơl adro Kadraq heq rơơlh, Kadraq goch palêq sôôq hngơy nưq. Tuôôy nưq, atoh kơyq nưq đnooy dii oh ay: ‘'Yo nee, Lôôk Wơơt Dêh măn đnen! 'Yo Hơq, măn kơn hơq!’ yôôych te tuôq. Vii lôôk wơơt dêh pa ôôh ji khơl hlit pa ôôh hnoq jah dưk tok, yôôch hnoq kahnoq vlôh kaluh dơuq akêh ji pheep akêh xôq, atoh hnoq ik, dơơp ăm hyaak hyul khơl adro jah rơơlh. Bơh oh ay pheq 'yo rơơt! Dayh 'yo nee, thơy heq ăm oh ay xet adroyq tôôy varơuq yôôch.
Lunư, muut kaluh hngơy nưq, atêq đơơt pơơl dal nưq,
mot hngơy hnoq biq kamơng jaluk,
xiêk hnoq leh paq xaraar tađnah aduq nưq;
kaluh xalok hnoq xing plêêk klêh pôôt,
ji kaluh qwuyen da uh tol plêêk hnoq biq anhưh hrưng.
Tuôôy nưq, khơl kadrơy hnoq hloq Koot Manih dii taay yaak ji tađnah tađnaak kôt lơyq kahri truh katul kaluh đum kluk. Atêq nưq, Kadraq hnoq patăk dăt khơl yaak plêêk ji Kadraq hnoq anguk hlê khơl adro jah rơơlh ku Kadraq loch poot panưh vari, xing lôôch vari dong truh lôôch plêêk.
Mot kadrơy, dayh hok xet apok atoh xing ưk pok puut. Tuôôy đook ni vlôh jêêk rangoch kaxeq ji vlôh hla yôôch, oh ay xet đaneq xiêk tôq heq jeq. Kung đanưq, tuôôy oh ay hloq kaluh varơuq nưq xalih vlôh, oh ay xet đaneq Kadraq đong măn jeq, kangưưr 'mok. Dong dik, thơy đnooy dii oh ay đaneq, adrơơk neq kajưk dik hnoq be hooy hlơơp dong truh tuôôy leq tôôy varơuq nưq xalih vlôh. Plêêk ji vari hnoq hooy hlơơp, bơh kaluh apok ku thơy kajưk dik hnoq leh hooy hlơơp. Măn truh hngơy nưq long wat nưq, đêh vlôh Vaq, yôôych leh kơyq xet ik, pheq đnooy yaak plêêk tol plêêk kung leh, ji Koot kung anưq.
Dayh rơơt rol! Dayh văch parol ji apôôy, vii oh ay leh xet kawat nưq laa tuôôy leq. Dang đaji muuyq dro hơq dưk hooy xangưưy hnhư, tuôôy heq hooy klơlh hnhư ni, ji heq pahnăp ka tôôy xapok ni qwuyen jư 'yo varơuq dơơp ku ni, yôôych kơy đnooy patăk adro jư 'mok đaneq dro nưq kơn duh parol 'yo; jo nưq, dayh văch parol, vii oh ay leh xet tuôôy leq kôôch hnhư xuq truh — long muut rayôôp klôôy, long tuôôy katul mưng; long tuôôy ier rok long muut ka xaroq — e đaneq atêq tuôôy tưng hưng xuq truh, kôôch rôp tavơh oh ay đong vik. Bơh Varơuq đơu thơy đnooy dii oh ay, thơy kung đnooy dii tôôy adro: Dayh văch parol!”
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.